Subrata Roy Passes Away: ଆରପାରିରେ ସୂବ୍ରତ ରାୟ; ୭୫ ବର୍ଷରେ ନେଲେ ଶେଷ ନିଶ୍ୱାସ

Sahara Group Chairman Subrata Roy: ନଭେମ୍ବର ୧୪ ତାରିଖ ମଙ୍ଗଳବାର ମୁମ୍ବାଇ ଠାରେ ଶେଷ ନିଶ୍ୱାସ ତ୍ୟାଗ କରିଛନ୍ତି ସାହାରା ଗ୍ରୁପ ମୁଖ୍ୟ ସୁବ୍ରତ ରାୟ।

Sahara Group Founder Subrata Roy: ନଭେମ୍ବର ୧୪ ତାରିଖ ମଙ୍ଗଳବାର ଶେଷ ନିଶ୍ୱାସ ତ୍ୟାଗ କରିଛନ୍ତି ସାହାରା ମୁଖ୍ୟ ସୁବ୍ରତ ରାୟ। ମଙ୍ଗଳବାର ୭୫ ବର୍ଷ ବୟସରେ ମୁମ୍ବାଇ ଠାରେ କାଙ୍କର ଦେହାନ୍ତ ହୋଇଯାଇଛି। ସୁବ୍ରତ ରାୟ ସ୍ଥାନୀୟ ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ। ସେ ଦୀର୍ଘ ସମୟ ଧରି ଅସୁସ୍ଥ ଥିଲେ। ଏନେଇ ତାଙ୍କ କମ୍ପାନୀ ପକ୍ଷରୁ ଜାରି ହୋଇଥିବା ବିବୃତ୍ତିରେ କୁହାଯାଇଛି ଯେ ସାହାରା ଗ୍ରୁପ୍ ମୁଖ୍ୟ ସୁବ୍ରତ ରାୟଙ୍କ ହୃଦ୍‌ଘାତ କାରଣରୁ ମୃତ୍ୟୁ ହୋଇଛି। ନଭେମ୍ବର ୧୫ ତାରିଖ ବୁଧବାର ସାହାରା ଗ୍ରୁପ୍ ମୁଖ୍ୟ ସୂବ୍ରତ ରାୟଙ୍କ ମୃତଦେହକୁ ଲକ୍ଷ୍ନୌ ଅଣାଯିବ।

ସୁବ୍ରତ ରାୟ କିଏ?
ସାହାରା ଗ୍ରୁପ୍ ମୁଖ୍ୟ ସୂବ୍ରତ ରାୟ ୧୯୪୮ ମସିହା ଜୁନ୍ ୧୦ ତାରିଖ ରେ ବିହାରର ଅରାରିଆ ଜିଲ୍ଲାରେ ଏକ ବଙ୍ଗୀୟ ହିନ୍ଦୁ ପରିବାରରେ ଜନ୍ମଗ୍ରହଣ କରିଥିଲେ। ତାଙ୍କ ପିତାଙ୍କ ନାମ ଥିଲା ସୁଧିର ଚନ୍ଦ୍ର ରାୟ ଏବଂ ମାତାଙ୍କ ନାମ  ହେଉଛି ଛବି ରାୟ। ତାଙ୍କ ପିତା ଏବଂ ମାତା ସେତେବେଳର ପୂର୍ବ ବଙ୍ଗର ବିକ୍ରମପୁର ଅଞ୍ଚଳର ବାସିନ୍ଦା ଥିଲେ। ଯାହା ବର୍ତ୍ତମାନ ବାଂଲାଦେଶରେ ଅବସ୍ଥିତ ରହିଛି। ସେ ଭାଗୀକୁଲ ଜମିନ୍ଦର ନାମକ ଏକ ଧନୀ ଜମିଦାର ପରିବାରର ସଦସ୍ୟ ଥିଲେ।

ତାଙ୍କର ପ୍ରାଥମିକ ଶିକ୍ଷା କୋଲକାତାସ୍ଥିତ ହୋଲି ଚାଇଲ୍ଡ ସ୍କୁଲ ଠାରେ କରିଥିଲେ। ଏହା ପରେ ସେ ଉତ୍ତର ପ୍ରଦେଶର ଗୋରଖପୁର ସ୍ଥିତ ସରକାରୀ ବୈଷୟିକ ପ୍ରତିଷ୍ଠାନରେ ମେକାନିକାଲ ଇଞ୍ଜିନିୟରିଂ ଅଧ୍ୟୟନ କରିଥିଲେ। ୧୯୭୮ ମସିହାରେ ସୂବ୍ରତ ରାୟ ବହୁଚର୍ଚ୍ଚିତ ସାହାରା ଇଣ୍ଡିଆ ପରିବାର ପ୍ରତିଷ୍ଠା କରିଥିଲେ। ଆମ୍ବି ଭ୍ୟାଲି ସିଟି, ସାହାରା ମୁଭିଜ ଷ୍ଟୁଡି଼ଓ, ଏୟାର ସାହାରା ଏବଂ ଉତ୍ତର ପ୍ରଦେଶ ୱିଜାର୍ଡ ପରି ଅନେକ ବ୍ୟବସାୟ ସାହାରା ଇଣ୍ଡିଆ ପରିବାର ଦ୍ୱାରା ପରିଚାଳିତ ହେଉଥିଲା।

