KSRTC Tourism: മൂന്നാറിലേയ്ക്ക് ഒരു ബഡ്ജറ്റ് ട്രിപ്പ് പ്ലാൻ ചെയ്താലോ? ആനവണ്ടിയുടെ ഈ പാക്കേജ് ഞെട്ടിക്കും!

KSRTC Munnar Package: മലയാളികൾ പലപ്പോഴും അവധിക്കാലം ആഘോഷിക്കാൻ തിരഞ്ഞെടുക്കുന്ന ടൂറിസ്റ്റ് കേന്ദ്രങ്ങളിൽ ഒന്നാണ് മൂന്നാർ.

വേനൽ അവധി വന്നതിന് പിന്നാലെ മൂന്നാറിലേക്ക് സഞ്ചാരികളുടെ ഒഴുക്ക് വലിയ രീതിയിൽ വർധിച്ചിരിക്കുകയാണ്. കുടുംബത്തോടൊപ്പവും സുഹൃത്തുക്കളോടൊപ്പവും അവധിക്കാലം ആഘോഷിക്കാൻ മലയാളികൾ പലപ്പോഴും തിരഞ്ഞെടുക്കുന്ന ടൂറിസ്റ്റ് കേന്ദ്രങ്ങളിൽ ഒന്നാണ് മൂന്നാർ.  ബഡ്ജറ്റ് ഫ്രണ്ട്ലി ട്രിപ്പ് പ്ലാൻ ചെയ്യുന്നവർക്ക് വേണ്ടി കെ.എസ്.ആർ.ടി.സി ബഡ്ജറ്റ് ടൂറിസം സെൽ മികച്ച ഒരു പാക്കേജ് തന്നെ ആരംഭിച്ചിരിക്കുകയാണ്. കെ.എസ്.ആർ.ടി.സിയുടെ ചടയമംഗലം ഡിപ്പോയിൽ നിന്നാണ് ഈ മൂന്നാർ യാത്ര ആരംഭിക്കുന്നത്. 

മെയ് 24 വെള്ളിയാഴ്ച പുലർച്ചെ 4.00 മണിക്ക് ചടയമംഗലം ഡിപ്പോയിൽ നിന്ന് ആരംഭിക്കുന്ന യാത്ര, മാമലക്കണ്ടം, മാങ്കുളം, ആനക്കുളം, ലക്ഷ്മി എസ്റ്റേറ്റ്, മൂന്നാര്‍, മറയൂർ, കാന്തല്ലൂർ എന്നിവിടങ്ങളാണ് പ്രധാനമായും സന്ദർശിക്കുന്നത്. മാമലക്കണ്ടം എന്ന കാടിനു നടുവിലെ അതിമനോഹരമായ ഗ്രാമം ആണ് യാത്രയിലെ മുഖ്യ ആകർഷണം. നാലുഭാഗവും വനത്താൽ ചുറ്റപ്പെട്ടു കിടക്കുന്ന ഇവിടം അതിന്റെ ശാന്തതയുടെയും പ്രകൃതിഭംഗിയുടെയും പേരിലാണ് പ്രസിദ്ധമായിരിക്കുന്നത്. 

ഇടുക്കി-എറണാകുളം ജില്ലകളുടെ അതിര്‍ത്തിയായ ഇവിടം കേരളത്തിൽ തന്നെ തീർച്ചയായും കാണേണ്ട സ്ഥലമാണ്. തുടർന്ന് മാങ്കുളവും ആനക്കുളവുമാണ് സന്ദർശിക്കുന്നത്. ഇടുക്കിയിലെ സ്വയം പര്യാപ്തതമായ ഗ്രാമങ്ങളിലൊന്നാണ് മാങ്കുളം. ചന്ദനക്കാടുകളുടെ മറയൂരും മുനിയറകളും കാന്തല്ലൂരിലെ ആപ്പിൾതോട്ടങ്ങളും കൃഷികളും ടീ ഫാക്ടറിയും മാട്ടുപ്പെട്ടി അണക്കെട്ടും കുണ്ടള ഡാമും എക്കോ പോയിന്‍റും ഹിൽ ടോപ്പും പിന്നെ ബോട്ടിങ്ങും ഒക്കെയായി ഈ യാത്ര മൊത്തത്തിൽ ആസ്വദിക്കാം.

യാത്ര മെയ് 25 ശനിയാഴ്ച രാത്രിയോടെ തിരികെ ചടയമംഗലം ഡിപ്പോയിൽ എത്തും. യാത്രാ നിരക്ക്, യാത്രയിലെ താമസം, ബോട്ടിങ്, ഉച്ചഭക്ഷണം എന്നിവ ഉൾപ്പെടെ ഒരാൾക്ക് 1760 രൂപയാണ് നിരക്ക്. കൂടുതൽ വിവരങ്ങൾക്കും ടിക്കറ്റ് ബുക്കിങ്ങിനും 9961530083, 9745359594, 9656310920, 8907037802 എന്നീ നമ്പറുകളിൽ ബന്ധപ്പെടാവുന്നതാണ്.