ചാണക്യ നീതി; ഭാര്യക്കായി ഇത്ര മാത്രം ചെയ്യൂ, ദാമ്പത്യ ജീവിതം മനോഹരമാക്കാം....
പൗരാണിക ഭാരതത്തിലെ മികച്ച പണ്ഡിതനും രാഷ്ട്ര തന്ത്രജ്ഞനുമായിരുന്നു ആചാര്യനായ ചാണക്യൻ. വിവിധ കാര്യങ്ങളിലെ ആഴത്തിലുള്ള അറിവ് കൂടാതെ, പ്രായോഗിക ജീവിതത്തിലെ നല്ലതും ചീത്തയുമായ സാഹചര്യങ്ങളെക്കുറിച്ചും അദ്ദേഹത്തിന് അറിവ് ഉണ്ടായിരുന്നു.
വര്‍ഷങ്ങള്‍ കഴിഞ്ഞിട്ടും ചാണക്യന്റെ നയങ്ങള്‍ ഇന്നും പ്രസക്തമായി നിലനില്‍ക്കുന്നു. ചാണക്യനീതിയിലെ പല മന്ത്രങ്ങളും ജീവിതവിജയത്തിന് സഹായിക്കും.
ചാണക്യനീതിയില്‍ ഭാര്യാഭര്‍തൃ ബന്ധത്തെപ്പറ്റി നിരവധി കാര്യങ്ങള്‍ പറയുന്നുണ്ട്. പല ഭര്‍ത്താക്കന്‍മാരും ഭാര്യയെ എങ്ങനെ സന്തോഷിപ്പിക്കാമെന്ന് ചിന്തിക്കുന്നവരാണ്. ഭാര്യയെ സന്തോഷിപ്പിക്കാന്‍ ചാണക്യന്‍ ചില കാര്യങ്ങള്‍ പറഞ്ഞിട്ടുണ്ട്.
ഈ കാര്യങ്ങള്‍ പിന്തുടരുകയാണെങ്കില്‍, നിങ്ങളുടെ ദാമ്പത്യ ജീവിതം സന്തോഷം കൊണ്ട് നിറയുക മാത്രമല്ല, ബന്ധം ശക്തമായി നിലനില്‍ക്കുകയും ചെയ്യും.
പല പുരുഷന്മാര്‍ക്കും ഭാര്യമാരുടെ മേല്‍ തങ്ങളുടെ അവകാശങ്ങള്‍ ഉറപ്പിക്കാൻ ശ്രമിക്കാറുണ്ട്. എന്നാല്‍ ആരോഗ്യകരമായ ബന്ധത്തിന് അവ നല്ലതല്ല. അതിനാല്‍, ഭാര്യയെ സന്തോഷിപ്പിക്കാനായി അവരുടെ ഇഷ്ടങ്ങള്‍ക്കും നിങ്ങള്‍ വില കല്‍പിക്കുക. അവരുടെ സ്വാതന്ത്ര്യത്തെ ബഹുമാനിക്കുക.
ബന്ധങ്ങൾ ബഹുമാനത്തിലും സ്‌നേഹത്തിലും വേരൂന്നിയതായിരിക്കണം. ഭാര്യയെ ബഹുമാനിക്കുന്ന ഭര്‍ത്താവിനോടൊപ്പം സ്ത്രീകള്‍ സന്തോഷത്തോടെ ജീവിക്കുന്നു. ഒരിക്കലും നിങ്ങളുടെ ഇണയെ ആരുടെ മുന്നിലും അപമാനിക്കരുത്. ഇത് നിങ്ങളുടെ ബന്ധത്തെ വളരെ മോശമായി ബാധിക്കും.
ദാമ്പത്യ ജീവിതത്തില്‍ വിശ്വാസ്യത വളരെ പ്രാധാന്യം അര്‍ഹിക്കുന്നു. വിശ്വാസമില്ലാതെ ഒരു ദാമ്പത്യജീവിതവും സന്തോഷകരമായി മുന്നോട്ട് പോകില്ല.
ചാണക്യനീതി അനുസരിച്ച്, സ്ത്രീകള്‍ സുരക്ഷിതരാണെന്ന് തോന്നുന്ന പുരുഷന്മാരോടൊപ്പം കഴിയാനാണ് ഇഷ്ടപ്പെടുന്നത്. ഭാര്യയെ സംരക്ഷിക്കാന്‍ കഴിയാത്ത ഭര്‍ത്താവിന് പങ്കാളിയുമായി നല്ലൊരു ബന്ധം പുലര്‍ത്താന്‍ സാധിക്കില്ല.
ഏതൊരു ബന്ധത്തിലും അഹന്തയേക്കാള്‍ സ്‌നേഹവും കരുതലും വാത്സല്യവുമാണ് പ്രധാനം. പങ്കാളികളില്‍ ആര്‍ക്കെങ്കിലും ഈഗോ ഉണ്ടെങ്കില്‍ അത് നിങ്ങള്‍ ജീവിതത്തില്‍ വിള്ളലുണ്ടാക്കും. അഹങ്കാരിയായ ഭര്‍ത്താവിനെ ഒരു ഭാര്യയും ഇഷ്ടപ്പെടുന്നില്ല.
എത്ര വലിയ പ്രശ്നമായാലും അതെല്ലാം സമാധാനത്തിലൂടെ പരിഹരിക്കണമെന്ന് ചാണക്യന്‍ പറയുന്നു. കോപാകുലനായ വ്യക്തി മറ്റുള്ളവര്‍ക്കും ദോഷം ചെയ്യുന്നു. സന്തോഷകരമായ ദാമ്പത്യ ജീവിതത്തിന് മാനസിക സമാധാനം വളരെ പ്രധാനമാണ്. എങ്കില്‍ മാത്രമേ ഭാര്യാഭര്‍തൃ ബന്ധം മനോഹരമാകൂ.
ഏതൊരു വ്യക്തിയുടെയും ജീവിതത്തില്‍ ഉയര്‍ച്ച താഴ്ചകള്‍ ഉണ്ടാകും. അത്തരം സാഹചര്യങ്ങളിൽ ജീവിതപങ്കാളി നിങ്ങളോടൊപ്പമുണ്ടെങ്കില്‍ പ്രശ്‌നങ്ങളെ തരണം ചെയ്യാന്‍ എളുപ്പത്തില്‍ സാധിക്കും. ജീവിതത്തിലെ പ്രശ്നങ്ങൾ ഭാര്യാഭര്‍ത്താക്കന്മാര്‍ ഒരുമിച്ച് നേരിടണമെന്ന് ചാണക്യൻ പറയുന്നു.
ഈ വാർത്ത പൊതുവായ വിവരങ്ങളെ അടിസ്ഥാനമാക്കിയുള്ളതാണ്.