Athirappilly Wild Elephant: മയക്കുവെടി കൊണ്ടില്ലേ? അതിരപ്പിള്ളിയില്‍ മസ്തകത്തിൽ മുറിവേറ്റ കാട്ടാനയ്ക്ക് പിന്നാലെ ഡോക്ടറും സംഘവും

ആനയ്ക്ക് മയക്കുവെടി കൊണ്ടില്ലെന്ന സംശയത്തെ തുടർന്ന് വീണ്ടും മയക്കുവെടി വയ്ക്കാനുള്ള ശ്രമത്തിലാണ് സംഘമെന്നാണ് വിവരം.

തൃശൂർ: അതിരപ്പിള്ളി വനമേഖലയിൽ മുറിവേറ്റ നിലയിൽ കണ്ടെത്തിയ കാട്ടാനയെ മയക്കുവെടി വച്ചു. വെറ്ററിനറി ഡോക്ടര്‍ അരുണ്‍ സഖറിയയും സംഘവും സ്ഥലത്തെത്തി നിരീക്ഷിച്ചതിന് ശേഷമാണ് മയക്കുവെടി വച്ചത്. എന്നാൽ ആദ്യത്തെ മയക്കുവെടി ഫലിക്കാത്തതിനാൽ ഒരുതവണ കൂടി സംഘം മയക്കുവെടി വയ്ക്കും. ആന കാട്ടിലേക്ക് നീങ്ങിയിരിക്കുകയാണ്. ഡോക്ടര്‍ അരുണ്‍ സഖറിയയും സംഘവും പിന്നാലെ നീങ്ങുകയാണ്. റബർ പ്ലാന്റേഷനിൽ നിന്ന് നീങ്ങി റിസർവ് ഫോറസ്റ്റിന്റെ ഭാ​ഗത്താണ് നിലവിൽ ആനയുള്ളത്. 

ഇക്കഴിഞ്ഞ ജനുവരി 15 മുതൽ വെറ്റിലപ്പാറ പ്ലാന്റേഷൻ കോർപറേഷന്റെ ഫാക്ടറിക്കു പരിസരത്തുണ്ട്. ഇടവിട്ട ദിവസങ്ങളിൽ ആനയെ പ്രദേശത്ത് കണ്ടിരുന്നു. ഇതിന് പിന്നാലെ വനംവകുപ്പ് നിരീക്ഷണം നടത്തുകയായിരുന്നു. ആനയുടെ മസ്തകത്തിലെ പരിക്ക് മറ്റൊരു ആനയുമായി കൊമ്പുകോർത്തപ്പോൾ കുത്തേറ്റതാണെന്നാണു കരുതുന്നത്. 2 മുറിവുകളാണ് മസ്തകത്തിലുള്ളത്. ആനയ്ക്ക് വെടിയേറ്റതാണെന്നും പ്രചാരണമുണ്ടായിരുന്നു. അതേസമയം ആനയുടെ ഒരു മുറിവ് ഭേദമായെന്ന് വനംവകുപ്പ് ഉദ്യോഗസ്ഥർ പറഞ്ഞു. 

ആന ഒറ്റയ്ക്കാണെന്നും അവശനാണെന്നും ഡോക്ടര്‍മാരുടെ സംഘം വ്യക്തമാക്കി. ഡിഎഫ്ഒ ഉൾപ്പെടെയുള്ളവരും സ്ഥലത്തുണ്ട്. ജനവാസ മേഖലകളിൽ നിരന്തരം ആന പ്രത്യക്ഷപ്പെട്ടതോടെയാണ് വനംവകുപ്പ് മയക്കുവെടിവച്ച് പിടികൂടി ചികിത്സ നൽകാൻ തീരുമാനിച്ചത്.