સારા અને સાવકી માતા કરીના બંને બની હોત એક જ પરિવારની વહુઓ જો....

મુંબઈ : સૈફ અલી ખાન અને અમૃતા સિંહની દીકરી સારા અલી ખાન હાલમાં ચર્ચામાં છે. આજે સારા અને રણવીરને ચમકાવતી ફિલ્મ 'સિંબા'નું ટ્રેલર રિલીઝ થયું છે અને આ ટ્રેલર લોકોને બહુ પસંદ પડી રહ્યું છે. સારા જેટલી સુંદર છે એટલી જ બિનધાસ્ત છે. સારા એ સૈફની પહેલી પત્ની અમૃતા સિંહની દીકરી છે પણ તેના સૈફની બીજી પત્ની અને સાવકી માતા કરીના કપૂર સાથેના સંબંધો પણ એટલા જ સારા છે. સારાએ ઘણીવાર જાહેરમાં કરીનાના પ્રોફેશનાલિઝમના વખાણ કર્યા છે. હાલમાં તો સત્તાવાર રીતે કરીના અને સારાનો સંબંધ મા-દીકરીનો છે પણ ભૂતકાળમાં જો સંબંધોના તાણાવાણા ગુંચવાયા ન હોય તો આજે સારા અને કરીના એક જ કુંટુંબની વહુઓ અને દેરાણી-જેઠાણી હોત. 

આ ઘટનાક્રમની વાત કરીએ તો ભૂતકાળમાં કરીના કપૂર અને શાહિદ કપૂર વચ્ચે પ્રેમપ્રકરણ હતું એ વાત જગજાહેર છે. કરીના અને શાહિદ વર્ષો સુધી સાથે હતા પણ અચાનક તેમનો સંબંધ તુટી ગયો હતો અને કરીના કપૂરના જીવનમાં સૈફ અલી ખાનની એન્ટ્રી હતી. સૈફ અને કરીના વચ્ચે પણ વર્ષો સુધી પ્રેમપ્રકરણ ચાલ્યું હતું અને આખરે તેમણે લગ્ન કરી લેતા કરીના અંતે મિસિસ કરીના સૈફ અલી ખાન બની ગઈ હતી. સૈફ સાથેના લગ્નને કારણે તેને સૈફના પહેલા લગ્નના કારણે થયેલા સંતાનો દીકરી સારા અને દીકરા ઇબ્રાહિમની સાવકી માતાનું પદ બોનસમાં મળ્યું હતું.

સારાની વાત કરીએ તો એક તબક્કે સારાના પ્રેમી તરીકે વીર પાહરિયાનું નામ ચર્ચામાં હતું. જોકે કોઈ વીર સાથેના બ્રેકઅપ પછી સારાના પ્રેમી તરીકે શાહિદના સાવકા ભાઈ ઇશાન ખટ્ટરનું નામ ગોસિપની કોલમોમાં ચર્ચામાં હતું. સારા અને ઇશાન બંને હજી પોતાની પહેલી ફિલ્મની તૈયારી કરી રહ્યા હતા ત્યારે અનેકવાર એકબીજા સાથે જોવા મળતા હતા. એક તબક્કે સમાચાર હતા કે સારા અને ઇશાન 'સ્ટુડન્ટ ઓફ ધ યર 2'થી પોતાની કરિયરની શરૂઆત કરવાના છે. જોકે સારાને માતા અમૃતા સિંહે આ ફિલ્મમાં કામ કરવાની મંજૂરી ન આપતા બંનેનો સંપર્ક કપાઈ ગયો અને તેમની નિકટતા પર પુર્ણવિરામ મુકાઈ ગયું. આ પછી ઇશાન અને જ્હાન્વી કપૂર 'ધડક'માં સાથે જોવા મળ્યા હતા અને હાલમાં તેમની વચ્ચે પ્રેમપ્રકરણ ચાલી રહ્યું હોવાની ચર્ચા છે. 

આમ, જો ભૂતકાળમાં સંબંધોના તાણવાણામાં વળાંક ન આવ્યો હોત તો કરીના કપૂર મોટા ભાઈ શાહિદ કપૂર સાથે અને સારા અલી ખાન નાના ભાઈ ઇશાન ખટ્ટર સાથે સંકળાયેલી જ રહી હોય અને મા-દીકરીના બદલે ભવિષ્યમાં જેઠાણી અને દેરાણી તરીકે જોવા મળત.