Ind vs Eng 5th T20: ଇଂଲଣ୍ଡକୁ ୧୫୦ ରନରେ ହରାଇଲେ ଟିମ୍ ଇଣ୍ଡିଆ, ଚମକିଲେ ଅଭିଷେକ-ଶାମୀ

Ind vs Eng 5th T20: ଭାରତୀୟ ଦଳ ମୁମ୍ବାଇରେ ଖେଳାଯାଇଥିବା ପଞ୍ଚମ ଟି-୨୦ ମ୍ୟାଚ୍‌ରେ ଇଂଲଣ୍ଡକୁ ପରାସ୍ତ କରି ୪-୧ରେ ସିରିଜ୍ ଜିତି ନେଇଛି। ଏହି ମ୍ୟାଚ୍ ସମ୍ପୂର୍ଣ୍ଣ ଭାବରେ ଦଳର ପ୍ରାରମ୍ଭିକ ବ୍ୟାଟ୍ସମ୍ୟାନ୍ ଅଭିଷେକ ଶର୍ମାଙ୍କ ନାମରେ ଥିଲା। ଯିଏ ୧୩୫ ରନର ରେକର୍ଡ ବ୍ରେକିଂ ଇନିଂସ ଖେଳିଥିଲେ।

Ind vs Eng 5th T20: ଅଭିଷେକ ଶର୍ମାଙ୍କ ବିସ୍ଫୋରକ ଶତକ ଏବଂ ବୋଲରଙ୍କ ମିଳିତ ପ୍ରଦର୍ଶନ ବଳରେ ଭାରତ ରବିବାର ଦିନ ପଞ୍ଚମ ଟି-୨୦ରେ ଇଂଲଣ୍ଡକୁ ୧୫୦ ରନରେ ପରାସ୍ତ କରିଛି। ଏହା ସହିତ ଭାରତ ୪-୧ରେ ସିରିଜ୍ ଜିତିନେଇଛି। ପ୍ରଥମେ ବ୍ୟାଟିଂ କରି ଟିମ୍ ଇଣ୍ଡିଆ ନିର୍ଦ୍ଧାରିତ ୨୦ ଓଭରରେ ୯ ୱିକେଟ୍ ହରାଇ ୨୪୭ ରନ୍ କରିଥିଲା। ଏହି ସ୍କୋର ଆଗରେ ଇଂଲଣ୍ଡ ମାତ୍ର ୯୭ ରନ୍ କରି ଅଲ୍ ଆଉଟ୍ ହୋଇଯାଇଥିଲା।

ଅଭିଷେକ ଏହି ମ୍ୟାଚ୍‌ରେ ଏକ ରେକର୍ଡ ବ୍ରେକିଂ ଇନିଂସ ଖେଳିଥିଲେ ଏବଂ ୧୩୫ ରନ୍ ସ୍କୋର କରିଥିଲେ। ନିଜ ଇନିଂସରେ ଶର୍ମା ସାତଟି ଚୌକା ଏବଂ ୧୩ଟି ଛକା ମାରିଥିଲେ। ସେ ଏକାକୀ ଇଂଲଣ୍ଡର ବୋଲରମାନଙ୍କର ନିର୍ଦ୍ଧୁମ ପଟିଥିଲେ। ସେ ଟି-୨୦ ଆନ୍ତର୍ଜାତୀୟରେ ଶତକ ହାସଲ କରିବାରେ ତୃତୀୟ ଦ୍ରୁତତମ ବ୍ୟାଟସମ୍ୟାନ୍ ମଧ୍ୟ ହୋଇଛନ୍ତି। ଅଭିଷେକଙ୍କ ନାମରେ ଟି-୨୦ ଆନ୍ତର୍ଜାତୀୟରେ ଭାରତ ପାଇଁ ସର୍ବାଧିକ ବ୍ୟକ୍ତିଗତ ସ୍କୋର କରିବାର ରେକର୍ଡ ମଧ୍ୟ ଅଛି। ପୂର୍ବରୁ ଏହି ରେକର୍ଡ ଶୁବମନ ଗିଲଙ୍କ ନାମରେ ଥିଲା। ଗିଲ୍ ଜାନୁଆରୀ ୨୦୨୩ ରେ ଅହମ୍ମଦାବାଦରେ ନ୍ୟୁଜିଲ୍ୟାଣ୍ଡ ବିପକ୍ଷରେ ୧୨୬ ରନ୍ କରିଥିଲେ।

