Dussehra 2022: DJ ଗୀତରେ ନାଚିଲେ ବଳଦ, ଦେଖିବାକୁ ଆସିଲେ ଶହ ଶହ ଲୋକ

Dussehra 2022 in Balasore: ଦଶହରାରେ ନାଚିଲେ ବଳଦ। ପ୍ରତିଯୋଗୀତାରେ ଭାଗନେଲା ୩୦ ବଳଦ। ୨୦୦ ବର୍ଷରୁ ଊର୍ଦ୍ଧ୍ୱ ବର୍ଷ ହେଲା ସିମୁଳିଆ ବ୍ଲକ୍ ଈଶ୍ୱରପୁର ପଞ୍ଚାୟତ ଚନ୍ଦ୍ରପଡ଼ା ଗାଁରେ ପାଳନ ହେଇଛି ନିଆରା ଦଶହରା।

Dussehra 2022, ବାଲେଶ୍ୱର: ଜିଲ୍ଲାର ସୋର, ସିମୁଳିଆ, ଖଇରା ଓ ଔପଦା ବ୍ଲକର ବିଭିନ୍ନ ଅଞ୍ଚଳରେ ଶାରଦୀୟ ଦୁର୍ଗାପୂଜା ଉତ୍ସାହ ସହକାରେ ପାଳନ ହୋଇଯାଇଛି । ଏହି ଅଞ୍ଚଳରେ ରୀତିନୀତିରେ ମାଁଙ୍କୁ ପୂଜାଅର୍ଚ୍ଚନା କରାଯାଇଥିବା ବେଳେ ସିମୁଳିଆ ବ୍ଲକ୍ ଈଶ୍ୱରପୁର ପଞ୍ଚାୟତ ଚନ୍ଦ୍ରପଡ଼ା ଗାଁରେ ଦଶହରା ପର୍ବ ଏକ ନିଆରା ଢ଼ଙ୍ଗରେ ମନାଯାଉଥିବା ଦେଖିବାକୁ ମିଳିଛି । ଦଶହରା ପରିପେକ୍ଷୀରେ ବଳଦମାନଙ୍କୁ ରଙ୍ଗ ବେରଙ୍ଗ କପାଡାରେ ସର୍ଜିତ କରି ଏକ ନୃତ୍ୟ ପରିବେଷଣ କରିଥାନ୍ତି । ବଙ୍ଗୀୟ ସମ୍ପ୍ରଦାୟର ଲୋକେ ଦୀର୍ଘ ୨୦୦ ବର୍ଷ ପୂର୍ବରୁ ଆରମ୍ଭ କରିଥିବା ଏହି ପ୍ରଥାକୁ ଗ୍ରାମବାସୀମାନେ ଜାରି ରଖିଛନ୍ତି। ଲୋକଙ୍କ  ବିଶ୍ୱାସ ଯେ, ବଳଦ ନାଚ ହେଲେ ଭଲ ଫସଲ ଅମଳ ହେବା ସହିତ ଗାଁର ମଙ୍ଗଳ ହୋଇଥାଏ ।

ବାଲେଶ୍ଵର ଜିଲ୍ଲା ସିମୁଳିଆ ବ୍ଲକ୍ ଈଶ୍ୱରପୁର ପଞ୍ଚାୟତ ଚନ୍ଦ୍ରପଡ଼ା ଗାଁରେ ଏହି ବଳଦ ନାଚ ପ୍ରଥା ୨୦୦ରୁ ଊର୍ଦ୍ଧ୍ୱ ବର୍ଷ ହେବ ଗାଁ ଲୋକମାନଙ୍କ ମଙ୍ଗଳ କାମନା ପାଇଁ ଏହି ବଳଦ ନାଚ କରିଥାନ୍ତି । ବଳଦ ନାଚ ଦେଖିବା ପାଇଁ ସ୍ଥାନୀୟ ଓ ଦୂରଦୂରାନ୍ତରୁ ଶହ ଶହ ଭକ୍ତଙ୍କ ଭିଡ଼ ଜମିଥାଏ । ବଳଦମାନଙ୍କୁ ସର୍ଜିତ କରି ମହାଆଡ଼ମ୍ବର ସହକାରେ ବାଜା ନାଚ ସହିତ ମା’ଦେବୀଙ୍କ ପୀଠକୁ ଅଣାଯାଇଥାଏ । ଏହିଠାରେ ବଳଦ ପୂଜା ଅର୍ଚ୍ଚନା କରି ନଚା ଯାଏ । ଏହି ଭଳି କରିଲେ ଗ୍ରାମରେ ସମୃଦ୍ଧି ହେବା ସହିତ ଭଲ ଚାଷ ହେବ ବୋଲି ଗ୍ରାମବାସୀମାନେ ଆଶା ରଖିଥାନ୍ତି ବୋଲି ମନ୍ଦିରର ପୂଜକ ହୃଷିକେଶ ପାଣିଗ୍ରାହୀ କହିଛନ୍ତି।

