IND vs ENG 4th T20I: ସୂର୍ଯ୍ୟକୁମାର ଯାଦବଙ୍କ ଅଧିନାୟକତ୍ୱରେ ଖେଳୁଥିବା ଭାରତୀୟ ଦଳ ଇଂଲଣ୍ଡ ବିପକ୍ଷରେ ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଚତୁର୍ଥ ମ୍ୟାଚ୍ ୧୫ ରନ୍ ରେ ଜିତି ସିରିଜରେ ୩-୧ରେ ଅଜୟ ଅଗ୍ରଣୀ ହାସଲ କରିଛି। ଟିମ୍ ଇଣ୍ଡିଆ ପାଇଁ ବୋଲିଂରେ ଭଲ ପ୍ରଦର୍ଶନ କରି ରବି ବିଷ୍ଣୋଇ ଏବଂ ହର୍ଷିତ ରାଣା ପ୍ରତ୍ୟେକ ୩ ଲେଖାଁଏ ୱିକେଟ୍ ନେଇଥିଲେ।
Trending Photos
12
9
6
6 "IND vs ENG 4th T20I Highlights")
IND vs ENG 4th Highlights: ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯାଉଥିବା ୫ ମ୍ୟାଚ୍ ବିଶିଷ୍ଟ T20 ସିରିଜର ଚତୁର୍ଥ ମ୍ୟାଚ୍ ୩୧ ଜାନୁଆରୀରେ ପୁଣେର ମହାରାଷ୍ଟ୍ର କ୍ରିକେଟ ଆସୋସିଏସନ୍ ଷ୍ଟାଡିୟମରେ ଖେଳାଯାଇଥିଲା। ଚତୁର୍ଥ ଟି-୨୦ ଜିତି ଭାରତୀୟ ଦଳ ସିରିଜ୍ ୩-୧ ରେ କବଜା କରିଛି। ଚତୁର୍ଥ ମ୍ୟାଚ୍ରେ ଭାରତ ଚମତ୍କାର ବ୍ୟାଟିଂ କରିଥିଲା ଏବଂ ପରେ ବୋଲରମାନେ ଚମତ୍କାର ପ୍ରଦର୍ଶନ କରି ଭାରତର ବିଜୟ ସୁନିଶ୍ଚିତ କରିଥିଲେ।
ଏହି ମ୍ୟାଚ୍ରେ ଯେତେବେଳେ ଇଂଲଣ୍ଡ ଦଳ ୧୮୨ ରନ୍ର ଲକ୍ଷ୍ୟକୁ ପିଛା କରିବାକୁ ଆସିଥିଲା ସେତେବେଳେ ବେନ୍ ଡକେଟ ଏବଂ ଫିଲ୍ ସଲ୍ଟର ପ୍ରାରମ୍ଭିକ ଯୋଡ଼ି ଦଳକୁ ଏକ ଭଲ ଆରମ୍ଭ ଦେଇଥିଲେ। ପ୍ରଥମ ୱିକେଟ୍ ପାଇଁ ୬୨ ରନ୍ର ଭାଗୀଦାରି କରିଥିଲେ। ଏହି ଭାଗୀଦାରିକୁ ଟିମ୍ ଇଣ୍ଡିଆର ଯୁବ ଲେଗ୍ ସ୍ପିନର ରବି ବିଷ୍ନୋଇ ଭାଙ୍ଗି ଦେଇଥିଲେ। ଯାହା ପରେ ଭାରତୀୟ ଦଳ ମ୍ୟାଚ୍ ରେ ପ୍ରତ୍ୟାବର୍ତ୍ତନ କରିବାର ସୁଯୋଗ ମିଳିଥିଲା।
