Trending Photos
6
5
13
12 "Budget 2023: ବଜେଟ ପୂର୍ବରୁ କୃଷକଙ୍କ ଲାଗି ଆସିଲା ଖୁସି ଖବର, ଜାଣନ୍ତୁ କ'ଣ ରହିଛି ମୋଦି ସରକାରଙ୍କ ଯୋଜନା")
Modi Govt Planning on Agriculture Sector: ଫେବୃଆରୀ ୧ ତାରିଖ ବୁଧବାର ସଂସଦରେ ଆଗତ ହେବ ୨୦୨୩-୨୪ ଆର୍ଥିକ ବର୍ଷର କେନ୍ଦ୍ରୀୟ ବଜେଟ। ଚଳିତ ବର୍ଷର ବଜେଟ ଜରିଆରେ କେନ୍ଦ୍ର ସରକାର କୃଷି କ୍ଷେତ୍ର ପାଇଁ ଅନେକ ସ୍ୱତନ୍ତ୍ର ଯୋଜନା ପ୍ରସ୍ତୁତ କରୁଛନ୍ତି। ଏଥର କୃଷକଙ୍କ ଆୟ ଦ୍ୱିଗୁଣିତ କରିବାକୁ ସ୍ୱତନ୍ତ୍ର ଘୋଷଣା କରାଯାଇପାରେ। ଦେଶର କୃଷି କ୍ଷେତ୍ର ୬ ବର୍ଷରେ ହାରାହାରି ବାର୍ଷିକ ଅଭିବୃଦ୍ଧି ହାର ୪.୬ ପ୍ରତିଶତ ରହିଥିବା ପଞ୍ଜୀକୃତ ହୋଇଛି। ସଂସଦରେ ଉପସ୍ଥାପିତ ହୋଇଥିବା ଅର୍ଥନୈତିକ ସର୍ଭେ ୨୦୨୨-୨୩ ରିପୋର୍ଟ ଜରିଆରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଏ ସମ୍ପର୍କରେ ଜଣାଇଛନ୍ତି।
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଦେଶର ସାମଗ୍ରିକ ବିକାଶ ତଥା ଖାଦ୍ୟ ନିରାପତ୍ତା କ୍ଷେତ୍ରରେ କୃଷି ତଥା ସହଯୋଗୀ କାର୍ଯ୍ୟକଳାପ ସହାୟକ ହୋଇଛି। ଏହା ବ୍ୟତୀତ ନିକଟ ଅତୀତରେ କୃଷିଜାତ ଦ୍ରବ୍ୟ ରପ୍ତାନୀକାରୀ ଦେଶ ଭାବେ ଉଭା ହୋଇଛି ଭାରତ। ଗତ ୨୦୨୧-୨୨ ବର୍ଷରେ ଦେଶର ରପ୍ତାନୀ ୫୦.୨ ଆମେରିକୀୟ ବିଲିୟନ ଡ଼ଲାର ହୋଇଥିବା ରେକର୍ଡ କରାଯାଇଛି।
ଅର୍ଥନୈତିକ ସର୍ଭେ ରିପୋର୍ଟ ଜରିଆରେ କୃଷି କ୍ଷେତ୍ରରେ ଦେଶ ଅନେକ ଉପଲବ୍ଧି ହାସଲ କରିଥିବା ଜଣାପଡ଼ିଛି। ଏହାର ଶ୍ରେୟ ଅନେକାଂଶରେ ସରକାରଙ୍କ ପାଖକୁ ଯାଉଛି। କାରଣ ଫସଲ ଏବଂ ପଶୁ ସମ୍ପଦ ଉତ୍ପାଦନରେ ବୃଦ୍ଧି, ଫସଲ ଉପରେ ପ୍ରଦାନ କରାଯାଉଥିବା