બહેનના આડા સંબંધોથી ત્રાસેલા ભાઇએ તેના પ્રેમીને જાહેરમાં રહેંસી પોતે પણ સ્મશાનમાં જતો રહ્યો અને...

કેતન બગડા/અમરેલી : રાજુલા તાલુકાના કુંડલીયાળા ગામે યુવાનના ઘરમાં ઘૂસી તીક્ષ્ણ હથિયારથી હત્યા નિપજાવવાનાની ઘટનામાં પોલીસે હત્યારાને ઝડપી પૂછપરછ હાથ ધરી છે. રાજુલાના કુંડલીયાળા ગામે રહેતા દલિત યુવાન રસિક દાનાભાઈ વાળાના ઘરમાં ઘૂસી તિક્ષણ હથિયાર વડે હત્યાની ઘટનાને પગલે ચકચાર મચી ગઇ હતી. ઘટનાની માહિતી મળતા પોલીસ સ્થળ પર પહોંચીને સમગ્ર મામલે કાયદેસરની કાર્યવાહી હાથ ધરી હતી. યુવાનની હત્યાનું કારણ જાણવા માટેની તજવીજ હાથ ધરી હતી. 

ઘટના અંગે જીણવટભરી તપાસ કરતા સામે આવ્યું કે, હત્યા આડા સંબંધોનાં કારણે થઇ હતી. જેના પગલે સાવરકુંડલાના મઢડા ગામમાં રહેતા મહેશ ઉર્ફે મેહુલ રવજીભાઈ ચૌહાણે છરીના આડેધડ ઘા ઝીંકી હત્યા કરી હોવાનું સામે આવ્યું હતું. પોલીસને માહિતી મળતા જુદી જુદી ટીમો બનાવી પોલીસે આરોપીને પકડવાની તજવીજ હાથ ધરી હતી. જ્યારે આરોપી સાવરકુંડલાના મઢડા ગામના સ્મશાનમાં હોવાની માહિતી મળતા પોલીસે આરોપીને ઝડપીને પૂછપરછ હાથ ધરી હતી. 

પોલીસની પ્રાથમિક પૂછપરછમાં આરોપી મહેશ ઉર્ફે મેહુલ ચૌહાણના જણાવ્યા મુજબ તેમની બહેન કુંડલીયાળા ગામે સાસરે હતી. આ બહેનના મૃતક રસિક વાળા સાથે આડા સંબંધો હતા. આ બાબતે અગાઉ પણ બંનેને બોલાચાલી થઈ હતી. છેલ્લા થોડાક દિવસથી આરોપી કુંડલીયાળા ગામે જ રહેતો હોય તકનો લાભ લઇ આરોપી મહેશ રસિક વાળા નામના યુવાનની હત્યા નીપજાવી હતી. ત્યારે ડુંગર પોલીસ આ સમગ્ર ઘટનાની તપાસ ચલાવી રહી છે.