CRIME: ആറ്റിങ്ങലിൽ വീട് കുത്തിത്തുറന്ന് മോഷണം; 2 പേർ അറസ്റ്റിൽ

തിരുവനന്തപുരം: ആറ്റിങ്ങലിൽ വീട് കുത്തിത്തുറന്ന് മോഷണം നടത്തിയ പ്രതികൾ അറസ്റ്റിൽ. ആറ്റിങ്ങൽ മാമത്തുള്ള നിജാമിന്റെ വീട്ടിലാണ് മോഷണം നടന്നത്. ഒക്ടോബർ 26നാണ് കേസിനാസ്പദമായ സംഭവം നടന്നത്. വീട് കുത്തിത്തുറന്ന് അലമാരയിൽ സൂക്ഷിച്ചിരുന്ന രണ്ടര പവന്റെ സ്വർണ്ണാഭരണങ്ങളും 3000 രൂപയും പ്രതികൾ കവർന്നു. അരുവിക്കര സ്വദേശി മണികണ്ഠൻ വർക്കല സ്വദേശി വിഷ്ണു.ജി.വിക്രമൻ എന്നിവരാണ് അറസ്റ്റിലായത്. 

കേസ് രജിസ്റ്റർ ചെയ്ത് അന്വേഷണം നടത്തിവരവേ പ്രതികളെക്കുറിച്ച് തിരുവനന്തപുരം റൂറിൽ ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ആറ്റിങ്ങൽ ഡിവൈഎസ്പി ജയകുമാറിന്റെ നിർദ്ദേശാനുസരണം ആറ്റിങ്ങൽ ഇൻസ്പെക്ടർ മുരളീകൃഷ്ണൻ എസ് ഐ മാരായ അഭിലാഷ് നുജുമുദീൻ എ എസ് ഐ രാജീവൻ സീനിയർ സി പി ഓ മനോജ് കുമാർ സി പി ഓ റിയാസ് എന്നിവർ ഉൾപ്പെട്ട അന്വേഷണസംഘമാണ് പ്രതികളെ അറസ്റ്റ് ചെയ്തത്.

പ്രതികൾ വില്പന നടത്തിയതും പണയം വെച്ചതുമായ മോഷണ മുതലുകൾ കണ്ടെടുത്തു. ഒന്നാം പ്രതിയായ മണികണ്ഠൻ പാങ്ങോട്, ചിറയിൻകീഴ്, ആറ്റിങ്ങൽ എന്നീ സ്റ്റേഷനുകളിലെ കൊലപാതകം, മോഷണം തുടങ്ങിയ കേസുകളിൽ ഉൾപ്പെട്ട പ്രതിയാണ്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.