ସର୍ବନିମ୍ନ ସହାୟକ ମୂଲ୍ୟ, ଫସଲର ବିବିଧୀକରଣକୁ ପ୍ରୋତ୍ସାହନ ଦେବା ଲାଗି ସରକାରଙ୍କ ପକ୍ଷରୁ ଅନେକ ପଦକ୍ଷେପ ନିଆଯାଇଛି। ରଣ ଉପଲବ୍ଧତା, କୃଷିକ୍ଷେତ୍ରରେ ଯାନ୍ତ୍ରୀକରଣ ସହ ଉଦ୍ୟାନ କୃଷି ଏବଂ ଜୈବିକ କୃଷି ଲାଗି ପ୍ରଦାନ କରାଯାଉଥିବା ସୁବିଧା ସୁଯୋଗ କାରଣରୁ କୃଷି କ୍ଷେତ୍ରରେ ଅନେକ ଅଭିବୃଦ୍ଧି ହୋଇଛି।
ଅର୍ଥନୈତିକ ସର୍ବେକ୍ଷଣ ଜରିଆରେ କୁହାଯାଇଛି ଯେ ସରକାରଙ୍କ ପକ୍ଷରୁ ନିଆଯାଇଥିବା ପଦକ୍ଷେପ କୃଷକଙ୍କ ଆୟ ଦ୍ୱିଗୁଣିତ କରିବା ପାଇଁ ସମ୍ବନ୍ଧିତ କମିଟି ସୁପାରିଶ ଅନୁଯାୟୀ କରାଯାଇଛି। ଏହି ସର୍ଭେ ଜରିଆରେ କୁହାଯାଇଛି ଯେ ଗତ ୨୦୧୮-୧୯ କୃଷି ବର୍ଷରୁ କେନ୍ଦ୍ର ସରକାର ଖରିଫ, ରବି ଏବଂ ଅନ୍ୟାନ୍ୟ ବାଣିଜ୍ୟିକ ଫସଲ ପାଇଁ ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି କରୁଛନ୍ତି। ଯାହା ଅଖିଳ ଭାରତୀୟ ହାରାହାରି ଉତ୍ପାଦନ ମୂଲ୍ୟ ଠାରୁ ଅତିକମରେ ୫୦ ପ୍ରତିଶତ ଅଧିକ ରହିଛି। ପରିବର୍ତ୍ତିତ ଖାଦ୍ୟପେୟ ଢାଞ୍ଚା ସହିତ ଗତି କରିବା ଏବଂ ଆତ୍ମନିର୍ଭରଶୀଳତାର ଲକ୍ଷ୍ୟ ହାସଲ କରିବା ପାଇଁ ଡାଲି ଏବଂ ତେଲ ବିହନକୁ ଅପେକ୍ଷାକୃତ ଅଧିକ ସର୍ବନିମ୍ନ ସହାୟକ ମୂଲ୍ୟ ପ୍ରଦାନ କରାଯାଇଥିଲା।
୨୦୨୨-୨୩ ବର୍ଷରେ ସରକାର କୃଷି ଋଣ ପ୍ରଦାନରେ ୧୮.୫ ଲକ୍ଷ କୋଟି ଟଙ୍କା ଧାର୍ଯ୍ୟ କରିଛନ୍ତି। ସରକାର ପ୍ରତିବର୍ଷ ଏହି ଲକ୍ଷ୍ୟକୁ କ୍ରମାଗତ ଭାବରେ ବୃଦ୍ଧି କରିଛନ୍ତି ଏବଂ ଗତ କିଛି ବର୍ଷ ଧରି ପ୍ରତିବର୍ଷ ଧାର୍ଯ୍ୟ ଲକ୍ଷ୍ୟକୁ ଅତିକ୍ରମ କରିବାରେ ମଧ୍ୟ ଏହା ସଫଳ ହୋଇଛି। ୨୦୨୧-୨୨ ବର୍ଷରେ ଏହା ୧୬.