മാനന്തവാടി: പഞ്ചാരക്കൊല്ലിയിൽ കടുവയെ പിടികൂടാനുള്ള ദൗത്യത്തിനിടെ ആർആർടി അംഗത്തെ കടുവ ആക്രമിച്ചു. പരിക്ക് ഗുരുതരമെന്ന് വിവരം. മാനന്തവാടി ആർആർടി അംഗം ജയസൂര്യയ്ക്കാണ് പരിക്കേറ്റത്.
ജയസൂര്യയെ ഉടനെ ആശുപത്രിയിലേക്ക് മാറ്റും. പരുക്കേറ്റയാളെ പുറത്തേക്ക് കൊണ്ടുവരാനുള്ള ശ്രമങ്ങൾ പുരോഗമിക്കുകയാണ്. പരിശോധനയ്ക്കിടെ ഉൾക്കാട്ടിൽ വെച്ചാണ് ആക്രമണം ഉണ്ടായത്. എട്ടു പേരടങ്ങുന്ന സംഘമായി തിരിഞ്ഞായിരുന്നു പരിശോധന.
തറാട്ട് ഭാഗത്ത് തിരച്ചിലിനിറങ്ങിയ അംഗത്തിനാണ് പരിക്കേറ്റത്. സ്ഥലത്ത് കടുവയെ കണ്ടുവെന്ന സൂചനയുടെ അടിസ്ഥാനത്തിലാണ് സംഘമിവിടെയെത്തിയത്. വന്യജീവി ആക്രമണമുണ്ടായതായി മന്ത്രി എ കെ ശശീന്ദ്രൻ സ്ഥിരീകരിച്ചു. കൂടുതൽ വിവരങ്ങൾ തേടിയിട്ടുണ്ടെന്നും മന്ത്രി വ്യക്തമാക്കി.
