bhubaneswar news: ବିଜେବି କଲେଜରେ ଛାତ୍ର ଉତ୍ତେଜନା

bhubaneswar news: ଭୁବନେଶ୍ୱର: ବିଜେବି କଲେଜରେ ଦେଖାଦେଇଛି ଛାତ୍ର ଉତ୍ତେଜନା। ଉତ୍ୟକ୍ତ ଛାତ୍ରଛାତ୍ରୀ କଲେଜର ମୁଖ୍ୟ ଫାଟକରେ ତାଲା ପକାଇ ରାଜରାସ୍ତା ଅବରୋଧ କରିଥିବାର ଖବର ସାମ୍ନାକୁ ଆସିଛି। ମିଳିଥିବା ସୂଚନା ଅନୁଯାୟୀ କ୍ୟାମ୍ପସ ପରିସରରୁ ପୂର୍ବତନ ଛାତ୍ରଙ୍କୁ ପୋଲିସ ଉଠାଇ ନେବା କାରଣରୁ ଏଭଳି ଉତ୍ତେଜନାପୂର୍ଣ୍ଣ ପରିସ୍ଥିତି ସୃଷ୍ଟି ହୋଇଛି। ପୋଲିସ ଉଠାଇ ନେଇଥିବା ଛାତ୍ରଙ୍କ ନାଁ ସ୍ମୃତିରଞ୍ଜନ ପଣ୍ଡା। 

ମିଳିଥିବା ସୂଚନା ଅନୁଯାୟୀ ସ୍ମୃତି ଗତକାଲି ଏଣ୍ଟ୍ରାନ୍ସ ଦେବାକୁ କଲେଜ ଆସିଥିଲେ। ପରେ ସନ୍ଧ୍ୟାରେ ହଷ୍ଟେଲ ବାବଦରେ ବୁଝିବାକୁ କଲେଜ କ୍ୟାମ୍ପସକୁ ଆସିଥିଲେ। କିନ୍ତୁ ରାତି ୮ଟା ବେଳେ କଲେଜ କ୍ୟାମ୍ପସରେ ସ୍ମୃତି ଥିବା ସମୟରେ ସ୍ଥାନୀୟ ପୋଲିସ ସୂଚନାପାଇ ତାଙ୍କୁ ଉଠାଇ ନେଇଥିଲା। ଏହି ଖବର ପ୍ରଚାର ହେବା ପରେ କଲେଜ ଛାତ୍ରଛାତ୍ରୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। 

ପରେ ରାତିରେ ହଷ୍ଟେଲ ବୁଝିବାକୁ ଆସିଥିବା ବେଳେ ପୋଲିସ ଉଠାଇ ନେଇଥିବା ଅଭିଯୋଗ କରିଛନ୍ତି କଲେଜ ଛାତ୍ର। କେବଳ ଗୋଟିଏ ଗୋଷ୍ଠୀର କଥା ପୋଲିସ ଶୁଣୁଛି, ଆମେ ଡାକିଲେ ପୋଲିସ ଆସୁନି, ଏପରି କିଛି କଥାକୁ ନେଇ ବିଜେବି କଲେଜରେ ପୁଣି ଛାତ୍ର ଅସନ୍ତୋଷ ଦେଖା ଦେଇଛି। କଲେଜରେ ସମସ୍ତ କ୍ଲାସ ବନ୍ଦ ରହିଥିବା ବେଳେ, ଛାତ୍ରଛାତ୍ରୀମାନେ କଲେଜ ଗେଟରେ ତାଲା ପକାଇ ଆନ୍ଦୋଳନ କରୁଛନ୍ତି।