માત્ર એક જ વાર કરવાનું રહેશે પેમેન્ટ...પછી ગમે ત્યારે ફ્રીમાં કરી શકશો ટોલ ક્રોસ, સરકાર બનાવી રહી છે શાનદાર પ્લાન

Toll Plaza on Highway: જો બધું બરાબર રહ્યું તો આવનાર સમયમાં દેશમાં હાઈવે પર મુસાફરી કરવી ખૂબ જ સરળ અને સુવિધાજનક બની જશે. મીડિયા રિપોર્ટમાં દાવો કરવામાં આવી રહ્યો છે કે ભારત સરકાર વાર્ષિક અને આજીવન ટોલ પાસ શરૂ કરવાની યોજના બનાવી રહી છે.  આ યોજના દ્વારા સરકાર હાઈવે પર દરરોજ મુસાફરી કરતા લોકોને મુશ્કેલીમુક્ત અને ઓછા ખર્ચે ટોલ પાસ મળી રહે તેની તૈયારી કરી રહી છે. આ યોજનાનો ઉદ્દેશ ટોલ પ્લાઝા પર ભીડ ઘટાડવાનો અને હાલની ટોલ પેમેન્ટ સિસ્ટમનો સસ્તો વિકલ્પ પૂરો પાડવાનો છે.

મીડિયા અહેવાલ મુજબ, રોડ ટ્રાન્સપોર્ટ અને હાઈવે મંત્રાલય આ પ્રસ્તાવની સમીક્ષા કરવાના અંતિમ તબક્કામાં છે. નવી સિસ્ટમ હેઠળ ટોલમાંથી પસાર થનારા લોકો પાસે બે વિકલ્પ હશે. પ્રથમ કે તેઓ વાર્ષિક ટોલ પાસ મેળવી શકશે, જે 3000 રૂપિયાનો થશે. આ પાસ દ્વારા તમે એક વર્ષ સુધી નેશનલ હાઈવે અને એક્સપ્રેસ વે પર મુસાફરી કરી શકશો. તેવી જ રીતે આજીવન ટોલ પાસ 15 વર્ષ માટે માન્ય રહેશે. આ પાસ 30,000 રૂપિયાનો હશે, તેથી વારંવાર ટોલ પેમેન્ટ કરવાની જરૂર રહેશે નહીં. જો અહેવાલો પર વિશ્વાસ કરવામાં આવે તો, આ પાસ હાલની FASTag સિસ્ટમમાં સામેલ કરવામાં આવશે.

આ સિસ્ટમ માત્ર ફાસ્ટેગમાં લાગુ કરવામાં આવશે

જો હાઈવે પર પાસ સિસ્ટમ લાગુ કરવામાં આવે તો ફાસ્ટેગમાં કોઈપણ વધારાના ખર્ચ વિના સરળતાથી ફેરફાર કરી શકાશે. હાલમાં હાઈવે પર વારંવાર મુસાફરી કરનારાઓ જ માસિક ટોલ પાસ લઈ શકે છે. માસિક ટોલ પાસની કિંમત મહિનાની રૂપિયા 340 અને વર્ષની 4,080 રૂપિયા છે. જો કે, આવા લોકો માટે આ પાસ ઓછા અનુકૂળ છે કારણ કે તે માત્ર એક ટોલ પ્લાઝા પર માન્ય છે. આ મર્યાદા હટાવાથી વાર્ષિક અને આજીવન ટોલ પાસ વધુ અસરકારક બનશે. આ સાથે યુઝર્સને દેશભરના તમામ ટોલ માર્ગો પર કોઈપણ અવરોધ વિના અને સરળતાથી મુસાફરી કરવાની સુવિધા મળશે.

ખાનગી વાહનોથી મળે છે 26 ટકા ટોલ બૂથ 

એવો અંદાજ છે કે નવી સિસ્ટમથી તે વાહન માલિકોને ઘણો ફાયદો થશે જેઓ વારંવાર નેશનલ હાઈવે પર મુસાફરી કરે છે. ખાનગી વાહનો હાલમાં કુલ ટોલ આવકમાં 26 ટકા ફાળો આપે છે અને ખાનગી વાહનો પીક અવર્સ દરમિયાન ટોલ બૂથ પર ટ્રાફિક જામનું મુખ્ય કારણ પણ છે. સરકારને આશા છે કે ટોલ વસૂલવાની પ્રક્રિયાને સરળ બનાવીને ટોલ ભરવામાં લાગતો સમય ઘટાડી શકાશે અને નિયમિત હાઈવે પરથી પસાર થતા લોકોને રાહત થશે. તેનાથી લોકોને જરૂરી આર્થિક રાહત પણ મળશે.

લોકો પર નાણાકીય બોજ ઘટાડવા માટે માર્ગ પરિવહન અને ધોરીમાર્ગ મંત્રાલય વાર્ષિક અને આજીવન પાસ લાવવાની સાથે પ્રતિ કિલોમીટર ટોલ ફી ઘટાડવાના માર્ગો પર વિચાર કરી રહ્યું છે. તાજેતરના એક ઇન્ટરવ્યુમાં કેન્દ્રીય માર્ગ પરિવહન મંત્રી નીતિન ગડકરીએ જણાવ્યું હતું કે સરકારે ટોલ ટેક્સની ચિંતાઓ અંગે તેનું રીસર્ચ પૂરું કર્યું છે અને ફરિયાદોના નિવારણ માટે એક યોજના અમલમાં મૂકવાની તૈયારી કરી રહી છે.