Subarnapur News: ବୋହୂକୁ ବଞ୍ଚାଇବାକୁ ଯାଇ ପୁଅଠୁ ଗୁଳି ଖାଇଲା ବାପା, ସଙ୍କଟାପନ୍ନ ଅବସ୍ଥାରେ ମେଡିକାଲରେ ଭର୍ତ୍ତି

Subarnapur News In Odia: ପୁଅ ଭୁଲିଗଲା ରକ୍ତ ସମ୍ପର୍କ। ବାପାକୁ ଗୁଳି କଲା ପୁଅ (man injured after being shot at by his son)। ନିଶାସକ୍ତ ଅବସ୍ଥାରେ ଘଟାଇଲା ଏଭଳି ଅଭାବନୀୟକାଣ୍ତ । ମହଙ୍ଗା ପଡ଼ିଲା ପୁଅ -ବୋହୂ କଳହ ସମାଧାନ। ଯାଇଥିଲେ ସମାଧାନ କରିବାକୁ ହେଲେ ଗୁଳି ଖାଇ ମେଡିକାଲ୍‌ରେ ଭର୍ତ୍ତି ହେଲେ। ନିଶାସକ୍ତ ପୁଅର ଗୁଳିରେ ଆହତ ହୋଇଛନ୍ତି ବାପା। ସୁବର୍ଣ୍ଣପୁର (Subarnapur)ଜିଲ୍ଲା ଡୁଙ୍ଗୁରିପାଲି ବ୍ଲକ୍‌ ଅନ୍ତର୍ଗତ ଚିନାଜୁରୀ ଗାଁରେ ଏହି ଘଟଣା ଘଟିଛି।

ସୂଚନା ଅନୁସାରେ, କୌଣସି କାରଣକୁ ନେଇ ଗଙ୍ଗାଜଳ ମେହରଙ୍କ ପୁଅ ବିକ୍ରମ ମେହର ନିଶାସକ୍ତ ଅବସ୍ଥାରେ ସ୍ତ୍ରୀଙ୍କ ସହ ଝଗଡ଼ା କରୁଥିଲେ। ଏହି ସମୟରେ ସ୍ତ୍ରୀକୁ ଚଢେଇମରା ବନ୍ଧୁକରେ ଗୁଳି ମାରିବା ଲାଗି ବିକ୍ରମ ବାହାରି ଥିଲେ। ଏଥିରେ ଗଙ୍ଗାଜଳ ହସ୍ତକ୍ଷେପ କରିବା ସହ ବୋହୂକୁ କାହିଁକି ଗୁଳି ମାରିବୁ ମୋତେ ଗୁଳି ମାରିଦେ ବୋଲି କହିଥିଲେ । ଏ-ହି ସମୟରେ ନିଶାସକ୍ତ ଅବସ୍ଥାରେ ଥିବା ବିକ୍ରମ, ଗଙ୍ଗାଜଳଙ୍କୁ ଗୁଳି ମାରି ଦେଇଥିଲେ। ତାଙ୍କ ଶରୀରରେ ଗୁଳି ବାଜିଛି। ଗୁରୁତର ଅବସ୍ଥାରେ ଗଙ୍ଗାଜଳଙ୍କୁ ପରିବାର ଲୋକେ ଉଦ୍ଧାର କରି ଡୁଙ୍ଗୁରିପାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବୁର୍ଲା ବୀର ସୁରେନ୍ଦ୍ର ସାଏ ବଡ଼ ମେଡିକାଲକୁ ସ୍ତାନାନ୍ତରିତ କରାଯାଇଛି। ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । କେଉଁ ପରିସ୍ଥିତିରେ ଏଭଳି ଘଟଣା ଘଟିଲା ସେନେଇ ତଦନ୍ତ ଜାରି ରଖିଛି । 

ନିକଟରେ ଏଭଳି ଏକ ସମାନ ଘଟଣା ଦେଖିବାକୁ ମିଳିଥିଲା ମୟୂରଭଞ୍ଜରେ । ସାମାନ୍ୟ ବଚସାକୁ କେନ୍ଦ୍ରକରି ନିଶାସକ୍ତ ପୁଅର ଗୁଳିମାଡ଼ରେ ବାପାର ପ୍ରାଣ ଯାଇଛି। ମୟୂରଭଞ୍ଜ ଜିଲ୍ଲା ଉଦଳା ବ୍ଲକ୍‌ ପାଟ୍ଟଶାଣୀପୁର ପଞ୍ଚାୟତ କାଶୀକୁଣ୍ଡଳ ଗ୍ରାମରେ ଘଟିଛି ଏହି ଘଟଣା। ପାରିବାରିକ କଳହକୁ ନେଇ ଗ୍ରାମର ତ୍ରିଲୋଚନ ନାଏକ (୪୫) ଓ ପୁଅ କୈଳାସ (୨୦)ଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ତେବେ, ମଦ ନିଶାରେ ଚୁର୍‌ ଥିବା ପୁଅ କୈଳାସ ଏଥିରେ ଉତ୍‌କ୍ଷିପ୍ତ ହୋଇ ଘରେ ଲୁଚାଇ ରଖିଥିବା ଏକ,ଦେଶୀ ବନ୍ଧୁକ ଆଣି ବାପା ଉପରକୁ ଗୁଳି ଚଳାଇଥିଲା। ଗୁଳିଟି ତ୍ରିଲୋଚନଙ୍କ ବେକ ତଳେ ବାଜି ଶରୀର ଭେଦ କରିଯାଇଥିବାବେଳେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ସେ ଘଟଣାସ୍ଥଳରେ ଟଳି ପଡ଼ିଥିଲେ। ଗୁଳି ଫୁଟିବା ଶବ୍ଦ ଶୁଣି ଆଖପାଖ ଲୋକେ ତା‌ଙ୍କ ଘରକୁ ଦୌଡ଼ି ଆସିଥିଲେ। 

ଅଭିଯୁକ୍ତ କୈଳାସ ସେମାନଙ୍କୁ ବନ୍ଧୁକ ଦେଖାଇ ଧମକ ଦେବା ସହ ନିଜ ସ୍ତ୍ରୀକୁ ଧରି ଫେରାର୍ ହୋଇ ଯାଇଥିଲା। ଘଟଣାସ୍ଥଳଟି ଶିମିଳିପାଳ ପାଦଦେଶରେ ଘଟିଥିବାରୁ ଉଦଳା ପୋଲିସ ରାତି ତମାମ ନିକଟସ୍ଥ ଜଙ୍ଗଲରେ ଖୋଜାଖୋଜି କରିଥିଲେ ବି କୈଳାସର କୌଣସି ସନ୍ଧାନ ମିଳିନଥିଲା। ତେବେ, ପରଦିନ ବଡ଼ସାହି ଥାନା ଚମ୍ପାଗଡ଼ ଗାଁ ପାଖ ଲୋଧାସାହି ଜଙ୍ଗଲରେ ସେ ଲୁଚିଥିବା ବେଳେ ତାକୁ ମାଡ଼ି ବସିଥିଲା ପୋଲିସ। ଏ-ନେଇ ଏକ ମାମଲା ରୁଜୁ କରି ପୋଲିସ ଅଭିଯୁକ୍ତ ଠାରୁ ବନ୍ଧୁକକୁ ଜବତ କରିଛି।