ટાટાની આ કંપનીને લાગ્યો ઝટકો, શેર વેચવા મચી હોડ, 28 દિવસમાં 27% ઘટ્યો છે ભાવ

નવી દિલ્હીઃ ટાટા ગ્રુપની કંપની વોલ્ટાસ લિમિટેડના શેરમાં ગુરૂવારે 4 ટકાથી વધુનો ઘટાડો થયો હતો. કંપનીનો શેર 1345 રૂપિયાના ઈન્ટ્રા ડે લો પર આવી ગયો હતો. શેરમાં આ ઘટાડા પાછળ એક સમાચાર છે. હકીકતમાં કતરમાં કાયદાકીય લડાઈમાં કંપનીને ઝટકો લાગ્યો છે. ત્યારબાદ ટાટા સમૂહની કંપની વોલ્ટાસ લિમિટેડના શેરમાં ગુરૂવારે જોરદાર ઘટાડો થયો છે. મહત્વનું છે કે કંપનીના શેર આ વર્ષે અત્યાર સુધી 28 કારોબારી દિવસમાં આશરે 27 ટકા તૂટી ચૂક્યો છે.

શું છે મામલો?
OHL ઇન્ટરનેશનલ, સ્પેન અને કોન્ટ્રાક (સાયપ્રસ) લિમિટેડ વચ્ચેના સંયુક્ત સાહસ સાથે સંકળાયેલા કેસમાં, કંપનીને QAR 167.720 મિલિયન (અંદાજે ₹402 કરોડ) ચૂકવવાનો નિર્દેશ આપવામાં આવ્યો છે. કાનૂની વિવાદ વોલ્ટાસ અને OHL&C કન્સોર્ટિયમ વચ્ચેના પેટા-કોન્ટ્રેક્ટ ડીલને લઈને હતો, જે અંતર્ગત વોલ્ટાસે 14 ઓગસ્ટ, 2023ના રોજ કતારના દોહામાં ઈન્વેસ્ટમેન્ટ એન્ડ ટ્રેડ કોર્ટમાં જોઈન્ટ વેન્ચર (OHLC JV) સામે કેસ દાખલ કર્યો હતો. કંપનીએ અધૂરા કામ, પ્રોજેક્ટની વિવિધતા અને વિલંબ માટે QAR 771.632 મિલિયન (₹1,754.69 કરોડ) વસૂલવાની માંગ કરી હતી. જવાબમાં, OHLC JV એ ₹7,384.83 કરોડનો કાઉન્ટર ક્લેમ કર્યો હતો, જેમાં ₹6,409 કરોડની ખોટ સામેલ હતી. વોલ્ટાસે આ દાવાઓનો વિરોધ કર્યો અને દલીલ કરી કે તેણે તમામ કરારની જવાબદારીઓ પૂર્ણ કરી છે. વોલ્ટાસે QAR 166.720 મિલિયન (₹373 કરોડ) ની બે બેંક ગેરંટી જારી કરી હતી, જેને OHLC JV એ રોકડ કરવાની માંગ કરી હતી. જો કે, OHLC JV ને બેંક સામે કાયદેસરની કાર્યવાહી શરૂ કરવાની ફરજ પાડીને સંબંધિત બેંકે ચુકવણી અટકાવી દીધી.

આ પણ વાંચોઃ શનિવારે થોડા કલાકો માટે બંધ રહેશે UPI સર્વિસ, આ બેંકમાં ખાતુ હોય તો પડશે તકલીફ

કંપનીએ શું કહ્યું
વોલ્ટાસના લેટેસ્ટ એક્સચેન્જ ફાઇલિંગ અનુસાર કતર કોર્ટે હવે ઓએચએલસી જેવીના પક્ષમાં ચુકાદો આપ્યો છે, બેંકને ગેરંટી જારી કરવા અને ક્યુઆર 1 મિલિયનનું વધારાનું વળતર આપવાનો આદેશ કર્યો છે. કોર્ટે વોલ્ટાસનો દાવો પણ નકારી દીધો, જેમાં કહેવામાં આવ્યું હતું કે સમારકામ ખર્ચના હિસાબ બાદ કંપનીને વધુ ચુકવણી કરવામાં આવી હતી. વોલ્ટાસે કહ્યું કે તે કાયદાકીય સલાહકારો સાથે ચર્ચા કરી રહી છે અને ચુકાદા વિરુદ્ધ કોર્ટમાં અપીલ કરવાની યોજના બનાવી રહ્યું છે.