Gujarat Tableau: ગુજરાતનો ટેબ્લો ફરી નંબર 1 બન્યો, સતત ત્રીજા વર્ષે જીતની હેટ્રિક લગાવી

મુખ્યમંત્રી ભૂપેન્દ્ર પટેલે છેલ્લા ત્રણ વર્ષથી પોપ્યુલર ચોઈસ કેટેગરીમાં ગુજરાતના ટેબ્લોને પ્રથમ સ્થાન પ્રાપ્ત કરવાની ગૌરવપૂર્ણ સિદ્ધિ બદલ ગુજરાતના તમામ નાગરિકોને હૃદયપૂર્વક અભિનંદન અને આભાર વ્યક્ત કર્યો હતો. તેમણે વિશ્વાસ વ્યક્ત કર્યો હતો કે ગુજરાત જનભાગીદારીથી 'વિકાસ પણ, હેરિટેજ પણ'ના વડાપ્રધાનના મંત્રને સાકાર કરી રહ્યું છે અને ભવિષ્યમાં પણ અગ્રેસર રહેશે.

દિલ્હીમાં ગણતંત્ર દિન પરેડમાં ગુજરાતની ટેબ્લોએ સતત ત્રીજા વર્ષે ‘પોપ્યુલર ચોઈસ’ કેટેગરીમાં એવોર્ડ જીત્યો છે. ગુજરાત સરકારના માહિતી નિયામક KL બાચાની જણાવ્યું કે, સતત ત્રીજા વર્ષે ગુજરાતે આ પુરસ્કાર મેળવ્યો છે. PM મોદીના સંકલ્પને આગળ વધારતા, ગુજરાતના મુખ્યમંત્રી ભૂપેન્દ્ર પટેલના માર્ગદર્શન હેઠળ આ ટેબ્લો તૈયાર કરવામાં આવ્યો હતો. વડનગરમાં આવેલા કીર્તિ તોરણથી લઈને 21મી સદીની સ્ટેચ્યુ ઓફ યુનિટી સુધી, અમે ગુજરાતના વિકાસને દર્શાવવા પ્રયત્ન કર્યો. સાથે જ સાણંદમાં વિકસિત થતું સેમી-કન્ડક્ટર હબ, અટલ બ્રિજ વગેરે પણ દર્શાવ્યાં."

ઉલ્લેખનીય છે કે, 76માં પ્રજાસત્તાક દિવસની રાષ્ટ્રીય પરેડમાં નવી દિલ્હીમાં ડ્યુટી રૂટ પર વિવિધ રાજ્યો અને સરકારના વિવિધ મંત્રાલયો અને વિભાગોની 31 ઝાંખીઓ રજૂ કરવામાં આવી હતી. ગુજરાત રાજ્યના માહિતી વિભાગ દ્વારા રજૂ કરાયેલા ટેબ્લોમાં વડાપ્રધાન નરેન્દ્ર મોદીની પ્રેરણા અને માર્ગદર્શન હેઠળ ગુજરાતના આધુનિક વિકાસની ગાથા તેના પ્રાચીન વારસાની સાથે રજૂ કરવામાં આવી હતી.

ગુજરાત સરકારના માહિતી વિભાગ દ્વારા આ પરેડમાં રજૂ કરવામાં આવેલ ટેબ્લો - 'ગુજરાત: આનર્તપુરથી એકતા નગર - વિકાસના વારસાનો અદ્ભુત સંગમ' ને લોકો તરફથી સૌથી વધુ મત મળ્યા છે. મોટી સંખ્યામાં વોટ સાથે, ગુજરાતની ઝાંકી સતત ત્રીજા વર્ષે પોપ્યુલર ચોઈસ કેટેગરીમાં પ્રથમ ક્રમે રહી છે.

ગુજરાતના ટેબ્લોએ 2023ની 74મી પ્રજાસત્તાક દિવસની પરેડથી પોપ્યુલર ચોઈસ કેટેગરી એવોર્ડમાં ટોચ પર રહેવાની પરંપરા શરૂ કરી છે. તે પરેડમાં, રાજ્ય સરકારે 'ક્લીન-ગ્રીન એનર્જી યુક્ત ગુજરાત' ની થીમ પર આધારિત ઝાંખીમાં પુનઃપ્રાપ્ય ઉર્જાનો મહત્તમ ઉપયોગ કરવાના વડા પ્રધાનના આહવાનને સાકાર કરવા ગુજરાતની પહેલ રજૂ કરી હતી.

ગયા વર્ષે એટલે કે 2024ના 75મા પ્રજાસત્તાક દિવસની રાષ્ટ્રીય પરેડમાં ગુજરાત દ્વારા રજૂ કરાયેલ ‘ધોરડો, વર્લ્ડ બેસ્ટ ટુરિઝમ વિલેજ – UNWTO’ થીમ પર આધારિત ટેબ્લોએ પણ પોપ્યુલર ચોઈસ કેટેગરીમાં પ્રથમ સ્થાન મેળવ્યું હતું. એટલું જ નહીં, ગુજરાતના આ ટેબ્લોએ 2024માં શ્રેષ્ઠ ટેબ્લો માટે જજ-જ્યુરીની પસંદગીની પેનલમાં બીજું સ્થાન પણ મેળવ્યું હતું. આ જ પરંપરામાં વધુ એક સિદ્ધિ હાંસલ કરતાં ગુજરાતના ટેબ્લોએ 76માં પ્રજાસત્તાક દિવસની રાષ્ટ્રીય પરેડમાં સતત ત્રીજી વખત પ્રથમ સ્થાન મેળવીને હેટ્રિક ફટકારવાનું ગૌરવ પ્રાપ્ત કર્યું છે.