ଗତ ୨୦୦୪ ବର୍ଷରେ, ଟାଇମ୍ ମାଗାଜିନ୍ ସାହାରା ଗ୍ରୁପ କୁ ଭାରତୀୟ ରେଳବାଇ ପରେ ଦେଶର ଦ୍ୱିତୀୟ ବୃହତ୍ତମ ନିଯୁକ୍ତିଦାତା ଭାବରେ ବର୍ଣ୍ଣନା କରିଥିଲା। ଏହା ସହିତ ଗତ ୨୦୧୨ ବର୍ଷରେ ଇଣ୍ଡିଆ ଟୁଡେ ଦ୍ୱାରା ସୁବ୍ରତ ରାୟଙ୍କୁ ଦେଶର ଶ୍ରେଷ୍ଠ ୧୦ ଶକ୍ତିଶାଳୀ ବ୍ୟକ୍ତିଙ୍କ ମଧ୍ୟରେ ନାମିତ କରାଯାଇଥିଲା।

ଗୋରଖପୁର ଠାରୁ ଆରମ୍ଭ କରିଥିଲେ ପ୍ରଥମ ବ୍ୟବସାୟ
ସୁବ୍ରତ ରାୟ ଉତ୍ତର ପ୍ରଦେଶର ଗୋରଖପୁରରେ ତାଙ୍କର ପ୍ରଥମ ବ୍ୟବସାୟ ଆରମ୍ଭ କରିଥିଲେ। ୧୯୭୬ ମସିହାରେ ସେ ଏକ ସଂଘର୍ଷପୂର୍ଣ୍ଣ ଚିଟ୍ ଫଣ୍ଡ କମ୍ପାନୀ ସାହାରା ଫାଇନାନ୍ସ ରେ ଯୋଗ ଦେଇଥିଲେ। ପରେ ଯାହାକୁ ସେ ଅଧିଗ୍ରହଣ କରି ନେଇଥିଲେ। ୧୯୭୮ ମସିହାରେ ସେ ତାଙ୍କର ଆର୍ଥିକ ମଡେଲ ପରିବର୍ତ୍ତନ କରିଥିଲେ। କୁହାଯାଏ ଯେ ସାହାରା ବହୁ ପୁରାତନ "ପିୟରଲେସ ଗ୍ରୁପ୍" (Peerless Group) ନାମକ ସଂସ୍ଥାର ଆର୍ଥିକ ମଡେଲ୍ ବ୍ୟବହାର କରିଥିଲା।

୧୯୯୦ ଦଶକରେ ସୁବ୍ରତ ରାୟ ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌ ଚାଲି ଆସିଥିଲେ। ଯେଉଁ ସ୍ଥାନ ତାଙ୍କ ସଂସ୍ଥାର ଆଧାର କେନ୍ଦ୍ର ହୋଇଯାଇଥିଲା। ସେଠାରୁ ଏହା ବିଭିନ୍ନ ବ୍ୟବସାୟିକ ଆଗ୍ରହ ସହିତ ଦେଶର ସର୍ବବୃହତ ସମୂହରେ ପରିବର୍ତ୍ତନ ହୋଇଥିଲା। ଆର୍ଥିକ ସେବା, ଶିକ୍ଷା, ରିଅଲ୍ ଇଷ୍ଟେଟ୍, ମିଡିଆ, ମନୋରଞ୍ଜନ, ପର୍ଯ୍ୟଟନ, ସ୍ୱାସ୍ଥ୍ୟସେବା ଏବଂ ଆତିଥ୍ୟ ଭଳି କ୍ଷେତ୍ରରେ ସୂବ୍ରତ ରାୟଙ୍କ ବ୍ୟବସାୟ ବିସ୍ତାର କରିଥିଲା।

ଲଣ୍ଡନ ଏବଂ ନ୍ୟୁୟର୍କ ଠାରେ ହୋଟେଲ କିଣିଥିଲେ ସୂବ୍ରତ ରାୟ
ଗତ ୧୯୯୨ ମସିହାରେ ହିନ୍ଦୀ ଖବରକାଗଜ 'ରାଷ୍ଟ୍ରିୟ ସାହାରା' ଆରମ୍ଭ କରିଥିଲେ ସୂବ୍ରତ ରାୟ। ୯୦ ଦଶକର ଶେଷ ଭାଗରେ ସେ ପୁଣେ ନିକଟରେ ଉଚ୍ଚାଭିଳାଷୀ "ଆମ୍ବି ଭ୍ୟାଲି ସିଟି" ପ୍ରକଳ୍ପ ଆରମ୍ଭ କରିଥିଲେ। ସେହିପରି ୨୦୦୦ ମସିହାରେ ସାହାରା ଟିଭି ଲଞ୍ଚ କରାଯାଇଥିଲା। ଯାହା ପରେ ସାହାରା ୱାନ୍ ନାମରେ ନାମିତ ହୋଇଥିଲା। ଗତ ୨୦୧୦ ବର୍ଷରେ ସାହାରା ଲଣ୍ଡନ ସ୍ଥ୍ିତ ସମ୍ମାନଜନକ ଗ୍ରୋସଭେନର୍ ହାଉସ୍ ହୋଟେଲ ଏବଂ ୨୦୧୨ ବର୍ଷରେ ନ୍ୟୁୟର୍କ ସ୍ଥିତ ଐତିହାସିକ ପ୍ଲାଜା ହୋଟେଲ୍ ଏବଂ ଡ୍ରିମ୍ ଡାଉନ୍ ଡାଉନ୍ ହୋଟେଲ କିଣିଥିଲେ।