ଚନ୍ଦ୍ରପଡ଼ା ଗ୍ରାମର ଗ୍ରାମବାସୀମାନଙ୍କ କହିବା ଅନୁଯାୟୀ, ଏହିଠାରେ ୨୦୦ବର୍ଷ ପୂର୍ବରୁ ବେଙ୍ଗଲରୁ କିଛି ଲୋକ ଆସି ବସବାସ କରି ମା’ଦେବୀଙ୍କ ପୂଜା ଅର୍ଚ୍ଚନା କରିଆସୁଥିଲେ । ତାଙ୍କ ବଂଶଜ ବାଇଧର କୁଅଁର ଓ ଅନ୍ୟମାନେ ଦୁର୍ଗାପୂଜା କରିବା ସହିତ ଏହି ବଳଦ ନାଚ ପରମ୍ପରା ବଜାଇ ରଖିଥିଲେ । ଏହି ପରମ୍ପରାକୁ ଏବେ ଏହି ଗ୍ରାମବାସୀ ମାନି ସବୁ ବର୍ଷ ଦଶହରା ଦିନ ପାଳନ କରିଥାନ୍ତି । ଅଞ୍ଚଳବାସୀ ବଳଦ ନାଚ ସହିତ ମେଳାର ମଜା ଉଠାଇଥାନ୍ତି । ଏହିଥର ୨୦ରୁ ଊର୍ଦ୍ଧ୍ୱ ବଳଦ ଆଣି ପୂଜା ଅର୍ଚ୍ଚନା କରା ଯାଇ ନାଚ କରାଯାଇଥିଲା । ଏହି ସ୍ଥାନରେ ମେଳାରୁ ବିଭିନ୍ନ ଆବଶ୍ୟକ ଜିନିଷ କିଣା କିଣି କରିବା ସହ ଗ୍ରାମବାସୀ ତଥା ବାହାରୁ ଆସିଥିବା ଲୋକେ ଚଟପଟା ଖାଦ୍ୟ ର ମଜା ନେଇଛନ୍ତି ।

କିଛି ବର୍ଷଧରି ଗାଁରେ ପୂଜା କମିଟି ଦାୟିତ୍ୱ ନେଇ ପୂଜା କରିଆସୁଛନ୍ତି । ସେହି ୨୦୦ ବର୍ଷ ପୁରୁଣା ପରମ୍ପରାକୁ ବଜାଇ ରଖିବା ପାଇଁ ୨୦ରୁ ୩୦ ବଳଦକୁ ସଜାଇ ମା’ଙ୍କ ପୀଠକୁ ଅଣାଯାଇ ଥାଏ । ଏହି ବଳଦ ନାଚ ହେଲେ ଗାଁର ମଙ୍ଗଳ ହୋଇଥିବା ସହ ଲୋକମାନଙ୍କର ମନସ୍କାମନା ପୂରଣ ହୋଇଥାଏ । ଗ୍ରାମବାସୀମାନେ ମଧ୍ୟ ତାଙ୍କ ବଳଦକୁ ବର୍ଷ ସାରା ଭଲରେ ଯତ୍ନ ନେଇଥାନ୍ତି । ଏହି ବଳଦ ନାଚରେ ଭଲ ନାଚ କରିଥିବା ବଳଦର ମାଲିକକୁ ପୁରସ୍କାର ପ୍ରଦାନ କରା ଯାଆଇଥାଏ । କୋରୋନା ପରେ ଏହି ବର୍ଷ ବହୁ ଆଡ଼ମ୍ବରରେ ବଳଦ ନାଚ ଅନୁଷ୍ଠିତ ହୋଇଥିଲା।

ମା’ଙ୍କ ପୂଜା ସରିବା ପରେ ୩ ଦିନ ଧରି ଚନ୍ଦ୍ରପଡ଼ା ଗାଁରେ ଏହି ପରି ନିଆରା ବଳଦ ନାଚ  ଆୟୋଜନ ହୋଇଥାଏ । ତାହାକୁ ଦେଖିବା ପାଇଁ ଆଖପାଖ ଗ୍ରାମରୁ ଶତାଧିକ ଭକ୍ତଙ୍କର ସମାଗମ ହୋଇଛି । ଦୁର୍ଗାପୂଜାର ଏହି ପୁରାତନ ଐତିହ୍ୟ ବଳଦନାଚ ଲୋକମାନଙ୍କ ମନରେ ଭକ୍ତି ଓ ଶ୍ରଦ୍ଧା ଆଣିଦେଇଥାଏ । ଏଥର ବଳଦମାନେ ଡିଜେ ଗୀତରେ ନୃତ୍ୟ ପରିବେଷଣ କରିଥିଲେ । ପ୍ରକୃତରେ ବଳଦମାନଙ୍କୁ ରଙ୍ଗ ବେରଙ୍ଗର କପଡାରେ ସଜେଇ ପୀଠକୁ ଅଣା ଯାଇଥିଲା । ମାଲିକମାନେ ବଳଦକୁ ଧରି ନିଜେ ନାଚ କରିଥିଲେ ଆଉ ବଳଦକୁ ପଡିଆରେ ବୁଲାଇଥିଲେ ।