ଜମ୍ମୁ-କଶ୍ମୀର ନିର୍ବାଚନକୁ ନେଇ ଗଣମାଧ୍ୟମ ଚଳଚଞ୍ଚଳ, ୪-୫ଟି ପର୍ଯ୍ୟାୟରେ ହୋଇପାରେ ବିଧାନସଭା ନିର୍ବାଚନ

ନୂଆଦିଲ୍ଲୀ: କେନ୍ଦ୍ର ଶାସିତ ଅଞ୍ଚଳ ମାନ୍ୟତା ପାଇବା ପରେ ଜମ୍ମୁ କଶ୍ମୀର ବିଧାନସଭା ପାଇଁ ଖୁବ୍‍ ଶୀଘ୍ର ନିର୍ବାଚନ ହେବାକୁ ଯାଉଛି। ନିର୍ବାଚନ କମିଶନଙ୍କ ନିକଟରେ ସମୀକ୍ଷା ଏବଂ ବିଭିନ୍ନ ବର୍ଗଙ୍କ ସହ ଆଲୋଚନା ଏହି ଚର୍ଚ୍ଚାକୁ ଅଧିକ ମଜଭୁତ କରିଛି। ଏପରିକି କିଛି  ଗଣମାଧ୍ୟମ ନିର୍ବାଚନ ୪ରୁ ୫ ପର୍ଯ୍ୟାୟରେ ହୋଇପାରେ ବୋଲି କହିଛନ୍ତି। ପାଣିପାଗ, ଭୌଗୋଳିକ ସ୍ଥିତି ଏବଂ ଜନସଂଖ୍ୟା ଓ ସୁରକ୍ଷାକୁ ଆଖି ଆଗରେ ରଖି ନିର୍ବାଚନ କିପରି ଅବାଧ, ମୁକ୍ତ ହୋଇପାରିବ ସେ ନେଇ ଚିନ୍ତା କରୁଛନ୍ତି ନିର୍ବାଚନ ଆୟୋଗ।

ମିଳିଥିବା ସୂଚନା ଅନୁସାରେ ଉତ୍ତର କଶ୍ମୀରରେ ପ୍ରଥମେ ନିର୍ବାଚନ ହେବାର ସମ୍ଭାବନା ରହିଛି। ନିର୍ବାଚନ କମିଶନଙ୍କ ନିକଟରେ ଅନ୍ୟ ଏକ ବିକଳ୍ପ ହେଉଛି ଉଭୟ ଉତ୍ତର ଓ ଦକ୍ଷିଣ କାଶ୍ମୀର ନିର୍ବାଚନମଣ୍ଡଳୀ ଏବଂ ପରେ କେନ୍ଦ୍ରୀୟ କାଶ୍ମୀର ଓ ଜମ୍ମୁରେ ମତଦାନର ପ୍ରାରମ୍ଭିକ ପର୍ଯ୍ୟାୟରେ ମତଦାନ କରିବା। 

୨୦୧୪ରେ ଜମ୍ମୁ-କାଶ୍ମୀରରେ ଶେଷଥର ପାଇଁ ବିଧାନସଭା ନିର୍ବାଚନ ହୋଇଥିବାବେଳେ ୫ଟି ପର୍ଯ୍ୟାୟରେ ମତଦାନ ହୋଇଥିଲା। ଅଗଷ୍ଟ ୮ରୁ ୧୦ ତାରିଖ ପର୍ଯ୍ୟନ୍ତ ନିର୍ବାଚନ ଆୟୋଗ ଶ୍ରୀନଗର ଓ ଜମ୍ମୁ ଗସ୍ତ କରି ନିର୍ବାଚନ ପ୍ରସ୍ତୁତିର ସମୀକ୍ଷା କରିଥିଲେ। ଅକ୍ଟୋବରରୁ ଉତ୍ତର କାଶ୍ମୀରର ଉପରମୁଣ୍ଡରେ ପ୍ରବଳ ତୁଷାରପାତ ହେବାର ସମ୍ଭାବନାକୁ ଦୃଷ୍ଟିରେ ରଖି ପୂର୍ବରୁ ନିର୍ବାଚନ କରାଇବା ଠିକ୍ ହେବ। 

ଅଧିକାଂଶ ଦଳ ପ୍ରବାସୀ ଗୁଜ୍ଜର ଏବଂ ବକରୱାଲ ଭୋଟରଙ୍କ ପ୍ରତି ନିର୍ବାଚନ କମିଶନଙ୍କ ଦୃଷ୍ଟି ଆକର୍ଷଣ କରିଥିଲେ। ଦଳଗୁଡ଼ିକ କହିଛନ୍ତି ଯେ ସେମାନଙ୍କ ଅଞ୍ଚଳରେ ନିର୍ବାଚନର ସମୟ ନିର୍ବାଚନ କ୍ୟାଲେଣ୍ଡର ଶେଷରେ ରଖାଯିବା ଉଚିତ, ଯାହାଦ୍ୱାରା ସେମାନେ ଋତୁକାଳୀନ ସ୍ଥାନାନ୍ତର ପରେ ଭୋଟ୍ ଦେବାକୁ ଘରକୁ ଫେରିବେ। 

ଜମ୍ମୁ-କାଶ୍ମୀର ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବଳ ମୁତୟନ କରିବାକୁ ଦାବି କରାଯାଇଛି। ନିର୍ବାଚନ ଘୋଷଣାର ଅତି କମରେ ଦୁଇସପ୍ତାହ ପୂର୍ବରୁ ପର୍ଯ୍ୟାପ୍ତ ସୁରକ୍ଷା ବାହିନୀ ଅଣାଯିବାକୁ ସେ ବିଶେଷଭାବେ ଅନୁରୋଧ କରିଛନ୍ତି, ଯାହାଦ୍ୱାରା ଏହି ଅଞ୍ଚଳକୁ ନିୟନ୍ତ୍ରଣ କରାଯାଇ ପାରିବ ଏବଂ ଉଦ୍ଧାର କାର୍ଯ୍ୟ କରାଯାଇ ପାରିବ । 

ପ୍ରତ୍ୟେକ ପ୍ରାର୍ଥୀଙ୍କୁ ଅତିରିକ୍ତ ସୁରକ୍ଷା ବଳୟ ଆବଶ୍ୟକ ହେବ ବୋଲି ଅନୁମାନ କରାଯାଉଛି। ତେଣୁ ନିର୍ବାଚନ ପାଇଁ ୬୦୦ରୁ ଅଧିକ କମ୍ପାନିର ଅର୍ଦ୍ଧସାମରିକ ବାହିନୀର ଆବଶ୍ୟକତା ପଡ଼ିପାରେ। ଅମରନାଥ ଯାତ୍ରା ଯୋଗୁଁ ପୂର୍ବରୁ ଅଧିକ ଥିବା ବର୍ତ୍ତମାନର ସୁରକ୍ଷା ବାହିନୀ ଏବଂ ସମୁଦାୟ ମୁତୟନ ସ୍ତର ନିର୍ବାଚନ ପୂର୍ବରୁ ବଜାୟ ରଖିବାକୁ ମଧ୍ୟ ବିଚାର କରାଯାଉଛି କାରଣ ସେମାନେ ଦୀର୍ଘ ଦିନ ଧରି ବାସ୍ତବ ସ୍ଥିତି ବିଷୟରେ ଭଲ ଆକଳନ ଏବଂ ବୁଝାମଣା କରିବେ।