Dominic and The Ladies Purse: 'പെണ്ണിന് പകരം വണ്ടിയെ പ്രണയിച്ചവൻ'; ആൽബിയെ പരിചയപ്പെടുത്തി 'ഡൊമിനിക് ആൻഡ് ദ ലേഡീസ് പേഴ്സ്' ടീം

ഷൈൻ ടോം ചാക്കോ അവതരിപ്പിക്കുന്ന കഥാപാത്രത്തെ പ്രേക്ഷകർക്ക് പരിചയപ്പെടുത്തുകയാണ് അണിയറപ്രവർത്തകർ.

മെഗാസ്റ്റാർ മമ്മൂട്ടിയെ നായകനാക്കി സൂപ്പർഹിറ്റ് സംവിധായകൻ ഗൗതം വാസുദേവ് മേനോൻ സംവിധാനം ചെയ്യുന്ന 'ഡൊമിനിക് ആൻഡ് ദ ലേഡീസ് പേഴ്സ്' എന്ന ചിത്രത്തിലെ ​ഷൈൻ ടോം ചാക്കോയുടെ ക്യാരക്ടർ പോസ്റ്ററെത്തി. ആൽബി എന്നാണ് ​ഷൈനിന്റെ കഥാപാത്രത്തിന്റെ പേര്. പെണ്ണിന് പകരം വണ്ടിയെ പ്രണയിച്ചവൻ, ബൈക്ക് റേസർ, സ്റ്റണ്ടർ, ​ഗുണ്ട ഫ്രണ്ട്സ് നിരവധിയുണ്ട്, പാർട്ടി കിടുവാ... തുടങ്ങിയവയാണ് കഥാപാത്രത്തിന് നൽകിയിരിക്കുന്ന വിശേഷണങ്ങൾ.

വളരെ വ്യത്യസ്തമായ രീതിയിലാണ് ചിത്രത്തിലെ ക്യാരക്ടർ പോസ്റ്ററുകൾ പുറത്തുവിട്ടിരിക്കുന്നത്. ഡൊമിനിക്കിന്റെ പേഴ്സണൽ ഡിറ്റക്ടീവ് ഡയറിയുടെ ഓരോ പേജുകളായിട്ടാണ് ഓരോരുത്തരെയും പരിചയപ്പെടുത്തുന്നത്. വിജ വെങ്കടേഷ്, വിജയ് ബാബു, വഫ ഖദീജ, മീനാക്ഷി ഉണ്ണികൃഷ്ണൻ തുടങ്ങിയവരുടെ ക്യാരക്ടർ പോസ്റ്ററുകളാണ് ഇതിന് മുൻപ് പരിചയപ്പെടുത്തിയത്. ചിത്രത്തിന് യു/എ സർട്ടിഫിക്കറ്റാണ് സെൻസർ ബോർഡ് നൽകിയിട്ടുള്ളത്. ജനുവരി 23 ന് ചിത്രം ആഗോളതലത്തിൽ റിലീസ് ചെയ്യും. 

ആദ്യാവസാനം ഏറെ രസകരമായി കഥ പറയുന്ന ഒരു കോമഡി ഇൻവെസ്റ്റിഗേഷൻ ത്രില്ലറായിരിക്കും ഈ ചിത്രമെന്ന സൂചനയാണ് ട്രെയ്‌ലർ നൽകുന്നത്. ദുൽഖർ സൽമാന്റെ ഉടമസ്ഥതയിലുള്ള വേഫേറർ ഫിലിംസ് ചിത്രം കേരളത്തിൽ വിതരണം ചെയ്യും. മമ്മൂട്ടി കമ്പനിയുടെ ബാനറിൽ മമ്മൂട്ടി നിർമ്മിക്കുന്ന ആറാമത്തെ ചിത്രം കൂടിയാണ് ' 'ഡൊമിനിക് ആൻഡ് ദ ലേഡീസ് പേഴ്സ്'. ഗൗതം വാസുദേവ് മേനോൻ ആദ്യമായി മലയാളത്തിൽ സംവിധാനം ചെയ്യുന്ന ഈ ചിത്രം, ഡോക്ടർ സൂരജ് രാജൻ, ഡോക്ടർ നീരജ് രാജൻ എന്നിവർ ചേർന്നാണ് രചിച്ചിരിക്കുന്നത്. 

മമ്മൂട്ടി- ഗോകുൽ സുരേഷ് ടീം അവതരിപ്പിക്കുന്ന കഥാപാത്രങ്ങൾ നടത്തുന്ന ഡൊമിനിക് ഡിറ്റക്റ്റീവ്സ് എന്ന ഡിറ്റക്റ്റീവ് ഏജൻസി അന്വേഷിക്കുന്ന ഒരു കേസിലൂടെയാണ് ചിത്രം സഞ്ചരിക്കുന്നതെന്നു ട്രെയ്‌ലർ സൂചിപ്പിക്കുന്നു. കാണാതായ ഒരു പേഴ്‌സ് അന്വേഷിച്ചുള്ള ഓട്ടം അവരെ കൂടുതൽ സങ്കീർണ്ണമായ സാഹചര്യങ്ങളിലേക്ക് എത്തിക്കുന്നതാണ് ചിത്രത്തിന്റെ ഇതിവൃത്തമെന്ന സൂചനയും ട്രെയ്ലെർ നൽകുന്നുണ്ട്.

വമ്പൻ ആക്ഷൻ ചിത്രങ്ങളും പ്രണയ ചിത്രങ്ങളും തമിഴിൽ  ഒരുക്കിയിട്ടുള്ള ഗൗതം വാസുദേവ് മേനോൻ, തന്റെ കരിയറിൽ ഒരുക്കുന്ന ആദ്യ കോമഡി ത്രില്ലർ ആണ് 'ഡൊമിനിക് ആൻഡ് ദ ലേഡീസ് പേഴ്സ്'. ലെന, സിദ്ദിഖ്, വിജി വെങ്കടേഷ്, വിജയ് ബാബു, വിനീത്, സുഷ്മിത ഭട്ട് എന്നിവരാണ് ചിത്രത്തിലെ മറ്റു താരങ്ങൾ.