હવે સિનેમાઘરો માટે બદલાશે નિયમ, રાતે 11 વાગ્યા પછી ઉંમરના હિસાબે મળશે એન્ટ્રી

તેલંગાણા હાઈકોર્ટે થિયેટર અને મલ્ટીપ્લેક્સમાં મોડી રાત્રે 16 વર્ષથી ઓછી ઉંમરના બાળકોના પ્રવેશ પર પ્રતિબંધ મૂકવાનો નિર્દેશ આપ્યો છે. કોર્ટે સ્પષ્ટ કર્યું છે કે, જ્યાં સુધી રાજ્ય સરકાર આ સંબંધમાં નિયમો નક્કી નહીં કરે ત્યાં સુધી બાળકોને 11 વાગ્યા પછી ફિલ્મો જોવાની મંજૂરી આપવામાં આવશે નહીં. તેલંગાણા હાઈકોર્ટનું આ પગલું બાળકોની સુરક્ષા અને તેમના માનસિક સ્વાસ્થ્યને પ્રાથમિકતા આપવાની દિશામાં એક મહત્વપૂર્ણ નિર્ણય છે. હવે રાજ્ય સરકારે આ મુદ્દે વહેલી તકે નિયમો બનાવીને તેનો અમલ કરવો પડશે. 

હાઈકોર્ટે કહ્યું કે, 16 વર્ષથી ઓછી ઉંમરના બાળકો મોડી રાત્રે મૂવી જોવાથી તેમના શારીરિક અને માનસિક સ્વાસ્થ્ય પર અસર થઈ શકે છે. કોર્ટે રાજ્ય સરકારને તમામ સંબંધિત પક્ષો સાથે ચર્ચા કર્યા બાદ આ મુદ્દે વહેલી તકે નિયમો બનાવવાનો નિર્દેશ આપ્યો હતો.

પિટિશનર વિજય ગોપાલના વકીલે કોર્ટને કહ્યું કે, મલ્ટીપ્લેક્સમાં છેલ્લો શો બપોરે 1:30 વાગ્યા સુધી ચાલે છે. આવી સ્થિતિમાં મોડી રાત્રિના શોમાં સગીર બાળકોની એન્ટ્રી કોઈપણ પ્રતિબંધ વિના થઈ રહી છે. તેમણે દલીલ કરી હતી કે, આ બાળકોના સ્વાસ્થ્ય અને સલામતી માટે ખતરનાક બની શકે છે.

અરજદારે એ પણ જણાવ્યું કે, ડિસેમ્બર 2023માં 'પુષ્પા-2'ના શો દરમિયાન સંધ્યા થિયેટરમાં નાસભાગ મચી ગઈ હતી. આ અકસ્માતમાં એક બાળકને ગંભીર ઈજાઓ થઈ હતી અને તેની માતાનું મોત થયું હતું. આ ઘટના બાદ થિયેટરોમાં બાળકોની સુરક્ષાને લઈને સવાલો ઉઠવા લાગ્યા છે.

કોર્ટે રાજ્ય સરકારને નિર્દેશ આપ્યો છે કે, તેઓ તમામ હિતધારકોની સલાહ લે અને નક્કી કરે કે બાળકોને થિયેટરોમાં સવારે 11 વાગ્યા પહેલા અને 11 વાગ્યા પછી પ્રવેશ આપવો જોઈએ કે નહીં. કોર્ટે એમ પણ કહ્યું કે, જ્યાં સુધી સરકાર કોઈ નિર્ણય ન લે ત્યાં સુધી થિયેટરોએ 16 વર્ષથી ઓછી ઉંમરના બાળકોને મોડી રાત સુધી ફિલ્મો જોવાથી રોકવા પડશે.

રામ ચરણ સ્ટારર ફિલ્મ 'ગેમ ચેન્જર' અને અન્ય ફિલ્મોની ટિકિટના ભાવમાં વધારાને લઈને દાખલ કરવામાં આવેલી અરજીઓ પર સુનાવણી દરમિયાન કોર્ટે આ નિર્ણય આપ્યો હતો. અરજદારોએ એમ પણ કહ્યું હતું કે, થિયેટરોમાં બાળકોના પ્રવેશ અંગે સરકારે કડક નિયમો બનાવવા જોઈએ.

આ નિર્ણય બાળકોની સુરક્ષા અને તેમના માનસિક સ્વાસ્થ્યને ધ્યાનમાં રાખીને લેવામાં આવ્યો છે. કોર્ટે કહ્યું કે, સિનેમાઘરોમાં મોડી રાત્રે બાળકોની હાજરી પર પ્રતિબંધ મૂકવો જરૂરી છે જેથી કરીને કોઈપણ અપ્રિય ઘટનાને ટાળી શકાય.