Kochi : മർദ്ദനത്തിനിരയായി കൊല്ലപ്പെട്ട ദീപുവിന്റെ കുടുംബത്തെ ട്വന്റി 20 ഏറ്റെടുക്കുമെന്ന് അറിയിച്ചു. ട്വന്റി 20 പ്രവർത്തകനായിരുന്ന ദീപുവിന്റെ കുടുംബത്തെ ട്വന്റി20 ചീഫ് കോഡിനേറ്റർ സാബു എം ജേക്കബ് സന്ദർശിച്ചിരുന്നു. അതിന് ശേഷമാണ് കുടുംബത്തെ ഏറ്റെടുക്കുമെന്ന് അറിയിച്ചിരിക്കുന്നത്. കൂടാതെ പൊലീസ് ഉദ്യോഗസ്ഥർ പ്രാഥമിക പോസ്റ്റുമോർട്ടം റിപ്പോർട്ട് അട്ടിമറിക്കുമെന്നും സാബു എം ജേക്കബ് പറയുന്നു
ദീപുവിനെ ആശുപത്രിയിൽ എത്തിക്കാൻ വൈകിയതിന് കാരണം ഭീഷണി ഉണ്ടായിരുന്നത് കൊണ്ടാണെന്ന് ദീപുവിന്റെ അച്ഛൻ പറഞ്ഞിരുന്നു. ദീപുവിനെ കൊലപ്പെടുത്തുമെന്ന് വരെ ഭീഷണി ഉണ്ടായിരുന്നുവെന്നാണ് അച്ഛൻ പറയുന്നത്. അതിക്രൂരമായി ആണ് ദീപുവിനെ മർദിച്ചതെന്നും, കൊല്ലുമെന്ന് ഭീഷണി ഉണ്ടായിരുന്നതിനാലാണ് ആശുപത്രിയിലേക്ക് വിടാതിരുന്നതെന്നും പിതാവ് വ്യക്തമാക്കി. തല്ലുന്നത് കണ്ട് പിടിച്ച് മാറ്റാൻ ശ്രമിക്കിച്ചെങ്കിലും സാധിച്ചില്ലെന്നും ദീപുവിന്റെ അച്ഛൻ ഇന്ന് വെളിപ്പെടുത്തിയിരുന്നു
ALSO READ: Deepu Murder : ദീപുവിന്റെ കൊലപാതകം: ആശുപത്രിയിൽ പോകാൻ വൈകിയത് ഭീഷണി മൂലമെന്ന് അച്ഛൻ
മാതാപിതാക്കൾ പറയുന്നത് അനുസരിച്ച് ട്വന്റി 20 പ്രവർത്തകൻ ആയത് കൊണ്ടാണ് ദീപു ആക്രമിക്കപ്പെട്ടത്. പുറകിൽ നിന്നാണ് ദീപുവിനെ അടിച്ചതെന്നും, മാത്രമല്ല അറിയാവുന്നവർ തന്നെയാണ് ആക്രമിച്ചതെന്നും ദീപുവിന്റെ അച്ഛൻ പറഞ്ഞു. അതിനിടയിൽ കോവിഡ് മാനദണ്ഡം ലംഘിച്ചതിന് ദീപുവിന്റെ സംസ്ക്കാരത്തിൽ ട്വന്റി20 ചീഫ് കോഡിനേറ്റർ സാബു എം ജേക്കബ് ഉൾപ്പെടെ 29 പേർക്കെതിരെ കേസെടുത്തു. കുന്നത്തുനാട് പോലീസാണ് കേസെടുത്തിരിക്കുന്നത്. ഉടൻ കൂടുതൽ പേർക്കെതിരെ കേസെടുക്കുമെന്നും അറിയിച്ചിട്ടുണ്ട്.
അതിനിടയിൽ ദീപുവിന്റെ പോസ്റ്റുമോർട്ടം റിപ്പോർട്ടിലെ വിവരങ്ങൾ ഇന്നലെ പുറത്ത് വന്നിരുന്നു. തലയോട്ടിയിലേറ്റ ക്ഷതമാണ് മരണ കാരണമെന്ന് പോസ്റ്റുമോർട്ടത്തിന്റെ പ്രാഥമിക റിപ്പോർട്ട്. തലയോട്ടിയിൽ രണ്ട് ക്ഷതങ്ങൾ ഉള്ളതായി റിപ്പോർട്ടിൽ പറയുന്നു. ക്ഷതമേറ്റതിനെ തുടർന്ന് തലച്ചോറിൽ രക്തം കട്ടപിടിച്ചിട്ടുണ്ട്. ക്ഷതമേറ്റതിനെ തുടർന്ന് രക്തധമനികൾ പൊട്ടുകയും ചെയ്തിട്ടുണ്ട്.
ALSO READ: Twenty 20 Worker : സിപിഎം പ്രവർത്തകരുടെ മര്‍ദ്ദനത്തിനിരയായ ട്വന്റി 20 പ്രവർത്തകൻ മരിച്ചു
ദീപുവിന് കരൾ രോഗം ഉണ്ടായിരുന്നതായും പോസ്റ്റ്മോർട്ടത്തിൽ കണ്ടെത്തിയിട്ടുണ്ട്. ഇത് മരണത്തിന്റെ ആക്കം കൂട്ടിയെന്ന് കണ്ടെത്തിയിട്ടുണ്ട്. കരൾ രോഗം ഉള്ളത് കൊണ്ടാണ് ക്ഷതമേറ്റപ്പോൾ രക്തധമനികൾ പൊട്ടാൻ കാരണമായത്. കേസിൽ അറസ്റ്റിലായ നാല് പ്രതികൾക്കെതിരെയും കൊലക്കുറ്റം ചുമത്തിയിട്ടുണ്ട്. കേസിൽ സിപിഎം പ്രവർത്തകരായ ബഷീർ, സൈനുദ്ദീൻ, അബ്ദു റഹ്മാൻ, അബ്ദുൽ അസീസ് എന്നിവരെയാണ് കുന്നത്തുനാട് പോലീസ് അറസ്റ്റ് ചെയ്തിട്ടുള്ളത്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
