TikTok Ban:ବିଶ୍ୱର ଶକ୍ତିଶାଳୀ ରାଷ୍ଟ୍ରଙ୍କୁ ‘ଟିକ୍ ଟକ୍’ ଡର,ବ୍ୟାନ୍ କରିବ ଆମେରିକା

TikTok Ban: ଆମେରିକାର ହାଉସ୍ ଅଫ୍ ରିପ୍ରେଜେଣ୍ଟେଣ୍ଟିଭ୍ ଏକ ଐତିହାସିକ ବିଲ୍ ପାରିତ ହୋଇଛି। ଏହି ବିଧେୟକ ଚାଇନିଜ୍ ଆପ୍ ଟିକ୍-ଟକ୍ ଉପରେ ପ୍ରତିବନ୍ଧକ ଲଗାଇବା ଅଧିକାର ସରକାରଙ୍କୁ ଦେଇଛି। ଏହି ବିଲ୍ ଅନୁଯାୟୀ, ଟିକଟୋକର ପ୍ୟାରେଣ୍ଟ୍ କମ୍ପାନୀ 'ବାଇଟ୍ ଡାନ୍ସ'କୁ ଆମେରିକାରେ ନିଜର ଅଂଶଧନ ବିକ୍ରୟ କରିବାକୁ ୬ ମାସ ସମୟ ଦିଆଯିବ। ତେବେ ବିଲକୁ ସିନେଟ ଏବଂ ରାଷ୍ଟ୍ରପତିଙ୍କ  ଅନୁମୋଦନ ମିଳିନାହିଁ । ସିନେଟ୍ ଓ ରାଷ୍ଟ୍ରପତିଙ୍କ ଅନୁମୋଦନ ପରେ ହିଁ ବିଧେୟକ କାର୍ଯ୍ୟକାରୀ ହୋଇପାରିବ । ସୂଚନାଯୋଗ୍ଯ ଯେ, ଦୀର୍ଘ ଦିନ ଧରି ଟିକଟକ୍ ବିରୋଧରେ ଚୀନ୍ ସରକାରଙ୍କ ପାଇଁ କାମ କରୁଥିବା  ଅଭିଯୋଗ ଆସୁଛି । ଆମେରିକାରେ TikTok ର ୧୭୦ ମିଲିୟନ ବ୍ୟବହାରକାରୀ ଅଛନ୍ତି।

ଟିକଟକ ନିଷେଧାଦେଶ ଆମେରିକା ପାଇଁ ନୂଆ ହୋଇପାରେ କିନ୍ତୁ ଏହା ବିଶ୍ୱ ପାଇଁ ନୂଆ ନୁହେଁ। ଦୁନିଆର ଅନେକ ଦେଶ ଟିକଟକ ଉପରେ ପ୍ରତିବନ୍ଧକ ଲଗାଇ ସାରିଛନ୍ତି। ଟିକଟକ ନିଷେଧ ପଛରେ ପ୍ରତ୍ୟେକ ଦେଶର ଭିନ୍ନଭିନ୍ନ ତର୍କ ରହିଛି। ଟିକଟକକୁ ନିଷିଦ୍ଧ କରିଥିବା ଦେଶମାନଙ୍କ ମଧ୍ୟରେ ଭାରତର ନାମ ପ୍ରଥମ ସ୍ଥାନରେ ଅଛି । ଆସନ୍ତୁ ଜାଣିବା କେଉଁ ଦେଶସବୁ ଟିକଟକକୁ ନିଷିଦ୍ଧ କରିଛନ୍ତି ଏବଂ କାହିଁକି?

ଭାରତ ପ୍ରଥମେ ନିଷେଧ କରିଥିଲା

ଏହି ତାଲିକାର ପ୍ରଥମ ସ୍ଥାନରେ ଅଛି  ଭାରତ। ୨୦୨୦ ରେ ଡୋକଲାମରେ ଭାରତୀୟ ଓ  ଚୀନ୍ ସୈନିକଙ୍କ ମଧ୍ୟରେ ହୋଇଥିବା ସାଂଘାତିକ ସଂଘର୍ଷ ପରେ ଟିକଟକକୁ ଭାରତରେ ନିଷେଧ କରାଯାଇଥିଲା। ଜୁନ୍ ୨୦୨୦ରେ ଏହି ସୀମା ବିବାଦରେ ୨୦ ଜଣ ଭାରତୀୟ ସୈନିକ ନିହତ ହେବା ପରେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଥିଲା। ଯାହା ପରେ ଭାରତ ଟିକଟକ ଏବଂ ମେସେଜିଂ ଆପ୍ ୱିଚ୍ୟାଟ୍  ସହିତ ୫୦ ରୁ ଅଧିକ ଚାଇନିଜ୍ ଆପ୍ ଉପରେ ପ୍ରତିବନ୍ଧକ ଲଗାଇଥିଲା। ଫୋର୍ବସ୍ ରିପୋର୍ଟ ଅନୁଯାୟୀ, ସେତେବେଳେ ଭାରତରେ ପ୍ରାୟ ୧୫୦ ନିୟୁତ ଟିକଟକ୍ ବ୍ୟବହାରକାରୀ ଥିଲେ, ଯାହା ସେହି ସମୟରେ ଏହାର ସର୍ବ ବୃହତ ବୈଦେଶିକ ବଜାର ଥିଲା।

