Wayanad Tiger Attack: വയനാട്ടിൽ വീണ്ടും കടുവ ആക്രമണം; അമരക്കുനിയിൽ തെർമൽ ഡ്രോൺ പരിശോധന തുടരുന്നു

ഡ്രോൺ‌ വഴി വനംവകുപ്പ് തിരച്ചിൽ നടത്തുന്നതിനിടെയാണ് വീണ്ടും കടുവ ആടിനെ ആക്രമിച്ച് കൊന്നത്.

വയനാട്: വയനാട്ടിൽ വീണ്ടും കടുവ ആക്രമണം. അമരക്കുനിയിൽ നിന്ന് രണ്ട് കിലോമീറ്റർ അകലെയാണ് കടുവയുടെ ആക്രമണമുണ്ടായത്. തൂപ്ര അങ്കണവാടിക്ക് സമീപം ചന്ദ്രൻ പെരുംപറമ്പിലിന്റെ ആടിനെ കടുവ കൊന്നു. കടുവയ്ക്കായി വനംവകുപ്പ് ഡ്രോൺ‌ വഴി തിരച്ചിൽ തുടരുന്നതിനിടെയാണ് വീണ്ടും കടുവയുടെ ആക്രമണമുണ്ടായത്. ചന്ദ്രന്റെ വീടിനോട് ചേർന്നുള്ള ആട്ടിൻകൂട്ടിലാണ് കടുവയെത്തിയത്. ഇതിന് പിന്നാലെ വനംവകുപ്പ് ഉദ്യോ​ഗസ്ഥർ കടുവയ്ക്കായി തിരച്ചിൽ നടത്തിയെങ്കിലും കണ്ടെത്താനായില്ല. കൂട്ടിൽ ആടിന്റെ ജഡം വച്ച് കടുവയെ മയക്കുവെടി വയ്ക്കാൻ തയാറെടുക്കുകയാണ് വനംവകുപ്പ്. ഒരാഴ്ചയ്ക്കിടെ അഞ്ചാമത്തെ ആടിനെയാണ് കടുവ പിടികൂടുന്നത്. 

അമരക്കുനി ഊട്ടിക്കവലയിലെ ബിജുവിന്‍റെ വീട്ടിലെ ആടിനെ കഴിഞ്ഞ ദിവസം കടുവ കൊന്നിരുന്നു. കുങ്കി ആനകളെ ഉപയോഗിച്ചുള്ള തിരച്ചിൽ കഴിഞ്ഞ ദിവസവും നടത്തിയിരുന്നു. തെ​ർ​മ​ൽ ഡ്രോ​ൺ ഉ​പ​യോ​ഗി​ച്ചും തിരച്ചിൽ നടത്തുകയാണ്. മയക്കുവെടിവിദഗ്ധനായ ചീഫ് ഫോറസ്റ്റ് വെറ്ററിനറി ഓഫിസര്‍ ഡോ. അരുണ്‍ സഖറിയയുടെ നേതൃത്വത്തില്‍ ആര്‍.ആര്‍.ടി. സംഘം സ്ഥലത്തുണ്ട്. കാപ്പി സെറ്റ്, തൂപ്ര, അമരക്കുനി പ്രദേശത്തെ ജനങ്ങൾ ജാഗ്രത പാലിക്കണമെന്ന് വനം വകുപ്പ് നിർദേശം നൽകിയിരുന്നു. അതേസമയം പ്രദേശത്തെ ജനങ്ങൾ കടുവ ഭീതി മൂലം കടുത്ത ആശങ്കയിലും പ്രതിഷേധത്തിലുമാണ്.