ଇଂଲଣ୍ଡ ପାଖରେ ୨୪୮ ରନର ଟାର୍ଗେଟକୁ ପିଛା କରିବାର ଶକ୍ତି ଥିଲା କିନ୍ତୁ ମୁମ୍ବାଇ ୱାଙ୍ଖଡେ ୱିକେଟ୍ ଏହାର ବ୍ୟାଟସମ୍ୟାନଙ୍କୁ ସୁହାଇ ନଥିଲା ଏବଂ ସେମାନେ ଗୋଟିଏ ପରେ ଗୋଟିଏ ୱିକେଟ୍ ହରାଇ ଚାଲିଥିଲେ। ତୃତୀୟ ଓଭରର ପ୍ରଥମ ବଲ୍‌ରେ ବେନ୍ ଡକେଟ (୦)ଙ୍କୁ ଆଉଟ୍ କରି ମହମ୍ମଦ ଶାମି ଭାରତକୁ ପ୍ରଥମ ସଫଳତା ଦେଇଥିଲେ। ଯଦିଓ ଫିଲ୍ ସଲ୍ଟ ଅନ୍ୟ ପାର୍ଶ୍ୱରୁ ଦ୍ରୁତ ଗତିରେ ସ୍କୋର କରୁଥିଲେ କିନ୍ତୁ ପଞ୍ଚମ ଓଭରର ପ୍ରଥମ ବଲ୍‌ରେ ବରୁଣ ଚକ୍ରବର୍ତ୍ତୀ ଇଂଲଣ୍ଡ ଅଧିନାୟକ ଜସ୍ ବଟଲରଙ୍କୁ ଆଉଟ୍ କରିବା ପରେ ଇଂଲଣ୍ଡର ଇନିଂସ ଭୁଶୁଡ଼ି ପଡିଥିଲା।

ଏହିଠାରୁ ଇଂଲଣ୍ଡ ଦଳ ଦଶମ ଓଭର ପର୍ଯ୍ୟନ୍ତ ପ୍ରତି ଓଭରରେ ୱିକେଟ ହରାଇଥିଲା। ହ୍ୟାରି ବ୍ରୁକ୍ (୨), ଲିଆମ୍ ଲିଭିଙ୍ଗ୍ଷ୍ଟୋନ୍ (୯), ଜାକବ୍ ବେଥେଲ୍ (୧୦), ବାରିଡେନ୍ କାର୍ସେ (୩), ଜେମି ଓଭରଟନ୍ (୧) ପାଭିଲିୟନ୍ ଫେରିଥିଲେ। ସଲ୍ଟ ୨୩ ବଲ୍‌ରେ ସାତ ଚୌକା ଏବଂ ତିନୋଟି ଛକା ସହାୟତାରେ ୫୫ ରନ୍ କରି ଶିବମ୍ ଦୁବେଙ୍କ ଶିକାର ହୋଇଥିଲେ।

ଇଂଲଣ୍ଡ ଅଧିନାୟକ ବଟଲର୍ ଟସ୍ ଜିତି ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲେ। ପ୍ରଥମ ବଲରେ ଛକା ମାରିବା ପରେ ସଞ୍ଜୁ ସାମସନ ନିଜ ଇନିଂସକୁ ଅଧିକ ଆଗକୁ ନେଇପାରି ନଥିଲେ। ମାର୍କ ଉଡଙ୍କ ପୁଣିଥରେ ଏକ ସର୍ଟ ବଲରେ ଆଉଟ୍ ହୋଇଥିଲେ। ସେ ସାତଟି ବଲ୍ ରୁ ୧୬ ରନ୍ କରିଥିଲେ। ତିଲକ ବର୍ମା ୧୫ ବଲ୍ ରେ ୨୪ ରନ୍ ର ଏକ ଇନିଂସ ଖେଳିଥିଲେ। ଅଧିନାୟକ ସୂର୍ଯ୍ୟକୁମାର ଯାଦବ ପୁଣି ଥରେ ବିଫଳ ହେଲେ ଏବଂ ମାତ୍ର ଦୁଇ ରନ୍ କରିପାରିଲେ। ଏହି ସମୟରେ ଅଭିଷେକ ଇଂଲଣ୍ଡ ବୋଲରମାନଙ୍କୁ ନିରନ୍ତର ପ୍ରହାର କରୁଥିଲେ। ଏଥିରେ ଶିବମ୍ ଦୁବେ ମଧ୍ୟ ତାଙ୍କୁ ସମର୍ଥନ କରିଥିଲେ। ଦୁବେ ୧୩ ବଲ୍ ରୁ ୩୦ ରନ୍ କରି ଆଉଟ୍ ହୋଇଥିଲେ। ସେ ତିନୋଟି ଚୌକା ଏବଂ ଦୁଇଟି ଛକା ମାରିଥିଲେ।