Kadinamkulam Murder Case: റീൽസുകളിലൂടെ സൗഹൃദം, ദൃശ്യങ്ങൾ കാട്ടി ഭീഷണിപ്പെടുത്തി, ഒടുവിൽ കൊലപാതകവും; കഠിനംകുളം ആതിര കൊലപാതകത്തിൽ പ്രതിയെ തിരിച്ചറിഞ്ഞു

Kadinamkulam Woman Murder: യുവാവ് എല്ലാ മാസവും ആതിരയെ കാണാൻ കഠിനംകുളത്ത് എത്താറുണ്ടായിരുന്നുവെന്നാണ് പൊലീസ് കണ്ടെത്തൽ.

തിരുവനന്തപുരം: കഠിനംകുളത്ത് കഴുത്തിൽ കുത്തേറ്റ് യുവതി മരിച്ച സംഭവത്തിൽ പ്രതിയെ തിരിച്ചറിഞ്ഞു. കൊല്ലപ്പെട്ട ആതിരയുടെ ഇൻസ്റ്റ​ഗ്രാം സുഹൃത്ത് കൊല്ലം ദളവപുരം സ്വദേശിയായ ജോൺസൺ ഔസേപ്പാണ് പ്രതിയെന്ന് പൊലീസ് സ്ഥിരീകരിച്ചു. ഇൻസ്റ്റഗ്രാമിൽ റീലുകൾ ചെയ്യുന്ന ഫിസിയോ തെറാപ്പിസ്റ്റാണ് ജോൺസൺ. ഇയാൾക്കായി അന്വേഷണം പുരോഗമിക്കുകയാണ്.

ആതിരയും ജോൺസണും ഒരു വർഷത്തോളം അടുപ്പത്തിലായിരുന്നു. കൂടെ വരണമെന്ന് ആതിരയോട് ആവശ്യപ്പെട്ടു. ആതിര വിസമ്മതിച്ചതോടെയാണ് കൊലപാതകം നടത്തിയത്. ആതിരയുടെ ദൃശ്യങ്ങൾ ഉപയോഗിച്ച് ജോൺസൺ ബ്ലാക്ക്മെയിൽ ചെയ്തിരുന്നതായും പൊലീസ് പറഞ്ഞു. ആദ്യം ഒരു ലക്ഷം രൂപ യുവതിയുടെ പക്കൽ നിന്നും വാങ്ങി. കൊലപാതകത്തിന് മുന്ന് ദിവസം മുമ്പ് 25,00 രൂപ വാങ്ങിയതായും പൊലീസ് കണ്ടെത്തി. 

ഭാര്യയുമായി പിരിഞ്ഞ ജോൺസൺ കൊല്ലത്തും കൊച്ചിയിലുമായി താമസിക്കുകയായിരുന്നു. കൊല്ലത്തെ ഒരു സുഹൃത്തിൻ്റെ പേരിലുള്ള തിരിച്ചറിയൽ രേഖ ഉപയോഗിച്ചാണ് ഇയാൾ സിം കാർഡ് എടുത്തിരിക്കുന്നത്. 

കഴിഞ്ഞ ദിവസം രാവിലെ പതിനൊന്നരയോടെയാണ് വെഞ്ഞാറമൂട് സ്വദേശിനി ആതിരയെ വീട്ടിൽ കഴുത്തറുത്ത് കൊല്ലപ്പെട്ട നിലയിൽ കണ്ടെത്തിയത്. വീടിന് തൊട്ടടുത്ത ക്ഷേത്രത്തിൽ പൂജാരിയായ ഭർത്താവ് രാജീവ് പൂജ കഴിഞ്ഞ് വീട്ടിലെത്തിയപ്പോഴാണ് ആതിരയെ കൊല്ലപ്പെട്ട നിലയിൽ കണ്ടെത്തിയത്. 

കൃത്യം നടത്തിയ ശേഷം പ്രതി രക്ഷപ്പെടാൻ ഉപയോ​ഗിച്ച യുവതിയുടെ സ്കൂട്ടർ ചിറയിൻകീഴ് റെയിൽവേ സ്റ്റേഷനിൽ നിന്നും കണ്ടെത്തിയിരുന്നു. ചിറയിൻകീഴ് റെയിൽവേ സ്റ്റേഷനിൽ ടിക്കറ്റ് കൗണ്ടറിനു സമീപത്ത് നിന്നാണ് അന്വേഷണ സംഘം സ്കൂട്ടർ കണ്ടെത്തിയത്. 

ആതിരയെ ഇൻസ്റ്റഗ്രാമിലൂടെ പരിചയപ്പെട്ട യുവാവ് എല്ലാ മാസവും ആതിരയെ കാണാൻ കഠിനംകുളത്ത് എത്താറുണ്ടായിരുന്നുവെന്നാണ് പൊലീസ് കണ്ടെത്തൽ.  മൂന്ന് ദിവസം മുൻപ് തനിക്കൊപ്പം വരണമെന്നും ഇല്ലെങ്കിൽ കൊല്ലുമെന്നും ആതിരയെ ഇയാൾ ഭീഷണിപ്പെടുത്തിയതായി ഭർത്താവും മൊഴി നൽകിയിരുന്നു.