POCSO Case: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ അധ്യാപകൻ അറസ്റ്റിൽ

Sexual Assault: കുട്ടി പഠിക്കുന്ന സ്കൂളിലെ അധ്യാപകനായ അമിത് ദുബെയെയാണ് പോലീസ് പിടികൂടിയത്. കേസിനാസ്പദമായ സംഭവം നടന്നത് മാർച്ച്-ജൂലൈ മാസങ്ങൾക്കിടയിലാണ്.

മുംബൈ: മഹാരാഷ്ട്രയിൽ പ്രായപൂർത്തിയാകാത്ത പെൺകുട്ടിയ പീഡിപ്പിച്ച കേസിൽ അധ്യാപകനെ അറസ്റ്റ് ചെയ്തതായി റിപ്പോർട്ട്.  സംഭവം നടന്നത് പാൽഘർ ജില്ലയിലെ നലസോപാരയിലാണ്. 

കുട്ടി പഠിക്കുന്ന സ്കൂളിലെ അധ്യാപകനായ അമിത് ദുബെയെയാണ് പോലീസ് പിടികൂടിയത്. കേസിനാസ്പദമായ സംഭവം നടന്നത് മാർച്ച്-ജൂലൈ മാസങ്ങൾക്കിടയിലാണ്.  14 കാരിയായ പെൺകുട്ടിയെ പ്രതി നടത്തുന്ന ട്യൂഷൻ സെൻ്ററിലേക്ക് വിളിച്ചുവരുത്തി ​ബലാത്സംഗം ചെയ്യുകയായിരുന്നുവെന്നാണ് റിപ്പോർട്ട്. 

സംഭവം പുറത്തറിഞ്ഞതിന് പിന്നാലെ കുട്ടിയുടെ മാതാപിതാക്കളും ബന്ധുക്കളുമടക്കം കുട്ടി പഠിക്കുന്ന വിദ്യാലയത്തിലെത്തി പ്രതിഷേധം നടത്തിയിരുന്നു.  പെൺകുട്ടിയെ വീട്ടിലെ ട്യൂഷൻ സെൻ്ററിലേക്ക് വിളിച്ചുവരുത്തി നിരവധി തവണ ഇയാൾ ബലാത്സംഗം ചെയ്തതായി പാൽഘർ പോലീസ് സ്റ്റേഷനിലെ സീനിയർ ഇൻസ്‌പെക്ടർ ജിതേന്ദ്ര വൻകോട്ടി വ്യക്തമാക്കി. 

പെൺകുട്ടിയുടെ പരാതിയുടെ അടിസ്ഥാനത്തിൽ ഭാരതീയ ന്യായ സംഹിതയുടെ വിവിധ വകുപ്പുകളും പോക്‌സോ നിയമവും ചുമത്തി പ്രതിക്കെതിരെ കേസെടുത്തിട്ടുണ്ടെന്ന് പോലീസ് അറിയിച്ചു.