Delhi Election 2025: 10 વર્ષ સુધી CM રહી ચૂકેલા અરવિંદ કેજરીવાલને હરાવી AAPમાં ફેલાવી દીધો સન્નાટો, જાણો કોણ છે પરવેશ વર્મા?

Who is Parvesh Verma: દિલ્હી વિધાનસભા ચૂંટણીના પરિણામોએ બધાને ચોંકાવી દીધા છે. ભારતીય જનતા પાર્ટીએ લગભગ એકતરફી વિજય મેળવીને ઇતિહાસ રચ્યો છે. વાત ફક્ત આટલા પૂરતી જ મર્યાદિત નથી કે ભાજપ સત્તામાં પાછી ફરી રહી છે, પરંતુ એ પણ આશ્ચર્યજનક છે કે દિલ્હીના ભૂતપૂર્વ મુખ્યમંત્રી અને આમ આદમી પાર્ટીના સૌથી મોટા નેતા અરવિંદ કેજરીવાલને નવી દિલ્હી બેઠક પર પણ હારનો સામનો કરવો પડ્યો છે. ઘણી ઉથલપાથલ પછી 10 વર્ષ સુધી મુખ્યમંત્રી રહેલા કેજરીવાલનો આખરે પરાજય થયો છે.

પરવેશ વર્માના પિતા એક સમયે હતા દિલ્હીના મુખ્યમંત્રી 
પરવેશ વર્મા દિલ્હીના એક અગ્રણી રાજકીય પરિવાર સાથે સંબંધ ધરાવે છે, તેઓ દિલ્હીના ભૂતપૂર્વ મુખ્યમંત્રી અને ભાજપના દિગ્ગજ નેતાઓમાંના એક સાહિબ સિંહ વર્માના પુત્ર છે.  કાકા આઝાદ સિંહ ઉત્તર દિલ્હી મ્યુનિસિપલ કોર્પોરેશનના મેયર તરીકે સેવા આપી હતી અને 2013ની વિધાનસભા ચૂંટણી દરમિયાન ભાજપની ટિકિટ પર મુંડકા મતવિસ્તારમાંથી ચૂંટણી લડી હતી.

પરવેશ વર્માનું શિક્ષણ
૧૯૭૭માં જન્મેલા પરવેશ વર્માએ દિલ્હી પબ્લિક સ્કૂલ આરકે પુરમમાંથી શાળાકીય શિક્ષણ પૂર્ણ કર્યું અને પછી દિલ્હી યુનિવર્સિટીની કિરોડીમલ કોલેજમાંથી બેચલર ઓફ આર્ટ્સની ડિગ્રી મેળવી છે. આ પછી તેણે ફોર સ્કૂલ ઓફ મેનેજમેન્ટમાંથી MBA કર્યું.

રાજકારણમાં પ્રવેશ
રાજકારણમાં તેમનો પ્રવેશ 2013 માં થયો હતો જ્યારે તેમણે મહેરૌલી મતવિસ્તારનું પ્રતિનિધિત્વ કરીને દિલ્હી વિધાનસભા જીતી હતી. તેમણે 2014 માં પશ્ચિમ દિલ્હી સંસદીય બેઠક જીતીને પાર્ટીમાં પોતાનું સ્થાન વધુ મજબૂત બનાવ્યું. આ પછી તેમણે 2019 ની ચૂંટણીમાં ફરીથી પ્રચંડ વિજય મેળવ્યો, જ્યાં તેઓ 5.78 લાખ મતોના માર્જિનથી જીત્યા. નવાઈની વાત એ છે કે તે ચૂંટણીઓ હતી જ્યારે દિલ્હીમાં આમ આદમી પાર્ટીની આંધી હતી.

સાંસદ તરીકે પોતાને મજબૂત બનાવ્યા
સાંસદ તરીકેના તેમના કાર્યકાળ દરમિયાન તેઓ સંસદસભ્યોના પગાર અને ભથ્થાં પરની JPC ના સભ્ય પણ રહ્યા છે અને શહેરી વિકાસ પરની સ્થાયી સમિતિમાં પણ સેવા આપી છે. 2025 ની દિલ્હી ચૂંટણી પહેલાં પરવેશ વર્માએ 'કેજરીવાલ હટાવો, દેશ બચાવો' નામનું અભિયાન શરૂ કર્યું હતું, આ અભિયાન હેઠળ તેમણે આમ આદમી પાર્ટી સરકારની આકરી ટીકા કરી હતી અને એવા વચનોની યાદી આપી હતી જે AAP સરકાર પૂર્ણ કરી શકી નથી.

કેજરીવાલ વિરુદ્ધ ઝુંબેશ શરૂ
પરવેશ વર્માએ પ્રચાર અભિયાનમાં દિલ્હી સરકારના વહીવટી પ્રદર્શનની, ખાસ કરીને પ્રદૂષણની ચિંતાઓ, મહિલાઓની સલામતી અને નાગરિક માળખાગત સુવિધાઓના વિકાસની, આકરી ટીકા કરી હતી. તેમણે ખાસ કરીને તેમની AAP સરકારના યમુના નદીને સાફ કરવાના વચન તરફ ધ્યાન દોર્યું, જે શહેર માટે એક મોટો પર્યાવરણીય પડકાર છે.

પરવેશ વર્માનું અંગત જીવન
પરવેશ વર્માના લગ્ન મધ્યપ્રદેશના ભાજપના દિગ્ગજ નેતા વિક્રમ વર્માની પુત્રી સ્વાતિ સિંહ વર્મા સાથે થયા છે. વિક્રમ સિંહ રાજ્યસભાના સાંસદ રહી ચૂક્યા છે. આ ઉપરાંત, તેઓ 2002 થી 2004 સુધી અટલ બિહારી વાજપેયીની સરકારમાં યુવા અને રમતગમત બાબતોના મંત્રી પણ રહી ચૂક્યા છે. પરવેશ અને સ્વાતિને ત્રણ બાળકો છે, એક પુત્ર શિવેન સિંહ અને બે પુત્રીઓ સનિધિ અને પ્રિશા છે.