ଟ୍ରଫି ଶିକାର ନାଁରେ ବିଶ୍ୱର ସବୁଠୁ ବଡ଼ ଦାନ୍ତ ଥିବା ହାତୀକୁ ହତ୍ୟା, ସରକାର ପାଇଲେ ୪୦ ଲକ୍ଷ ଟଙ୍କା

ଗୋଟିଏ ହାତୀ ଶିକାର ପାଇଁ ଶିକାରୀ ପ୍ରାୟ ୪୦ ଲକ୍ଷ ଟଙ୍କା ଖର୍ଚ୍ଚ କରିଛି। ଏହି ଶିକାର ପରେ ବୋତସ୍ୱାନା ଲୋକଙ୍କ ମଧ୍ୟରେ କ୍ରୋଧ ଦେଖାଦେଇଛି। ଏପରିକି ପୂର୍ବତନ ରାଷ୍ଟ୍ରପତି ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି।

କେପଟାଉନ: ବୋତସ୍ୱାନାରେ ବିଶ୍ୱର ସବୁଠାରୁ ବଡ ଦାନ୍ତଥିବା ହାତୀକୁ ହତ୍ୟା କରାଯାଇଛି। ଏହାକୁ ନେଇ ପୁରା ଦେଶରେ ଆକ୍ରୋଶ ଦେଖିବାକୁ ମିଳିଛି। ଏହି ମୃତ ହାତୀ ଦାନ୍ତର (TUSK) ଓଜନ ପ୍ରାୟ ୯୦ କିଲୋଗ୍ରାମ ଥିଲା। ହାତୀ ଶିକାରପାଇଁ ସରକାରଙ୍କୁ ଶିକାରୀ ପ୍ରାୟ ୪୦ ଲକ୍ଷ ଟଙ୍କା ଦେଇଥିଲା। ଏହି ହାତୀ ଶିକାରକୁ ନେଇ ବୋତସ୍ୱାନାର ପୂର୍ବତନ ରାଷ୍ଟ୍ରପତି ଇୟାନ ଖାମା ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି। ହାତୀ ମରିବା ଦ୍ଵାରା ଆମର ପର୍ଯ୍ୟଟନ ଶିଳ୍ପ କିପରି ଲାଭବାନ ହେବ ବୋଲି ସେ ପ୍ରଶ୍ନ କରିଛନ୍ତି।

ଡେଲି ମେଲର ରିପୋର୍ଟ ଅନୁଯାୟୀ, ୨୬ ବର୍ଷ ପରେ ବିଶ୍ୱର ସବୁଠାରୁ ବଡ ଦାନ୍ତ ଥିବା ହାତୀକୁ ହତ୍ୟା କରାଯାଇଛି। ବୋତସ୍ୱାନା (Botswana) ରେ ଲିଓନ କାଚେଲହୋଫର ନାମକ ବ୍ୟକ୍ତି ହାତୀକୁ ଶିକାରକରିଛନ୍ତି। ୫୦ ହଜାର ଡଲାର ବା ପ୍ରାୟ ୪୦ ଲକ୍ଷ ଟଙ୍କା ଦେବା ପରେ ସେ  ଏହି ହାତୀ (Elephant) କୁ ଶିକାରକରିଛନ୍ତି। ମୃତ ହାତୀଟିର ବୟସ ପ୍ରାୟ ୫୦ ବର୍ଷ ଥିଲା। ତାକୁ ମାତ୍ର ଗୋଟିଏ ଗୁଳିରେ ହତ୍ୟା କରାଯାଇଥିଲା ବୋଲି ଶିକାର ଶିଳ୍ପ ମୁଖପାତ୍ର ନିଶ୍ଚିତ କରିଛନ୍ତି। ବୋତସ୍ୱାନାରେ ଏବେ ଲେକ୍ଷ ୩୦ ହଜାର ହାତୀ ଅଛନ୍ତି। କିନ୍ତୁ ଆଫ୍ରିକାରେ ଏଭଳି ପ୍ରାୟ ୪୯ଟି ହାତୀ ଅଛନ୍ତି, ଯେଉଁମାନଙ୍କ ଗୋଟିଏ ଦାନ୍ତ (Tusk) ର ଓଜନ ୧୦୦ ପାଉଣ୍ଡରୁ ଅଧିକ (୪୫ କିଲୋଗ୍ରାମ) ହେବ। ନିକଟରେ ପ୍ରାୟ ୪୦ କିଲୋଗ୍ରାମ ଓଜନର ଏକ ହାତୀକୁ ହତ୍ୟା କରାଯାଇଥିଲା। 

