રાજકોટ સાથે જોડાયેલી છે 'કેપ્ટન કુલ' ધોનીની અનેક યાદો, જુઓ તસવીરો

મહેન્દ્ર સિંહ ધોનીએ રાજકોટમાં પોતાના કરિયરની પ્રથમ મેચ 2008મા ઈંગ્લેન્ડ સામે રમી હતી. આ મેચમાં ધોનીએ 32 બોલમાં 39 રન બનાવ્યા હતા. ભારતે આ મેચમાં 387 રન બનાવ્યા હતા. જેના જવાબમાં ઈંગ્લેન્ડની ટીમ માત્ર 229 રનમાં ઓલઆઉટ થઈ ગઈ હતી.   

તો આ મેચમાં સદી ફટકારનાર યુવરાજ સિંહને મેન ઓફ ધ મેચના એવોર્ડમાં એક બાઇક મળી હતી. ત્યારે ધોનીએ મેચ પૂરી થયા બાદ મેદાનમાં યુવરાજની સાથે બાઇક પર સવારી કરી હતી. ધોની બાઇક ચલાવતો હતો અને યુવરાજ પાછળ બેઠો હતો. રાજકોટવાસીઓના મનમાં આજે પણ આ તસવીર જીવંત છે. 

ત્યારબાદ ધોની બીજીવાર રાજકોટના મેદાનમાં વર્ષ 2009મા શ્રીલંકા સામે ઉતર્યો હતો. આ મેચમાં ભારતે 414 રનનો વિશાળ સ્કોર બનાવ્યો હતો. તે મેચમાં ધોનીએ 53 બોલમાં 3 સિક્સ અને 5 ચોગ્ગા સાથે શાનદાર 71 રનની ઈનિંગ રમી હતી. આ મેચમાં ભારતનો ત્રણ રને વિજય થયો હતો.   

વર્ષ 2015મા ધોનીએ દક્ષિણ આફ્રિકા સામે રાજકોટના મેદાનમાં વનડે મેચ રમી હતી. આ મેચમાં ધોનીએ 61 બોલમાં 47 રન બનાવ્યા હતા. ધોનીની બેટિંગ દરમિયાન તેના હાથમાંથી બેટ પણ છૂટી ગયું હતું. આ મેચમાં જરૂર ભારતનો પરાજય થયો પરંતુ ધોનીની નિવૃતી બાદ શહેરના લોકો કેપ્ટન કુલને યાદ કરીને શહેર સાથે જોડાયેલી તેની સ્મૃતિઓ વાગોળી રહ્યાં છે.