ଜସ୍ ବଟଲର୍ ମାତ୍ର ୨ ରନ୍ କରି ପ୍ୟାଭିଲିୟନ୍ ଫେରିଥିବାବେଳେ, ଲିଆମ୍ ଲିଭିଙ୍ଗଷ୍ଟନ୍ ୯ ରନ୍ ଏବଂ ଜାକବ୍ ବେଥେଲ୍ ମାତ୍ର ୬ ରନ୍ କରିପାରିଥିଲେ। ହ୍ୟାରି ବ୍ରୁକ୍ ଗୋଟିଏ ପାର୍ଶ୍ୱରୁ ୨୬ ବଲ୍ରେ ୫୧ ରନ୍ର ଇନିଂସ ଖେଳି ଇଂଲଣ୍ଡକୁ ମ୍ୟାଚ୍ରେ ନିଶ୍ଚିତ ଭାବରେ ବଜାୟ ରଖିଥିଲେ, କିନ୍ତୁ ସେ ପୁଣି ଥରେ ଏହି ସିରିଜ୍ରେ ବରୁଣ ଚକ୍ରବର୍ତ୍ତୀଙ୍କ ଶିକାର ହୋଇଥିଲେ ଏବଂ ଏହିଠାରୁ ମ୍ୟାଚ୍ରେ ଇଂଲଣ୍ଡର ପରାଜୟ ସମ୍ପୂର୍ଣ୍ଣ ଭାବରେ ଦୃଶ୍ୟମାନ ହୋଇଥିଲା।
ଏହି ମ୍ୟାଚ୍ରେ ରବି ବିଷ୍ନୋଇ ତାଙ୍କର ଚାରି ଓଭରରେ ମାତ୍ର ୨୮ ରନ୍ ଦେଇ ତିନୋଟି ୱିକେଟ୍ ନେଇଥିଲେ। ସେହିପରି ହର୍ଷିତ ରାଣା ୪ ଓଭରରେ ୩୩ ରନ୍ ଦେଇ ତିନୋଟି ଗୁରୁତ୍ୱପୂର୍ଣ୍ଣ ୱିକେଟ୍ ନେଇଥିଲେ। ଏହା ବ୍ୟତୀତ ବରୁଣ ଚକ୍ରବର୍ତ୍ତୀ ୨ଟି ୱିକେଟ୍ ନେଇଥିବା ବେଳେ ଅର୍ଶଦୀପ ସିଂହ ଏବଂ ଅକ୍ଷର ପଟେଲ ଗୋଟିଏ ଲେଖାଏଁ ୱିକେଟ୍ ନେଇଥିଲେ।
ଏହି ସିରିଜର ପ୍ରଥମ ତିନୋଟି ମ୍ୟାଚ୍ରେ ଟିମ୍ ଇଣ୍ଡିଆକୁ ଟାର୍ଗେଟ ପିଛା କରିବାକୁ ପଡ଼ିଥିଲା। କିନ୍ତୁ ଏହି ମ୍ୟାଚ୍ରେ ଦଳକୁ ପ୍ରଥମ ଥର ପ୍ରଥମେ ବ୍ୟାଟିଂ କରିବାର ସୁଯୋଗ ମିଳିଥିଲା। ଭାରତୀୟ ଦଳ ପ୍ରଥମ ୬ ଓଭରରେ ତିନୋଟି ଗୁରୁତ୍ୱପୂର୍ଣ୍ଣ ୱିକେଟ ହରାଇଥିଲା। ଏହା ପରେ ୭୯ ରନ ସ୍କୋରରେ ଦଳର ଅଧା ଖେଳାଳି ପାଭିଲିୟନ ଫେରିଯାଇଥିଲେ। ଏହିଠାରୁ ହାର୍ଦ୍ଦିକ ପାଣ୍ଡ୍ୟାଙ୍କ ସହ ମିଶି ପ୍ଲେଇଂ ୧୧କୁ ଫେରିଥିବା ଶିବମ୍ ଦୁବେ ଇନିଂସକୁ ସମ୍ଭାଳିଥିଲେ ଏବଂ ଦ୍ରୁତ ଗତିରେ ରନ ମଧ୍ୟ କରିଚାଲିଥିଲେ।
ହାର୍ଦ୍ଦିକ ଏବଂ ଶିବମଙ୍କ ମଧ୍ୟରେ ୮୭ ରନର ଭାଗୀଦାରି ଭାରତର ସ୍କୋରକୁ ୧୮୧ ରନରେ ପହଞ୍ଚାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ହାର୍ଦ୍ଦିକ ଏବଂ ଶିବମ ଉଭୟ ୫୩ ରନ୍ ଲେଖାଁଏ ସ୍କୋର କରିଥିଲେ। ଇଂଲଣ୍ଡ ପକ୍ଷରୁ ଭଲ ବୋଲିଂ କରି ସାକିବ ମହମୁଦ ତିନୋଟି, ଜେମି ଓଭରଟନ୍ ଦୁଇଟି ଏବଂ ବ୍ରାଇଡନ୍ କାର୍ସେ ଏବଂ ଆଦିଲ ରସିଦ ଗୋଟିଏ ଲେଖାଏଁ ୱିକେଟ୍ ନେଇଥିଲେ।
