અંબાલાલ પટેલે ખેડૂતો સહિત લોકોને કર્યા સાવધાન! ગુજરાતમાં આગામી 5 દિવસ રહેશે ખુબ જ આકરાં!

Gujarat Weather 2023: ગુજરાતમાં આગામી 5 દિવસ ગાત્રો થીજવતી ઠંડી પડવાની આગાહી કરવામાં આવી છે. રાજ્યના તમામ શહેરોમાં તાપમાનનો પારો 9થી 10 ડિગ્રી વચ્ચે રહેશે. જ્યારે ભુજમાં કોલ્ડવેવની હવામાન વિભાગે આગાહી કરી છે. ગુજરાતમાં આગામી 5 દિવસ તાપમાનમાં ઘટાડો નોંધાશે, જેના કારણે 3 થી 6 ડિગ્રી તાપમાન ગગડવાની આગાહી કરાઈ છે. 

ભુજમાં કોલ્ડવેવની આગાહી કરવામાં આવી છે. મોટાભાગના શહેરોમાં તાપમાન 9 થી 10 ડિગ્રી રહેવાની સંભાવના છે. જ્યારે અમદાવાદ અને ગાંધીનગરમાં પણ તાપમાન 9 ડિગ્રી આસપાસ રહેશે. હવામાન વિભાગના મતે, ઉત્તરાયણના દિવસે ભારે પવન સાથે વાતાવરણ ઠંડુ રહશે. 14 અને 15 જાન્યુઆરીએ તાપમાન વધુ ઘટશે.

અંબાલાલ પટેલની આગાહી
ગુજરાતના હવામાન શાસ્ત્રી અંબાલાલ પટેલે આગામી દિવસોમાં કડકડતી ઠંડી પડવાની આગાહી કરી છે. આવનારા દિવસોમાં એશિયાના ભાગો ઠંડાગાર બની જશે. જો ગુજરાતની વાત કરીએ તો, ઉત્તર-પૂર્વીય પ્રદેશોમાંથી આવતા સીધા પવનોના કારણે ઉત્તર અને મધ્ય ગુજરાતમાં ઠંડી કહેર વર્તાવશે. મહેસાણા પંથકના સિદ્ધપુર, વીસનગર, બહુચરાજી અને કડી, બનાસકાંઠા પંથકના સમી અને હારીજ તેમજ વિરમગામ અને સુરેન્દ્રનગરમાં ન્યૂનતમ તાપમાન ઘણું ઘટી જવાની શક્યતા રહેશે.

જો સૌરાષ્ટ્રની વાત કરીએ તો, જૂનાગઢ, રાજકોટ સહિત ગિરનાર પંથકમાં કાતિલ ઠંડી પડશે, જે લાંબી ચાલશે. જાન્યુઆરી-ફેબ્રુઆરીમાં ઉભા પાકમાં હિમ પડવાની શક્યતા રહેશે. આથી પાકને બચાવવા માટે ખેડૂત ભાઈઓએ આવશ્યક પગલા લેવા જોઈએ.

દેશના ઉત્તર ભાગોમાં આવેલા પર્વતીય પ્રદેશોમાં ભારે હિમ વર્ષાના પગલે બરફીલા પવન ફૂંકાશે. 14મી જાન્યુઆરી એટલે ઉત્તરાયણના પર્વ પર હવામાનમાં પલટો આવવાની શક્યતા રહેશે. જેની અસર ફેબ્રુઆરી સુધી પણ વર્તાશે, જેના પગલે કારમી ઠંડી રહેશે. ધ્રુવીય પવનની અસરના કારણે અમેરિકા, કેનેડા સહિતના ભાગોમાં હાડ થીજવતી ઠંડી પડશે.