ગુજરાતના વાતાવરણમાં આવશે પલટો, ઠંડી સાથે માવઠાની પણ આગાહી, નોંધી લો તારીખ

રાજ્યમાં પવનની દિશા બદલાવાને કારણે લોકોને ઠંડીથી થોડી રાહત મળે છે. પરંતુ જાન્યુઆરીના બાકી દિવસોમાં રાજ્યનું હવામાન કેવું રહેશે તેની આગાહી હવામાન નિષ્ણાંત અંબાલાલ પટેલે કરી છે.  

જાન્યુઆરીના અંતમાં ગુજરાતના વાતાવરણમાં મોટો પલટો આવવાનો છે. જાણીતા હવામાન નિષ્ણાત અંબાલાલ પટેલે ફરી એકવાર ભરશિયાળે કમોસમી વરસાદની આગાહી કરી છે. અંબાલાલ પટેલે કહ્યું કે, રાજ્યમાં ઠંડીનો ચમકારો વધ્યો છે. પવન સાથે ઠંડીનો અનુભવ થઈ રહ્યો છે. પરંતું આ વચ્ચે 22 જાન્યુઆરી સુધીમાં કેટલાક જિલ્લાઓમાં છુટાછવાયા વરસાદની આગાહી છે. આગામી બે દિવસ વધુ ઠંડી પડે તેવી આગાહી તેમણે કરી છે. 

હવામાન નિષ્ણાંત અંબાલાલ પટેલે કહ્યુ કે 27થી 29 જાન્યુઆરી દરમિયાન વાદળછાયુ વાતાવરણ રહી શકે છે અને કેટલાક ભાગમાં માવઠાની શક્યતા છે. 

અંબાલાલ પટેલે કહ્યું કે અરબી સમુદ્ર અને બંગાળની ખાડીમાં ભેજને કારણે 21 જાન્યુઆરીથી 30 જાન્યુઆરી સુધી હવામાનમાં પલટો આવી શકે છે. કેટલીક જગ્યાએ હળવા છાંટા કે વરસાદ પડી શકે છે. 24 જાન્યુઆરીથી ફરી ઠંડી વધી શકે છે.  

હવામાન વિભાગની આગાહી પ્રમાણે રાજ્યમાં આગામી સાત દિવસ હવામાન શુષ્ક રહેવાનું છે. લઘુત્તમ તાપમાનમાં બે-ત્રણ ડિગ્રી જેટલો વધારો થઈ શકે છે. આ સિવાય તાપમાનમાં કોઈ મોટો ફેરફાર તવાનો નથી. ઉત્તર ભારતમાં બનેલા વેસ્ટર્ન ડિસ્ટર્બન્સની અસર રાજ્યના હવામાન પર થઈ શકે છે.