નર્મદા કાંઠે કુંભ જેવો નજારો! મા રેવાને અર્પણ કરાઈ 1500 ફૂટ લાંબી ચુંદડી

જેના દર્શન માત્રથી પવિત્ર થવાય એવી પુણ્ય સલિલા મા નર્મદા, નર્મદા જિલ્લામાંથી પસાર થતી હોવાથી નર્મદા તટના ગામે નર્મદા જયંતીએ નર્મદા જિલ્લામાં ભારે શ્રધ્ધા અને ભક્તિભાવપૂર્વક ઉજવણી કરાઇ હતી. આજે માં નર્મદાનો પ્રાગટ્ય દિવસ હોવાથી નર્મદા જયંતિ  સમસ્ત માંગરોળ ગ્રામજનો દ્વારા ભારે શ્રદ્ધા અને ભક્તિભાવપૂર્વક ઉજવાઈ હતી. 

નર્મદા કાંઠે હોડીઓને વિશેષ રીતે શણગારવામાં આવી, જેમાં એક મોટી નાવડી અને 10 હોડીઓનો કાફલો સાડીને સામે કિનારે લઈ જઈ બેઉ કિનારે પહોંચી 1500 ફૂટ સાડી નર્મદાને મૈયાને અર્પણ કરાઈ હતી. આમ નર્મદે હરના નામથી નર્મદા કાંઠો ગુંજી ઉઠ્યો હતો. નર્મદા જયંતિની ઉજવણી માટે નર્મદા તટે નર્મદા સ્નાન અને નર્મદા પૂજનનું પણ વિશેષ ધાર્મિક મહત્વ હોવાથી ભક્તજનોએ દીવડા પ્રગટાવી નર્મદા સ્નાનનનો પણ લ્હાવો લીધો હતો.

આજે નર્મદા જયંતિએ નાંદોદ તાલુકાના માંગરોળ ગામે ગ્રામજનો અને ભક્તો દ્વારા 1500 ફૂટ (500મીટર) સાડી (ચૂંદડી)નર્મદા મૈયાને અર્પણ કરવાનો વિશેષ કાર્યક્ર્મ યોજ્યો હતો. વાજતે ગાજતે ગામમા ભવ્ય શોભાયાત્રા નીકળી હતી. કળશ કન્યા, મહિલા મંડળની બહેનો સહીત ગ્રામજનો મોટી સંખ્યામાં જોડાયા હતા. જેમાં ખાસ સુરતથી મોટા તાકામાં મંગાવેલી સાડીનો મોટો રોલ બનાવી બહેનો તથા ગ્રામજનોએ હાથમાં સાડી પકડી નર્મદા કિનારે પહોંચ્યા હતા. 10થી 12 જેટલી નાવડીઓની મદદથી આ કિનારેથી બીજા કિનારે સાડીનો છેડો પહોંચાડી 1500ફૂટ સાડી નર્મદા મૈયાને અર્પણ કરી હતી. નર્મદા જયંતીની અનોખી વિશેષ ઉજવણી કરી હતી. એ ઉપરાંત નર્મદા પૂજન, કન્યાપૂજન, સાડી પૂજન બાદ આરતીપૂજન પણ કરાયા બાદ દીવડા પ્રગટાવી નર્મદામાં છોડવામાં આવ્યાં હતા 

1500 ફૂટ ની 100 જેટલી સાડીનો તાકો સુરત થી લાવવામાં આવ્યો હતો. જેને મોટા રોલ સ્વરૂપે વિટાળવામાં આવ્યો હતો. સાડી અર્પણ કર્યા બાદ આ સાડી પ્રસાદી રૂપે ગામની મહિલાઓને વિતરીત કરવામાં આવી હતી.