Harthal In Kozhikode: ചേവായൂർ സഹകരണ ബാങ്ക് തെരഞ്ഞെടുപ്പിനിടെ വൻ സംഘർഷം; കോഴിക്കോട് ഹർത്താലിന് കോൺ​ഗ്രസ് ആഹ്വാനം

Chevayur Service Cooperative Bank: ചേവായൂർ ബാങ്ക് തെരഞ്ഞെടുപ്പിൽ കേട്ടുകേൾവിയില്ലാത്ത അതിക്രമമാണ് ഉണ്ടായതെന്നും എല്ലാറ്റിനും സിപിഎം ആണ് നേതൃത്വം നൽകിയതെന്നും കോൺ​ഗ്രസ് നേതാക്കൾ ആരോപിച്ചു.

കോഴിക്കോട്: കോഴിക്കോട് ചേവായൂർ സർവീസ് സഹകരണ ബാങ്ക് തെരഞ്ഞെടുപ്പിൽ സംഘർഷം ഉണ്ടായതിനെ തുടർന്ന് കോഴിക്കോട് ജില്ലയിൽ ഹർത്താൽ പ്രഖ്യാപിച്ച് കോൺ​ഗ്രസ്. നാളെയാണ് ഹർത്താൽ പ്രഖ്യാപിച്ചിരിക്കുന്നത്. രാവിലെ ആറ് മുതൽ വൈകിട്ട് ആറ് വരെയാണ് കോൺ​ഗ്രസ് ഹർത്താലിന് ആഹ്വാനം ചെയ്തിരിക്കുന്നത്. ഡിസിസി പ്രസിഡന്റ് പ്രവീൺ, എംകെ രാഘവൻ എംപി തുടങ്ങിയവർ വിളിച്ചുചേർത്ത വാർത്താസമ്മേളനത്തിലാണ് ഹർത്താൽ പ്രഖ്യാപിച്ചത്.

ചേവായൂർ ബാങ്ക് തെരഞ്ഞെടുപ്പിൽ കേട്ടുകേൾവിയില്ലാത്ത അതിക്രമമാണ് ഉണ്ടായതെന്നും എല്ലാറ്റിനും സിപിഎം ആണ് നേതൃത്വം നൽകിയതെന്നും കോൺ​ഗ്രസ് നേതാക്കൾ ആരോപിച്ചു. സിപിഎം 5000 കള്ളവോട്ട് ചേയ്തു. 10,000 കോൺ​ഗ്രസ് വോട്ടർമാരെ വോട്ട് ചെയ്യാൻ അനുവദിച്ചില്ലെന്നും കോൺ​ഗ്രസ് നേതാക്കൾ ആരോപിച്ചു. സിപിഎമ്മിന്റെ അഴിഞ്ഞാട്ടത്തിന് പോലീസ് കൂട്ടുനിന്നുവെന്നും കോൺ​ഗ്രസ് നേതാക്കൾ ആരോപിച്ചു.

കോഴിക്കോട് കമ്മീഷണർ ഫോൺ പോലും എടുത്തില്ല. സിപിഎമ്മിന്റെ ആക്രമണത്തിൽ കോൺ​ഗ്രസ് പ്രവർത്തകർക്ക് പരിക്കേറ്റു. വനിതാ വോട്ടർമാരെയും സിപിഎം പ്രവർത്തകർ കയ്യേറ്റം ചെയ്തു. വോട്ടർമാരല്ലാത്ത സിപിഎം പ്രവർത്തകർ പുലർച്ചെ നാലുമണിയോടെ എത്തിയെന്നും പലരും വ്യാജ ഐഡി കാർഡുമായാണ് എത്തിയതെന്നും കോൺ​ഗ്രസ് നേതാക്കൾ ആരോപിച്ചു. കോൺ​ഗ്രസ് ജയിച്ചാലും ഇല്ലെങ്കിലും തെരഞ്ഞെടുപ്പ് റദ്ദാക്കണമെന്ന് സിസിസി പ്രസിഡന്റ് ആവശ്യപ്പെട്ടു.

രാവിലെ എട്ട് മണിക്ക് വോട്ടെടുപ്പ് ആരംഭിച്ചതിന് പിന്നാലെ തന്നെ കോൺ​ഗ്രസും സിപിഎം പിന്തുണയുള്ള കോൺ​ഗ്രസ് വിമതരും തമ്മിൽ കള്ളവോട്ട് സംബന്ധിച്ച ആരോപണ പ്രത്യാരോപണങ്ങൾ ഉയർത്തിയിരുന്നു. വിവിധ ഇടങ്ങളിൽ വോട്ടർമാരുമായി എത്തിയ ഏഴ് വാഹനങ്ങൾക്ക് നേരെ ആക്രമണം ഉണ്ടായി. വ്യാജ ഐഡി കാർഡുകൾ നിർമിച്ചും മറ്റും കോൺ​ഗ്രസാണ് കള്ളവോട്ടിന് നേതൃത്വം നൽകിയതെന്നാണ് സിപിഎം ആരോപിക്കുന്നത്.