ଆଠ ବର୍ଷରେ ବଦଳିଛି ଭାରତ, ଚମକାଇଦେଲା ବିଶ୍ୱ ବ୍ୟାଙ୍କ ରିପୋର୍ଟ

ନୂଆଦିଲ୍ଲୀ: 'ଦାରିଦ୍ର୍ୟ' ଯେକୌଣସି ଦେଶ ପାଇଁ ଏକ ବଡ଼ ଆହ୍ୱାନ। ଭାରତ ମଧ୍ୟ ଏହି ଆହ୍ୱାନର ସାମ୍ନା କରୁଛି, କିନ୍ତୁ ସଦ୍ୟ ପ୍ରକାଶିତ ବିଶ୍ୱ ବ୍ୟାଙ୍କର ରିପୋର୍ଟ କିଛିମାତ୍ରରେ ଆଶ୍ବସ୍ତି ଦେଇଛି। ଭାରତର ଦାରିଦ୍ର୍ୟ ଆଠ ବର୍ଷ ମଧ୍ୟରେ ଅଧାରୁ ଅଧିକ ହ୍ରାସ ପାଇଛି। ସରକାରଙ୍କ ଯୋଜନା ଯୋଗୁଁ ପରିସ୍ଥିତି ବଦଳି ଯାଇଛି ବୋଲି ରିପୋର୍ଟରେ ଦାବି କରାଯାଇଛି। 

ବିଶ୍ୱ ବ୍ୟାଙ୍କର ରିପୋର୍ଟ ଅନୁଯାୟୀ, ଆଠ ବର୍ଷ ମଧ୍ୟରେ ଭାରତରେ ଦାରିଦ୍ର୍ୟ ୧୨.୩ ପ୍ରତିଶତ ହ୍ରାସ ଘଟିଛି। ୨୦୧୧ରେ ଦାରିଦ୍ର୍ୟ ହାର ୨୨.୫ ଥିଲା। ୨୦୧୫ରେ ଏହା ୧୯.୧ ପ୍ରତିଶତକୁ ଖସିଥିଲା। ଏଥି ସହିତ ୨୦୧୯ରେ ଅତ୍ୟଧିକ ଦାରିଦ୍ର୍ୟ ହାର ୧୦ ପ୍ରତିଶତରେ ରହିଲା। ୨୦୧୧ରୁ ୨୦୧୫ ମଧ୍ୟରେ ଅତି ଦାରିଦ୍ର୍ୟ ହାର ୩.୪ ପ୍ରତିଶତ ହ୍ରାସ ପାଇଛି। ୨୦୧୫ରୁ ୨୦୧୯ ମଧ୍ୟରେ ଅତି ଦାରିଦ୍ର୍ୟ ହାର ୯.୧ ପ୍ରତିଶତ ହ୍ରାସ ପାଇଛି। ଯାହାକି ୨୦୧୧-୧୫ ତୁଳନାରେ ୨.୬ ଗୁଣ ଅଧିକ।

ସେହିପରି ୨୦୧୩-୧୯ ମଧ୍ୟରେ କମ୍ ଜମି ଥିବା ଚାଷୀ (Farmer) ଙ୍କ ଆୟ ମଧ୍ୟ ପ୍ରତିବର୍ଷ ୧୦ ପ୍ରତିଶତ ହାରରେ ବୃଦ୍ଧି ପାଇଛି। ବଡ କୃଷକମାନଙ୍କ ବିଷୟରେ କହିବାକୁ ଗଲେ, ଏହି ଅବଧିରେ ସେମାନଙ୍କର ଆୟ ପ୍ରାୟ ୨ ପ୍ରତିଶତ ବୃଦ୍ଧି ପାଇଛି। ୨୦୧୭-୧୮ ମଧ୍ୟରେ ଦାରିଦ୍ର୍ୟର ସବୁଠାରୁ ବଡ ହ୍ରାସ ଆସିଥିଲା। ୨୦୧୧ ଠାରୁ ଦୈନିକ ମଜୁରୀ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଲା। ସବୁଠାରୁ କଥା ହେଲା ସହରାଞ୍ଚଳ ତୁଳନାରେ ଗ୍ରାମାଞ୍ଚଳରେ ଦାରିଦ୍ର୍ୟ ଦ୍ରୁତ ଗତିରେ ହ୍ରାସ ପାଇଛି।

ଯଦି ଆମେ ୨୦୧୧ ଓ ୨୦୧୯କୁ ତୁଳନା କରାଯାଏ, ତେବେ ଏହି ସମୟ ମଧ୍ୟରେ ଭାରତରେ ଦାରିଦ୍ର୍ୟ ହାର ଅଧାରୁ ଅଧିକ ହ୍ରାସ ପାଇଛି। ଯାହା ୧୨.୩ ପ୍ରତିଶତ ହ୍ରାସ ପାଇଛି। ଗ୍ରାମୀଣ ଦାରିଦ୍ର୍ୟ ହାର (Poverty Rate) ୨୦୧୧ ମସିହାରେ ଏହା ୨୬.୩ ପ୍ରତିଶତ ଥିଲା, ଯାହା ୨୦୧୯ରେ ୧୧.୬ ପ୍ରତିଶତକୁ ଖସି ଆସିଛି। ସହରାଞ୍ଚଳରେ ଏହା ୨୦୧୧ ମସିହାରେ ୧୪.୨ ପ୍ରତିଶତ ଥିଲା, ଯାହା ୨୦୧୯ରେ ୬.୩ ପ୍ରତିଶତକୁ ହ୍ରାସ ପାଇଛି।

ବିଶ୍ୱ ବ୍ୟାଙ୍କ (World Bank) ର ରିପୋର୍ଟରେ ଏହା ସ୍ପଷ୍ଟ ହୋଇଛି ଯେ, ୨୦୧୧-୧୯ ମଧ୍ୟରେ ସହରାଞ୍ଚଳ ଏବଂ ଗ୍ରାମାଞ୍ଚଳର ଦାରିଦ୍ର୍ୟ ହାର ୧୪.୭ରୁ ୭.୯ ପ୍ରତିଶତ ହ୍ରାସ ପାଇଛି। ଗତ ଦଶନ୍ଧି ମଧ୍ୟରେ ଭାରତରେ ଦାରିଦ୍ର୍ୟର ହାର ହ୍ରାସ ପାଇଛି। ଦେଶରେ କ୍ଷୁଦ୍ର ଚାଷୀଙ୍କ ଆୟ ବୃଦ୍ଧି ପାଇଛି। ଅନ୍ୟପଟେ କୋରୋନା ସମୟରେ ଲୋକଙ୍କ ବୋଝ ଦୂର କରିବା ପାଇଁ କେନ୍ଦ୍ର ସରକାର ଦେଶର ୮୦ କୋଟି ଲୋକଙ୍କ ପାଇଁ ମାଗଣା ରାସନ ବ୍ୟବସ୍ଥା କରିଥିଲେ।