Top 10 News: ମୁଖ୍ୟମନ୍ତ୍ରୀଙ୍କୁ ବୈଦେଶିକ ମନ୍ତ୍ରୀଙ୍କ ପ୍ରଶଂସା ଖବର ସହ ଅନ୍ୟାନ୍ୟ ଅପଡେଟ୍

Top 10 News Today: ରାଜ୍ୟ ତଥା ଦେଶ ବିଦେଶର ସବୁ ବଡ଼ ଖବର ପଢନ୍ତୁ ଚୁଟକୀରେ

Top 10 News Today

Headlines 01- ଲୋକସଭାରେ ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପିତ ହୋଇଯାଇଛି । ୨୦୨୪-୨୫ର ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପନ କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ୨୦୨୬ରେ ଜିଡିପି ଅଭିବୃଦ୍ଧି ୬.୩%ରୁ ୬.୮% ମଧ୍ୟରେ ରହିବା ଆକଳନ କରାଯାଇଛି । ଅଧିବେଶନ ଆରମ୍ଭରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଭୟ ଗୃହକୁ ସମ୍ବୋଧନ କରିଛନ୍ତି। ଆରମ୍ଭରୁ ସେ ମହାକୁମ୍ଭ ମେଳାରେ ହୋଇଥିବା ଅଘଟଣକୁ ନେଇ ଦୁଃଖ ପ୍ରକାଶ କରିଥିଲେ। ଏହା ସହିତ ଆହତଙ୍କ ଆଶୁ ଆରୋଗ୍ୟ କାମନା କରିଥିଲେ। ଏହା ସହିତ ସରକାରଙ୍କ କାର୍ଯ୍ୟ ଉପରେ ନିଜର ଅଭିଭାଷଣ ମାଧ୍ୟମରେ ସୂଚନା ପ୍ରଦାନ କରିଥିଲେ। ଆସନ୍ତାକାଲି ବଜେଟ ଉପସ୍ଥାପନ ହେବାକୁ ଥିବାରୁ ଏହି ରିପୋର୍ଟ ଭାରତର ଅର୍ଥନୀତି ଏବଂ ସରକାରଙ୍କ ନୀତି ଆଗାମୀ ବର୍ଷରେ କିପରି ରହିବ ତାହାକୁ ସ୍ପଷ୍ଟ କରିଛି। ଏହି ରିପୋର୍ଟରେ ମୋଦୀଙ୍କ ତୃତୀୟ ଥରର ସରକାର ସମୟରେ ନିର୍ମାଣ ଶିଳ୍ପରେ ନିଯୁକ୍ତାତ୍ମକ ପ୍ରଗତି ସ୍ପଷ୍ଟ କରାଯାଇଛି।

Headlines 02- ବଜେଟ୍ ଅଧିବେଶନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମା' ଲକ୍ଷ୍ମୀଙ୍କ ବନ୍ଦନା ପଢିବା ପରେ ସମ୍ବୋଧନ ଦେଇ କହିଛନ୍ତି ଯେ,  ସବୁ ଗରିବ ଓ ମଧ୍ୟବିତ୍ତଙ୍କ ପ୍ରତି ମା' ଲକ୍ଷ୍ମୀଙ୍କ କୃପା ସର୍ବଦା ରହିଥାଉ । ମା' ଲକ୍ଷ୍ମୀଙ୍କ କୃପାରୁ ଆର୍ଥିକ କ୍ଷେତ୍ରରେ ଅଗ୍ରସର ହେଉ । ଏଥର ଦେଶବାସୀ ୩ ଥର ପାଇଁ ମୋତେ ଦାୟିତ୍ବ ଦେଇଛନ୍ତି । ଏହି କାର୍ଯ୍ୟକାଳରେ ଏହା ପୂର୍ଣ୍ଣ ବଜେଟ୍ ହେବ । ସ୍ବାଧିନତାର ଶହେ ବର୍ଷ ପୂର୍ତ୍ତିରେ ବିକଶିତ ଭାରତ ନୂଆ ଉର୍ଜା ଦେଖିବ । ଏ ବର୍ଷର ବଜେଟ ନୂଆ ଉର୍ଜା ସହ ଐତିହାସିକ ହେବ ବୋଲି ପ୍ରଧାନମନ୍ତ୍ରୀ କହିଥିଲେ ।

