Viral Video: 16 വര്‍ഷത്തില്‍ ഇതാദ്യം; ഭാര്യയുടെ പാട്ട് പങ്കുവച്ച് വിനീത്!

16 വര്‍ഷത്തിനിടെയില്‍ ഇതാദ്യമായാണ് താന്‍ പാടുന്ന ഗാനം വീഡിയോ റെക്കോര്‍ഡ് ചെയ്യാന്‍ ദിവ്യ അനുവദിക്കുന്നത് എന്നാണ് വിനീത് പറയുന്നത്.

നടന്‍, സംവിധായകന്‍, നിര്‍മ്മാതാവ്, ഗായകന്‍, സംഗീത സംവിധായകന്‍ എന്നിങ്ങനെ മലയാള ചലച്ചിത്ര ലോകത്തെ ബഹുമുഖപ്രതിഭയാണ് വിനീത് ശ്രീനിവാസന്‍. എന്നാലിപ്പോള്‍ സാമൂഹ്യ മാധ്യമങ്ങളില്‍ വൈറലാകുന്നത് വിനീതിന്റെ ഭാര്യ ദിവ്യയുടെ പാട്ടാണ്. വിനീതാണ് തന്റെ ഔദ്യോഗിക ഇന്‍സ്റ്റഗ്രാം (Instagram) പേജിലൂടെ ദിവ്യയുടെ പാട്ട് പങ്കുവച്ചിരിക്കുന്നത്. 

16 വര്‍ഷത്തിനിടെയില്‍ ഇതാദ്യമായാണ് താന്‍ പാടുന്ന ഗാനം വീഡിയോ റെക്കോര്‍ഡ് ചെയ്യാന്‍ ദിവ്യ അനുവദിക്കുന്നത് എന്നാണ് വിനീത് (Vineeth Sreenivasan) പറയുന്നത്. പാടുന്ന വീഡിയോ റെക്കോര്‍ഡ് ചെയ്യാന്‍ ദിവ്യയെ കൊണ്ട് സമ്മതിപ്പിച്ച തന്റെ സുഹൃത്തുക്കളോട് നന്ദിയുണ്ടെന്നും വിനീത് പറയുന്നു. ദിവ്യയെ പ്രോഹത്സാഹിപ്പിച്ച് വിനീതും ഒപ്പം പാടുന്നുണ്ട്. അവതാരം എന്ന തമിഴ് ചലച്ചിത്രത്തിലെ 'തെന്‍ട്രല്‍ വന്ത് തീണ്ടും പോത്' എന്ന ഗാനമാണ് ദിവ്യ ആലപിക്കുന്നത്. 

''അവള്‍ക്കൊപ്പം 16 വര്‍ഷങ്ങള്‍... എന്നാല്‍, ഇതാദ്യമായാണ് അവള്‍ പാടുന്നത് റെക്കോര്‍ഡ് ചെയ്യാന്‍ എന്നെ അനുവദിക്കുന്നത്. എന്നെ സംബന്ധിച്ച് ഇതൊരു വലിയ കാര്യമാണ്.'' -വിനീത് കുറിച്ചു. വര്‍ഷങ്ങള്‍ നീണ്ട പ്രണയത്തിനൊടുവില്‍ 2012ലാണ് വിനീത് സഹപാഠിയായിരുന്ന ദിവ്യയെ വിവാഹം കഴിക്കുന്നത്. 2017ലാണ് ഇരുവര്‍ക്കും വിഹാന്‍ എന്ന മകന്‍ ജനിക്കുന്നത്. 2019ല്‍ മകള്‍ ഷനായയും ജനിച്ചു.