୫ ଲକ୍ଷ କୋଟିର ଲକ୍ଷ୍ୟ ଠାରୁ ପ୍ରାୟ ୧୩ ପ୍ରତିଶତ ଅଧିକ ରହିଥିଲା। ସର୍ବେକ୍ଷଣରୁ ଜଣାପଡିଛି ଯେ ଏହି ସଫଳତା ସମ୍ଭବ କାରଣ ସରକାର ପ୍ରତିଯୋଗୀତାମୂଳକ ସୁଧ ହାରରେ କୃଷକଙ୍କୁ ଅସୁବିଧାମୁକ୍ତ ଋଣ ଉପଲବ୍ଧତା ନିଶ୍ଚିତ କରିବାକୁ ଅନେକ ପଦକ୍ଷେପ ନେଇଛନ୍ତି। କିସାନ୍ କ୍ରେଡିଟ୍ କାର୍ଡ ସ୍କିମ୍ ଯାହା ଯେ କୌଣସି ସମୟରେ ଋଣ ପ୍ରଦାନ କରିଥାଏ ଏବଂ ସଂଶୋଧିତ ସୁଧ ହାରରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱଳ୍ପ ମିଆଦୀ କୃଷି ଋଣ ପ୍ରଦାନ କରିଥାଏ।
ଗତ ବର୍ଷ ଡିସେମ୍ବର ପର୍ଯ୍ୟନ୍ତ କେସିସି ସୀମା ୪ ଲକ୍ଷ ୫୧ କୋଟି ୬୭୨ ହଜାର କୋଟି ଟଙ୍କା ଥିବା ବେଳେ ୩.୮୯ କୋଟି ଯୋଗ୍ୟ କୃଷକଙ୍କୁ କିସାନ କ୍ରେଡିଟ କାର୍ଡ ପ୍ରଦାନ କରାଯାଇଛି। ୨୦୧୮-୧୯ ବର୍ଷରେ ଭାରତ ସରକାରଙ୍କ ଦ୍ୱାରା ମତ୍ସ୍ୟ ଏବଂ ପଶୁପାଳନ କରୁଥିବା କୃଷକଙ୍କ ପାଇଁ କେସିସି ସୁବିଧା ବୃଦ୍ଧି ସହିତ ବର୍ତ୍ତମାନ ମତ୍ସ୍ୟ କ୍ଷେତ୍ର ପାଇଁ ଗତ ବର୍ଷ ଅକ୍ଟୋବର ପର୍ଯ୍ୟନ୍ତ ୧ ଲକ୍ଷ କେସିସି ଏବଂ ନଭେମ୍ବର ୪ ପର୍ଯ୍ୟନ୍ତ ୯.୫ ଲକ୍ଷ ପଶୁପାଳନ ପାଇଁ ଅନୁମୋଦିତ ହୋଇଛି।
ସର୍ଭେ ଜରିଆରେ ଆହୁରି ମଧ୍ୟ କୁହାଯାଇଛି ଯେ ୧୧.୩ କୋଟି କୃଷକ ୨୦୨୨-୨୩ ଅପ୍ରେଲ-ଜୁଲାଇ ମାସରେ ପ୍ରଧାନମନ୍ତ୍ରୀ କିସାନ ସମ୍ମାନ ଯୋଜନା ଅଧୀନରେ ସରକାରଙ୍କ ଠାରୁ ଆୟ ସହାୟତା ପାଇଛନ୍ତି। ଏହି ଯୋଜନା ବିଗତ ୩ ବର୍ଷ ମଧ୍ୟରେ ଅଭାବୀ ଚାଷୀଙ୍କୁ ୨ ଲକ୍ଷ କୋଟିରୁ ଅଧିକ ଟଙ୍କାର ଆର୍ଥିକ ସହାୟତା ଯୋଗାଇ ଦେଇଛି। ଭାରତୀୟ କୃଷି ଗବେଷଣା ପରିଷଦ ଏବଂ ଆନ୍ତର୍ଜାତୀୟ ଖାଦ୍ୟ ନୀତି ଅନୁସନ୍ଧାନ ପ୍ରତିଷ୍ଠାନ ଦ୍ୱାରା ଏକ ପରୀକ୍ଷାମୂଳକ ଅଧ୍ୟୟନରୁ ଜଣାପଡିଛି ଯେ ଏହି ଯୋଜନା ଆର୍ଥିକ ଦୃଷ୍ଟିକୋଣରୁ କୃଷକଙ୍କ ଲାଗି ସାହାୟକ ହୋଇପାରିଛି।