Headlines 03- ରାଷ୍ଟ୍ରପତିଙ୍କ ଅଭିଭାଷଣକୁ ନେଇ ସୋନିଆ ଗାନ୍ଧୀଙ୍କ ବିବାଦୀୟ ମନ୍ତବ୍ୟ ଦେଇଛନ୍ତି । ରାଷ୍ଟ୍ରପତିଙ୍କୁ 'POOR LADY' ବୋଲି କହିଥିଲେ ସୋନିଆ ଗାନ୍ଧୀ । ଭାଷଣ ବୋରିଂ ଏବଂ 'POOR LADY' କହିବା ସହ ତାଚ୍ଛଲ୍ୟ କରିଥିଲେ ସୋନିଆ । ଅଭିଭାଷଣ ପଢ଼ି ରାଷ୍ଟ୍ରପତି ଶେଷରେ ଥକି ଯାଇଥିବା ସୋନିଆ କହିବା ପରେ ସାରା ଦେଶରୁ ବିଭିନ୍ନ ପ୍ରତିକ୍ରିୟା ସାମ୍ନାକୁ ଆସିଛି । ସୋନିଆଙ୍କ ନିକଟରୁ କ୍ଷମା ପ୍ରାର୍ଥନା ଦାବି କରିଛନ୍ତି ସମ୍ବିତ ପାତ୍ର।

Headlines 04- ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ପ୍ରଶଂସା କରିଛନ୍ତି । ପ୍ରବାସୀ ଭାରତୀୟ ଦିବସ ସଫଳତାର ସହ ଆୟୋଜନ ପାଇଁ ଚିଠି ଲେଖି ପ୍ରଶଂସା କରିଛନ୍ତି ବୈଦେଶିକ ମନ୍ତ୍ରୀ ଏସ୍‌. ଜୟଶଙ୍କର । ପ୍ରବାସୀ ଭାରତୀୟ ଦିବସରେ ଯୋଗ ଦେଇଥିବା ପ୍ରବାସୀ ପଜିଟିଭ୍ ଫିଡବ୍ୟାକ୍ ଦେଇଛନ୍ତି ଏବଂ ରାଜ୍ୟ ସରକାରଙ୍କ ଆତିଥେୟତାକୁ ନେଇ ଖୁବ ଭଲ କଥା କହିଥିବା କୁହାଯାଇଛି ।

Headlines 05- ୱାଶିଂଟନ ନିକଟସ୍ଥ ରୋନାଲ୍ଡ ରିଗାନ ଜାତୀୟ ବିମାନବନ୍ଦରରେ ଅବତରଣ କରିବା ସମୟରେ ୬୦ ଜଣ ଯାତ୍ରୀ ଏବଂ ଚାରି ଜଣ କ୍ରୁ ସଦସ୍ୟଙ୍କୁ ନେଇ ଯାଉଥିବା ଏକ ଆମେରିକୀୟ ଏୟାରଲାଇନ୍ସର ବିମାନ ଏକ ସେନା ହେଲିକପ୍ଟର ସହିତ ଧକ୍କା ହୋଇଥିଲା। ଉଦ୍ଧାର କାର୍ଯ୍ୟ ସମୟରେ ପୋଟୋମାକ ନଦୀର ବରଫାବୃତ ପାଣିରୁ ଅତି କମରେ ୨୮ ଜଣଙ୍କ ମୃତଦେହ ବାହାର କରାଯାଇଥିଲା। ରାଷ୍ଟ୍ରପତି ଟ୍ରମ୍ପ କହିଛନ୍ତି ଯେ ଏହା ଆମେରିକା ପାଇଁ ଏକ "ଦୁଃଖଦ ମୁହୂର୍ତ୍ତ"।

Headlines 06- ରାଜ୍ୟ ମୁଖ୍ୟ ନିର୍ବାଚନ କମିଶନର ଭାବେ ଦାୟିତ୍ବ ନେଇଛନ୍ତି ମଧୁସୂଦନ ପାଢ଼ୀ । ଦାୟିତ୍ବ ନେବା ପରେ ପ୍ରତିକ୍ରିୟା ଦେଇ ସେ କହିଛନ୍ତି ଯେ, ନିର୍ବାଚନକୁ ଶୃଙ୍ଖଳିତ ଓ ସୁରୁଖୁରୁରେ ସମାପନ ଗୁରୁଦାୟିତ୍ବ ହେବ । ରାଜ୍ୟରେ ନିରପେକ୍ଷ ନିର୍ବାଚନକୁ ପ୍ରାଥମିକତା ଦେବି ଏବଂ କମ୍ ସମୟ ଥିବାରୁ ଏବେଠୁ କାର୍ଯ୍ୟ ଆରମ୍ଭ କରିବି ।

