അമിതമായി ഭക്ഷണം കഴിക്കുന്നത് ആരോഗ്യത്തിന് നല്ലതല്ല. ഇത് ശരീരഭാരം വർധിപ്പിക്കുന്നതിനും അമിതവണ്ണത്തിനും കാരണമാകുന്നു.
അമിതമായി ഭക്ഷണം കഴിക്കുന്നത് ഒഴിവാക്കാൻ ശ്രദ്ധിക്കേണ്ട ചില കാര്യങ്ങള്‍ എന്തൊക്കെയാണെന്ന് നോക്കാം...
ആവശ്യത്തിന് വെള്ളം കുടിക്കുന്നത് നിങ്ങളുടെ വിശപ്പ് നിയന്ത്രിക്കാൻ സഹായിക്കും. ദിവസം മുഴുവൻ ജലാംശം നിലനിർത്തുന്നത് നിങ്ങളുടെ ശരീരത്തിന്‍റെ ആരോഗ്യത്തിനും നല്ലതാണ്.
ഭക്ഷണം കഴിക്കുമ്പോള്‍ ശ്രദ്ധയോടെ കഴിക്കണം. ചിലര്‍ ടിവി കണ്ടും ഫോണ്‍ ഉപയോഗിച്ചും ഭക്ഷണം കഴിക്കാറുണ്ട്. ഇത് അമിതമായി ഭക്ഷണം കഴിക്കുന്നതിന് കാരണമാകും.
വണ്ണം കുറയ്ക്കാനുള്ള ശ്രമത്തിന്‍റെ ഭാഗമായി, ഭക്ഷണം കഴിക്കാതിരിക്കുന്നത് ഒഴിവാക്കുക. ഇത് വിശപ്പ് കൂട്ടുകയും അതുവഴി ഭക്ഷണം അമിതമായി കഴിക്കാനും ഇടയാക്കുന്നു.
വേഗത്തിൽ ഭക്ഷണം കഴിക്കുന്നത് അമിതമായി ഭക്ഷണം കഴിക്കുന്നതിലേക്ക് നയിക്കുന്നു. കാരണം, വയറ് നിറഞ്ഞിരിക്കുന്നുവെന്ന് തലച്ചോറിനെ അറിയിക്കാൻ സമയമെടുക്കും. അതിനാല്‍ ഭക്ഷണം വളരെ പതിയെ കഴിക്കുക. ഇത് ഭക്ഷണം നന്നായി ആസ്വദിക്കാനും ഭക്ഷണം നിർത്താൻ സമയമാകുമ്പോൾ തലച്ചോറുമായി ആശയവിനിമയം നടത്താനും സഹായിക്കും.
ഭക്ഷണം കഴിക്കുന്നതിനായി ചെറിയ പ്ലേറ്റുകളും ബൗളുകളും ഉപയോഗിക്കുന്നത് കുറച്ച് ഭക്ഷണം കഴിക്കാൻ സഹായിക്കും.
നട്സ്, പഴങ്ങൾ, പച്ചക്കറികൾ എന്നിവ പോലുള്ള ആരോഗ്യകരമായ ലഘുഭക്ഷണങ്ങൾ കയ്യില്‍ സൂക്ഷിക്കുക. വിശപ്പ് തോന്നുമ്പോൾ അമിതമായി ഭക്ഷണം കഴിക്കുന്നത് തടയാനും മറ്റ് അനാരോഗ്യകരമായ ഭക്ഷണങ്ങൾ കഴിക്കുന്നത് ഒഴിവാക്കാനും ഇത് സഹായിക്കും. (Disclaimer: ഈ വാർത്ത പൊതുവായ വിവരങ്ങളെ അടിസ്ഥാനമാക്കിയുള്ളതാണ്. ഒരു മെഡിക്കൽ വിദഗ്ധന്റെ ഉപദേശത്തിന് പകരമല്ല.)