ଗତ ବର୍ଷ ହାତୀ ଶିକାରରୁ ଦେଶର ରାଜକୋଷକୁ ୨.୭ ମିଲିୟନ ଡଲାର ଆସିଥିଲା। ଶିକାର ଶିଳ୍ପ ମୁଖପାତ୍ର ଡେବି ପାଇକ କହିଛନ୍ତି, 'ଶିକାରଲୋକଙ୍କ ଆୟ ଏବଂ ସମ୍ପ୍ରଦାୟ ପାଇଁ ଏକ ବଡ଼ ପରିବର୍ତ୍ତନ ଆଣିବ। ଏହି ହାତୀର ଶରୀରରେ ପୂର୍ବରୁ ଏକ ବୁଲେଟ୍ କ୍ଷତ ଥିଲା, ଅର୍ଥାତ୍ ସେହି ହାତୀଟି ବେଆଇନ ଶିକାରୀମାନଙ୍କ ଦୃଷ୍ଟିରେ ଥିଲା। ଯଦି ଏହା ବେଆଇନ ଶିକାରୀ ଦ୍ଵାରା ହତ୍ୟା କରାଯାଇଥାନ୍ତା, ତେବେ ସ୍ଥାନୀୟ ସମ୍ପ୍ରଦାୟ ଏହାର ଲାଭ ପାଇ ନଥାନ୍ତେ। ହାତୀ ପ୍ରଜନନ ବୟସ ଅତିକ୍ରମ କରିସାରିଛି ଏବଂ ଏହାର ହତ୍ୟା ଦ୍ୱାରା ଜିନ୍ ପୁଲ୍ ପ୍ରଭାବିତ ହେବ ନାହିଁ।' ବୋତସ୍ୱାନାରରେ ଦୁଇ ପ୍ରକାର ଶିକାରୀ ଅଛନ୍ତି, ଯଥା- ସରକାରୀ ଓ ବେଆଇନ। ବେଆଇନ ଶିକାରୀଙ୍କ ଦ୍ଵାରା ଶିକାର ହେଲେ ଏହାର ଲାଭ କେବଳ ସେମାନେ ହିଁ ପାଇବେ। କିନ୍ତୁ ସରକାରୀ ଶିକାରୀଙ୍କ ଦ୍ଵାରା ଶିକାରକଲେ ଏହା ଦେଶ ପାଇଁ ରାଜସ୍ବ ଆଣିବ। ଏହାକୁ ଟ୍ରଫି ଶିକାର କୁହାଯାଏ।

କାଚେଲହୋଫର୍ ତାଙ୍କର ବିବାଦୀୟ ବିଜୟ ଉପରେ ଫେସବୁକରେ ପୋଷ୍ଟ କରି ଶିକାର ବିଷୟରେ ବର୍ଣ୍ଣନା କରିଛନ୍ତି। ସେ ବ୍ଲଡ ଅରିଜିନର ହୋଷ୍ଟ ରବି କ୍ରୋଗରଙ୍କୁ କହିଥିଲେ ଯେ, ଏଥିରେ କୌଣସି  ବିବାଦ ଉପୁଜିବ ବୋଲି ସେ ଆଶା କରିନାହାଁନ୍ତି। ସେ ଆହୁରି ମଧ୍ୟ କହିଛନ୍ତି: 'ଏହିପରି ହାତୀକୁ ଶିକାର କରିବା ଭଳି ମାନସିକ ସ୍ଥିତିରେ ରହିବା ଏକ ବଡ ଭାଗ୍ୟ। ଯେତେବେଳେ ଆପଣ ଏହିପରି ଶିକାରକରି ହାତୀ ବିଷୟରେ ଚିନ୍ତା କରନ୍ତି, ସେତେବେଳେ ବହୁତ ଦୁଃଖ ଲାଗେ ଓ ପଶ୍ଚାତାପ ମଧ୍ୟ ହୁଏ। ଆପଣ ଜାଣନ୍ତି, ହାତୀକୁ ଗୁଳି କରିବା, ଫୋଟୋ ଉଠେଇବା ଏବଂ ପରେ ହିରୋ ହେବା ଭଳି ନିର୍ବୋଧତା ଅପେକ୍ଷା ବହୁତ କିଛି ଅଛି।'

ବୋତସ୍ୱାନାର ପୂର୍ବତନ ରାଷ୍ଟ୍ରପତି ଇୟାନ ଖାମା ଏହି ହାତୀ ଶୀକାରକୁ ବିରୋଧ କରିଛନ୍ତି। ସେ ତାଙ୍କ କାର୍ଯ୍ୟକାଳ ମଧ୍ୟରେ ବୋତସ୍ୱାନାରେ ଟ୍ରଫି ଶିକାର ବନ୍ଦ କରିଦେଇଥିଲେ। ହତ୍ୟା କରାଯାଇଥିବା ହାତୀର ଫଟୋକୁ ଫେସବୁକରେ ପୋଷ୍ଟ କରି ଇୟାନ ଲେଖିଛନ୍ତି, 'ଏହା ଦେଶର ସବୁଠାରୁ ବଡ ହାତୀ ଥିଲା। ଏକ ହାତୀ ଯାହା ଟୁର୍ ଅପରେଟରମାନେ କ୍ରମାଗତ ଭାବରେ ପର୍ଯ୍ୟଟକମାନଙ୍କୁ ଏକ ପ୍ରତୀକାତ୍ମକ ଆକର୍ଷଣ ଭାବରେ ଦେଖାଇବାକୁ ଚେଷ୍ଟା କରନ୍ତି। ବର୍ତ୍ତମାନ ସେ ମରିଯାଇଛି। ହାତୀ ମରିଯିବା ଆମର ହ୍ରାସ ହେଉଥିବା ପର୍ଯ୍ୟଟନ ଶିଳ୍ପକୁ କିପରି ଲାଭ ଦିଏ?'