30 લક્ઝુરિયસ કાર સાથે સુરતમાં મોટા ઘરના નબીરાઓના સીનસપાટા, ફેરવેલના નામે ધોરણ-12ના વિદ્યાર્થીઓની શોબાજી

સુરતમાં ધોરણ 12ના વિદ્યાર્થીઓએ પોતાની ફેરવેલ પાવર શો બનાવી હતી. ફેરવેલ સમયે વિદ્યાર્થીઓએ લક્ઝરી કારમાં કાફલો કાઢ્યો હતો. ટ્રાફિકના નિયમોને નેવે મુકી કાફલો રાંદેર ડી-માર્ટથી સ્કૂલ સુધી પોતાની લક્ઝુરિયસ કાર લઈને વિદ્યાર્થીઓ પહોંચ્યા હતા.   

સમગ્ર ઘટનાથી ઓલપાડની ફાઉન્ટન હેડ સ્કૂલ વિવાદમાં આવી છે. ફાઉન્ટન હેડ સ્કૂલના ધોરણ-12ના વિદ્યાર્થીઓએ 30 લક્ઝરી કાર સાથે રસ્તા પર શો બાજી કરી હતી. એટલું જ નહિ, જાહેરમાં જોરશોરથી મ્યુઝિક વગાડી કાફલો કાઢ્યો હતો.   

સુરતમાં નબીરાઓ 30 જેટલી બીએમડબલ્યુ, મર્સિડિઝ, સ્કોડા જેવી લકઝરી કાર સાથે રેલી કરી સ્ટંટબાજી કરી હોવાનો વીડિયો સોશિયલ મીડિયામાં વાઈરલ થયો છે. જાહેરમાં સીનસપાટા કરી કાયદાના લીરા ઉડાવ્યા હતા. સરકારી મંત્રીના કાફલામાં કાર ન હોય એટલી કારના કાફલા સાથે નબીરાઓ નીકળ્યા હોવા છતાં પોલીસને આ બાબતની કોઈ જાણકારી નથી.   

તો બીજી તરફ આ વીડિયો વાઈરલ થતા શાળાએ પણ હાથ ઊંચા કરી દીધા છે. શાળાએ કહ્યું કે, તેઓએ તો બસ મોકલી હતી પણ વિદ્યાર્થીઓ કારમાં આવ્યા હોવાની વાત કરી છે.

સોશિયલ મીડિયામાં જે વીડિયો વાઈરલ થયો છે તેમાં વિદ્યાર્થીઓ કારના રૂફટોપમાંથી બહાર નીકળી સ્ટંટ કરતા જોવા મળી રહ્યા છે. એકસાથે રસ્તા પર 30 જેટલી કાર દોડાવતા અન્ય વાહનચાલકો પણ મુશ્કેલીમાં મુકાયા હતા.  

આ વાયરલ વીડિયો અનેક સવાલો ઉભા કરે છે. શાળા કરતા પહેલા ભૂલ વાલીઓની છે. શું વિદ્યાર્થીઓ ઘરમાંથી આવી લક્ઝુરિયસ ગાડીઓ લઈને નીકળ્યા તો વાલીઓને કેમ ખબર ન પડી. વાલીઓએ કેમ પોતાના વિદ્યાર્થીઓને આ રીતે મોંઘીદાટ ગાડી સોંપી. શું વિદ્યાર્થીઓ અને સ્કૂલ જવાબદાર હોય તો પછી વાલીઓ કેમ નહિ.