Prasanth Sivan as Palakkad BJP president: ആർഎസ്എസ് ഇടപ്പെട്ടു, പാലക്കാട് ബിജെപിയിൽ സമവായം; അധ്യക്ഷനായി പ്രശാന്ത് ശിവൻ ചുമതലയേറ്റു

Palakkad BJP Conflict : പ്രശാന്ത് ശിവനെ പ്രസിഡന്റായി തിരഞ്ഞെടുത്തതിൽ പ്രതിഷേധിച്ച് ഒൻപത് കൗൺസിലർമാരാണ് രാജികത്ത് നൽകാൻ ഒരുങ്ങിയത്.

പാലക്കാട്:  പാലക്കാട് ബിജെപി അധ്യക്ഷനായി പ്രശാന്ത് ശിവൻ ചുമതലയേറ്റു. ഇന്ന് രാവിലെ ബിജെപി ജില്ലാ കാര്യാലയത്തിൽവെച്ചാണ് ഔദ്യോഗികമായി സ്ഥാനമേറ്റത്. 

പ്രശാന്ത് ശിവനെ പ്രസിഡന്റായി തിരഞ്ഞെടുത്തതിന് പിന്നാലെ ഒരു വിഭാഗം എതിർപ്പ് പ്രകടിപ്പിച്ചിരുന്നു. നഗരസഭയിലെ ഒൻപത് കൗൺസിലർമാരാണ് സംസ്ഥാന നേതൃത്വത്തിന് രാജികത്ത് നൽകാൻ ഒരുങ്ങിയത്. എന്നാൽ ആർഎസ്എസ് ഇടപ്പെട്ട് പ്രശ്നം പരിഹരിക്കുകയായിരുന്നു.

ആർഎസ്എസ് ഇടപ്പെടലിന് പിന്നാലെ ബിജെപിക്കൊപ്പം നിൽക്കുമെന്ന് ന​ഗരസഭാ ചെയർപേഴ്സൺ പ്രമീള ശശിധരൻ വ്യക്തമാക്കി. പ്രശാന്ത് ശിവനെ ജില്ലാ പ്രസിഡൻ്റായി പ്രഖ്യാപിക്കുന്ന ചടങ്ങിൽ പങ്കെടുക്കുമെന്ന് നഗരസഭ വൈസ് ചെയർമാൻ ഇ കൃഷ്ണദാസ് പ്രതികരിച്ചു. പ്രശാന്ത് ശിവനോട് വ്യക്തിപരമായ എതിർപ്പില്ലെന്ന് ബിജെപി ദേശീയ കൗൺസിൽ അംഗം എൻ ശിവരാജനും പ്രതികരിച്ചു.

പ്രശാന്ത് ശിവനെ പ്രസിഡന്റായി തിരഞ്ഞെടുത്തതിൽ പ്രതിഷേധിച്ച് ഒൻപത് കൗൺസിലർമാരാണ് രാജികത്ത് നൽകാൻ ഒരുങ്ങിയത്. യുവമോർച്ച ജില്ല പ്രസിഡൻ്റായ പ്രശാന്ത് ശിവനെ ബിജെപി ജില്ല പ്രസിഡൻ്റ് ആക്കുന്നത് മാനദണ്ഡങ്ങൾ ലംഘിച്ചെന്നാണ് ഇവരുടെ ആക്ഷേപം.

പ്രശാന്ത് ശിവനെ പ്രസിഡൻ്റായി പ്രഖ്യാപിച്ചാൽ മുനിസിപ്പൽ സെക്രട്ടറിക്ക് രാജിക്കത്ത് നൽകുമെന്നാണ് അറിയിച്ചിരുന്നത്. ഇതോടെ ബി ജെ പി ഭരിക്കുന്ന നഗരസഭ ഭരണം തുലാസിലാകുന്ന സ്ഥിതി വന്നതോടെയാണ് ആർഎസ്എസ് ഇടപെടൽ.