શું વાત છે! ખાનગી નહિ, ગુજરાતની આ સરકારી શાળામાં એડમિશન લેવા માટે થાય છે પડાપડી

રાજકોટના નાના માવા રોડ પર આવેલ મોકાજી સર્કલ નજીક આવેલ શાળા નંબર ૯૩ શ્રીવિનોબા ભાવે પ્રાથમિક શાળા કે જે ખાનગી શાળાને પણ ટક્કર આપે તે પ્રકારની ત્યાં સુવિધાઓ તેમજ શિક્ષણ આપવામાં આવી રહ્યું છે. આ શાળામાં નવા એડમિશન લેવા માટે મોટી સંખ્યામાં વાલીઓ આવી રહ્યાં છે. 

અહીંયા વાલીઓ પહેલા કે બીજા ધોરણમાં પ્રવેશ માટે આવે છે. પરંતુ 2 થી 8 ધોરણમાં પણ એડમિશન લેવા માટે વાલીઓ આવી રહ્યાં છે. આ વર્ષે નવા પ્રવેશની સંખ્યામાં વધારો થયો છે. પહેલા ધોરણના ક્લાસમાં એટલે કે બાલવાટીકા ક્લાસમાં 35થી 40 વિદ્યાર્થીઓની સંખ્યા થઈ ગઈ છે. 

શાળાના પ્રિન્સીપાલ વનીતાબેન રાઠોડ જણાવે છે કે, વેકેશન દરમિયાન પણ દર બુધવારે શાળા ચાલુ રહેતી હતી. જેથી 2થી 8 ધોરણમાં 60 જેટલા નવા એડમિશન થયા છે. આ શાળામાં એડમિશન લેવા પાછળ ઘણા બધા કારણો જવાબદાર છે. જેમ કે આ શાળા PMC શાળા છે. 

આખા રાજકોટ કોર્પોરેશનમાં PMCમાં પસંદ થયેલી આ શાળા છે. PMC શાળામાં ઘણા બધા લાભ છે. જેમ કે આ શાળામાં વિદ્યાર્થીઓને ટ્રાન્સપોર્ટેશન મળે છે, યુનિફોર્મ, સ્કુલ બેગ, ત્રણ પ્રવાસ સહિતની સુવિધા પુરી પાડવામાં આવે છે. શાળામાં બાસ્કેટ બોલનું ગ્રાઉન્ડ,એથ્લેટિક્સ સહિતની સુવિધા છે

શ્રી વિનોબા ભાવે પ્રાથમિક શાળામાં સાયન્સ કોર્નર, મેથ્સ કોર્નર અને વિજ્ઞાન પ્રદર્શન સહિતની અલગ અલગ એક્ટીવીટી કરાવવામાં આવે છે. તેમજ તેના વર્ગખંડો પણ અલગ છે.

આ સાથે જ આ શાળામાં ભણતા વિદ્યાર્થીઓને દુરદર્શન અને રેડિયોમાં પ્રસારિત થતા કાર્યક્રમોમાં ભાગ લેવા માટે મોકલવામાં આવે છે. જેથી બાળકોનો વિકાસ ખુબ સારી રીતે થાય છે. આ તમામ પ્રવૃતિઓ ખુબ જ સારી રીતે કરવામાં આવતી હોવાથી વાલીઓ હવે રાજકોટની સરકારી શ્રી વિનોબા ભાવે પ્રાથમિક શાળા તરફ વળ્યાં છે.