ବ୍ରିଟେନରେ ସରକାରୀ କର୍ମଚାରୀଙ୍କୁ ଟିକଟକ୍ ମନା

ଗତ ବର୍ଷ ସରକାରୀ ମନ୍ତ୍ରୀ ଏବଂ ସରକାରୀ କର୍ମଚାରୀଙ୍କ ଦ୍ୱାରା ଟିକଟକ ବ୍ୟବହାରକୁ ବ୍ରିଟେନ ନିଷେଧ କରିଥିଲା। ଏହା ପଛରେ ସୁରକ୍ଷାଗତ କାରଣ ଦର୍ଶାଯାଇଥିଲା । ପରେ ବ୍ରିଟିଶ ସଂସଦ  ଏହାର ନେଟୱର୍କ ସହିତ ସଂଯୁକ୍ତ ଉପକରଣ ଏବଂ ଇଲେକ୍ଟ୍ରୋନିକ୍ ଉପକରଣରୁ ଟିକଟକକୁ ବ୍ୟାନ୍  କରିଥିଲା।

ଚୀନ୍‌ର ବନ୍ଧୁ ପାକିସ୍ତାନ ମଧ୍ୟ ନିଷେଧ କରିଥିଲା

୨୦୨୧ ମସିହାରେ, 'ଅଶ୍ଳୀଳତା ଏବଂ ଅନୈତିକତା' ପ୍ରସାର ଅଭିଯୋଗ ପରେ ପାକିସ୍ତାନୀ କର୍ତ୍ତୃପକ୍ଷ ଟିକଟକ ଉପରେ ପ୍ରତିବନ୍ଧକ ଲଗାଇଥିଲେ। ଆସୋସିଏଟେଡ୍ ପ୍ରେସ ଅନୁଯାୟୀ, ଏକ ମାସ ତଳେ ଏହି ପ୍ରତିବନ୍ଧକ ହଟାଯାଇଥିଲା।

ଅଷ୍ଟ୍ରେଲିଆ

ଗତ ବର୍ଷ ଅଷ୍ଟ୍ରେଲିଆ ସରକାର ଗୁପ୍ତଚର ଏବଂ ସୁରକ୍ଷା ଏଜେନ୍ସି ସହିତ ପରାମର୍ଶ ପରେ ଦେଶରେ ଟିକଟୋକ ଉପରେ ପ୍ରତିବନ୍ଧକ ଲଗାଇଥିଲେ। ଏପ୍ରିଲରେ ସରକାର ଏକ ନିର୍ଦ୍ଦେଶ ଜାରି କରି ଏହି ଆପକୁ ବାରଣ କରିଥିଲେ।

କାନାଡା

ଫେବୃଆରୀ ୨୦୨୩ ରେ କାନାଡା ମଧ୍ୟ ଟିକଟକ ଉପରେ ପ୍ରତିବନ୍ଧକ ଲଗାଇଥିଲା। ଏହି ପ୍ରତିବନ୍ଧକ ପଛରେ କାନାଡା ସରକାର ସୁରକ୍ଷାଗତ କାରଣ ଦର୍ଶାଇଥିଲେ।

ଇଣ୍ଡୋନେସିଆରେ ଅଶ୍ଳୀଳତାର ପ୍ରସାରକୁ ନେଇ ବିବାଦ

ବୟସ୍କ ଏବଂ ବିଭ୍ରାନ୍ତିକର ବିଷୟବସ୍ତୁ ପ୍ରସାରଣର କାରଣ ଦର୍ଶାଇ ଇଣ୍ଡୋନେସିଆ ୨୦୧୮ରେ TikTok କୁ ଅସ୍ଥାୟୀ ଭାବରେ ନିଷିଦ୍ଧ କରିଥିଲା ।  ପରେ ଟିକଟୋକ ଇଣ୍ଡୋନେସିଆ ସରକାରଙ୍କ ସର୍ତ୍ତରେ ରାଜି ହେବାରୁ ଏକ ସପ୍ତାହ ତଳେ ଏହି ପ୍ରତିବନ୍ଧକ ହଟାଯାଇଛି ।

ସୋମାଲିଆରେ ମଧ୍ୟ କାମ କରେ ନାହିଁ

ସୋମାଲିଆର ଯୋଗାଯୋଗ ମନ୍ତ୍ରୀ ଟିକଟକ ଉପରେ ପ୍ରତିବନ୍ଧକ ଲଗାଇ କହିଥିଲେ ଯେ ଯୁବପିଢୀ  ଉପରେ କ୍ଷତିକାରକ ପ୍ରଭାବ ପକାଉଥିବା ଆପ୍ ବନ୍ଦ କରିବୁ। ଟିକଟୋକ ସହିତ ସୋମାଲିଆ ସରକାର ଟେଲିଗ୍ରାମ ଏବଂ ଅନଲାଇନ୍ ଜୁଆ ୱେବସାଇଟ୍ 1xBet ଉପରେ ମଧ୍ୟ ପ୍ରତିବନ୍ଧକ ଲଗାଇଥିଲେ।

ଏହା ବ୍ୟତୀତ ଟିକଟକ ଏହି ସବୁ ଦେଶରେ ମଧ୍ୟ  ନିଷେଧ

-ନେପାଲ୍

-ନିଉଜିଲାଣ୍ଡ୍

-ଆଫଗାନିସ୍ତାନ

-ୟୁରୋପିଆନ୍ ୟୁନିଅନ୍