Union Budget 2022: 2014 മുതൽ പ്രധാനമന്ത്രി മോദി ഇന്ത്യ ഭരിക്കുകയാണ്. അന്നുമുതൽ ഇന്നുവരെ അദ്ദേഹം പല തരത്തിലുള്ള പാരമ്പര്യങ്ങളും മാറ്റി. അതിൽ ചില പാരമ്പര്യങ്ങൾ കേന്ദ്ര ബജറ്റുമായി (Union Budget) ബന്ധപ്പെട്ടതാണ്. ഇപ്പോൾ ധനമന്ത്രി നിർമല സീതാരാമൻ 2022 ഫെബ്രുവരി 1 ന് രാജ്യത്തിന്റെ പൊതു ബജറ്റ് അവതരിപ്പിക്കാൻ പോകുന്നു. ഇത്തരമൊരു സാഹചര്യത്തിൽ ബജറ്റിന്റെ മാറിയ പാരമ്പര്യത്തെക്കുറിച്ച് നമുക്കറിയാം...
ബ്രിട്ടീഷ് കാലം മുതൽ എല്ലാ വർഷവും ഫെബ്രുവരി 28നാണ് ബജറ്റ് അവതരിപ്പിച്ചിരുന്നത്. എന്നാൽ ഇപ്പോൾ അത് ഫെബ്രുവരി ഒന്നിന് അവതരിപ്പിക്കുന്നു. 2017 ൽ പ്രധാനമന്ത്രി നരേന്ദ്രമോദിയുടെ കാലത്ത് അന്നത്തെ ധനമന്ത്രി അരുൺ ജെയ്റ്റ്‌ലി ബജറ്റ് അവതരിപ്പിച്ചത് ഫെബ്രുവരി ഒന്നിനാണ്. ഈ മാറ്റത്തിന് കാരണം പുതിയ സാമ്പത്തിക വർഷം ആരംഭിക്കുന്നതിന് മുമ്പ് ബജറ്റുമായി ബന്ധപ്പെട്ട എല്ലാ നടപടികളും പൂർത്തിയാക്കണമെന്നതാണ്.
നേരത്തെ റെയിൽവേ ബജറ്റും പൊതുബജറ്റും വെവ്വേറെ അവതരിപ്പിച്ചിരുന്നു. എന്നാൽ 1924 മുതൽ തുടരുന്ന ഈ ആചാരം 2016 ൽ മാറി. നേരത്തെ ഇത് പൊതുബജറ്റിന് മുമ്പ് പാർലമെന്റിൽ അവതരിപ്പിച്ചിരുന്നു. എന്നാൽ 2016 മുതൽ റെയിൽവേ ബജറ്റും കേന്ദ്ര ബജറ്റിന്റെ ഭാഗമാണ്.
സ്വതന്ത്ര ഇന്ത്യയിൽ ആദ്യമായി 1947 ൽ ധനമന്ത്രി ആർ.സി.കെ.എസ് ചെട്ടി ബജറ്റ് അവതരിപ്പിച്ചപ്പോൾ തുകൽ ബ്രീഫ്‌കേസിലാണ് രേഖകളുമായി അദ്ദേഹം പാർലമെന്റിലെത്തിയത്. എന്നാൽ 2019 ജൂലൈ 5 ന് ധനമന്ത്രി നിർമല സീതാരാമൻ ചുവന്ന തുണി സഞ്ചിയിൽ ബജറ്റ് പേപ്പറുകളുമായി എത്തി. കൊറോണ പകർച്ചവ്യാധി കാരണം 2021 ൽ അവർ ടാബ്‌ലെറ്റുമായി എത്തി, അത് ഒരു ഡിജിറ്റൽ ബജറ്റായിരുന്നു.
2015ൽ മോദി സർക്കാർ ആസൂത്രണ കമ്മീഷനെ ഇല്ലാതാക്കി നീതി ആയോഗ് രൂപീകരിച്ചു. ഇതോടെ രാജ്യത്ത് നടപ്പാക്കുന്ന പഞ്ചവത്സര പദ്ധതികൾക്കും വിരാമമായി. രാജ്യത്തിന്റെ പ്രഥമ പ്രധാനമന്ത്രി പണ്ഡിറ്റ് ജവഹർലാൽ നെഹ്‌റുവിന്റെ കാലം മുതൽ ഈ പദ്ധതികൾ നിലവിലുണ്ട്. എന്നാൽ 2017 ൽ ഇവ അവസാനിച്ചു.
2022 ൽ ബജറ്റ് അച്ചടിക്കുന്നതിന് മുന്നോടിയായി നടത്താനിരുന്ന ഹൽവ ചടങ്ങ് കോവിഡ് ബാധയെ തുടർന്ന് നടന്നില്ല. ഹൽവ ചടങ്ങിന് പകരം ഇത്തവണ മിഠായി ആണ് നൽകിയതെന്ന് മന്ത്രാലയം അറിയിച്ചു.