Headlines 07- କେନ୍ଦୁଝର ଜିଲ୍ଲାରେ ମିଳିଛି ସୁନାଖଣି ସନ୍ଧାନ ! ବାଂଶପାଳ ବ୍ଲକ ତରମାକାନ୍ତ ପଞ୍ଚାୟତ ଜଳଡିହା ଗାଁରେ ସୁନାଖଣି ଥିବା ନେଇ ଅନୁମାନ କରାଯାଉଛି । ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ ତରଫରୁ ଦ୍ବିତୀୟ ପର୍ଯ୍ୟାୟ ସର୍ଭେ କାମ ଆସନ୍ତା ମାର୍ଚ୍ଚ ମାସରେ ଶେଷ ହେଉଥିବା ବେଳେ ଏଠାରୁ ସଂଗୃହୀତ ସୁନାର ନମୂନା ଅତ୍ୟନ୍ତ ଉଚ୍ଚମାନର ବୋଲି ଜଣାପଡିଛି। ଏହି ନମୂନା ଭୁବନେଶ୍ବର ପରୀକ୍ଷାଗାରକୁ ଯିବା ପରେ ଏଠାରେ ସୁନାଖଣି ପ୍ରତିଷ୍ଠା ହେବା ନେଇ ସରକାର ନିଷ୍ପତ୍ତି ନେବେ ବୋଲି ଜଣାପଡିଛି। ଯାହାକୁ ନେଇ ଅଞ୍ଚଳବାସୀ ଖୁସିବ୍ୟକ୍ତ କରିଛନ୍ତି। 

Headlines 08- ବାସୁଦେବପୁର ନାୟକାଣୀଡ଼ିହି ଥାନା ଚାରବାଟିଆ ଉଚ୍ଚ ପ୍ରାଥମିକ ବିଦ୍ୟାଳୟରୁ ଚୋରି ଅଭିଯୋଗ ସାମ୍ନାକୁ ଆସିଛି । ସ୍କୁଲ ଘର ତାଲା ଭାଙ୍ଗି ମଧ୍ୟାହ୍ନ ଭୋଜନ ଚାଉଳ ଚୋରି ହୋଇଛି । ପ୍ରାୟ ୧୫ କ୍ବିଣ୍ଟାଲ ଚାଉଳ ଚୋରି ହୋଇଥିବା କୁହାଯାଉଛି । ଘଟଣା ସାମ୍ନାକୁ ଆସିବା ପରେ ସାଧାରଣ ଲୋକେ ଖୁବ ଆଶ୍ଚର୍ଯ୍ୟପ୍ରକାଶ କରିବା ସହ ପ୍ରଶ୍ନ ଉଠାଇଛନ୍ତି ।

Headlines 09- ବରଗଡ଼ +୩ ପ୍ରଶ୍ନପତ୍ର ଲିକ୍‌ ମାମଲାରେ ୧୨ ଜଣଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତଙ୍କ ମଧ୍ୟରେ ୧୦ ଜଣ କଲେଜ ଛାତ୍ର ଥିବା ସୂଚନା ମିଳିଛି । ଜଣେ କମ୍ପ୍ୟୁଟର ଦୋକାନୀ ସହ ଜଣେ କିରାଣୀ ମଧ୍ୟ ଗିରଫ ହୋଇଛନ୍ତି । ଗିରଫ କିରାଣୀ ନାକଟିଦେଉଳ ମହାବିଦ୍ୟାଳୟର ହୋଇଥିବା ସୂଚନା ମିଳିଛି ।

Headlines 10- ବାରବାଟୀ ଷ୍ଟାଡିୟମ୍‌ର ପୁନରୁଦ୍ଧାର ଓ ସଂପ୍ରସାରଣ କରାଯିବ ବୋଲି ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ଏନେଇ ସୂଚନା ଦେଇଛନ୍ତି OCA ସମ୍ପାଦକ ।  ଡିପିଆର୍ ପ୍ରସ୍ତୁତ କରି ସରକାରଙ୍କୁ ଦେବାକୁ ମୁଖ୍ୟମନ୍ତ୍ରୀ କହିଛନ୍ତି । ଷ୍ଟାଡିୟମ୍‌ରେ କ୍ରିକେଟ ସହ ଅନ୍ୟ ଖେଳର ବିକାଶ ମଧ୍ୟ କରାଯିବ । ବାରବାଟୀ ଦିନିକିଆ ପୂର୍ବରୁ ଷ୍ଟାଡିୟମର ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କ୍ରୀଡାମନ୍ତ୍ରୀ ସୂର୍ଯ୍ୟବଂଶୀ ସୂରଜ। ୯ ତାରିଖରେ ହେବାକୁ ଥିବା ମ୍ୟାଚ୍ ପାଇଁ ପ୍ରସ୍ତୁତିକୁ ନେଇ ସମୀକ୍ଷା କରାଯାଇଛି । ସମୀକ୍ଷା ପରେ ପ୍ରସ୍ତୁତିକୁ ନେଇ ସନ୍ତୋଷଜନକ କହିଛନ୍ତି ମୁଖ୍ୟମନ୍ତ୍ରୀ ।