આ પાર્ટીને મળી શૂન્ય સીટ પણ નીતીશ કુમારની પાર્ટીને પહોંચાડી દીધુ મોટું નુકસાન

નવી દિલ્હીઃ બિહારમાં વિધાનસભા ચૂંટણીમાં અત્યાર સુધી આવેલા પરિણામ અને ટ્રેન્ડ સ્પષ્ટ સંકેત આપી રહ્યાં છે કે સત્તામાં રહેલી જેડીયૂને નુકસાન થઈ રહ્યું છે અને તેનું કારણ બની રહી છે ચિરાગ પાસવાનના નેતૃત્વ વાળી લોક જનશક્તિ પાર્ટી (LJP) જે આ વખતે પોતાના દમ પર ચૂંટણી મેદાનમાં હતી. પરંતુ તે માટે લોજપાએ પણ મોટું નુકસાન ઉઠાવવું પડ્યું છે. ચૂંટણી પંચના સાંજે 5.30 કલાક સુધીના આંકડા પ્રમાણે લોજપાનું ખાતુ ખુલી રહ્યું નથી અને તેને અત્યાર સુધી 5.6 ટકા મત મળ્યા છે. 

આંકડા પર ધ્યાન આપો તો ખ્યાલ આવે છે કે લોજપાએ ઓછામાં ઓછી 30 સીટો પર જેડીયૂને નુકસાન પહોંચાડ્યું છે અને તે હારનું કારણ બની રહી છે. જેડીયૂને અત્યાર સુધી ચાર સીટો પર જીત મળી છે અને તે 37 સીટો પર આગળ છે. વર્ષ 2015ની ચૂંટણીમાં જેડીયૂને 71 સીટો પર જીત મળી હતી.

જેડીયૂના રાષ્ટ્રીય પ્રવક્તા કેસી ત્યાગીએ કહ્યુ કે, એક ષડયંત્ર હેટળ નીતીશ કુમાર વિરુદ્ધ અપમાનજનક અભિયાન ચલાવવામાં આવ્યું. કોઈનું નામ લીધા વગર તેમણે કહ્યું, અમારા પણ સામેલ હતા અને બીજા પણ.

પરંતુ તેમણે આશા વ્યક્ત કરી કે નીતીશ કુમાર ફરીથી બિહારના મુખ્યમંત્રી બનશે. તેમણે યાદ અપાવ્યું કે, પ્રધાનમંત્રી નરેન્દ્ર મોદી, કેન્દ્રીય ગૃહમંત્રી અમિત શાહ અને ભાજપ અધ્યક્ષ જેપી નડ્ડાએ સ્પષ્ટ કરી દીધુ કે નીતીશ કુમાર એનડીએનું નેતૃત્વ કરશે. 

ભાજપ 71 સીટ પર આગળ વધી રહી છે જ્યારે તેના બે અન્ય સહયોગી આઠ સીટો પર આગળ છે. ચૂંટણી પંચના આંકડા પ્રમાણે ટ્રેન્ડ્સમાં એનડીએના ખાતામાં 122 સીટ આવી રહી છે.