CCTV फूटेज : मॉलमध्ये घुसून प्रेयसीवर चाकू हल्ला; व्हिडिओ वायरल

वट्टाला : श्रीलंकेच्या एका शॉपिंग मॉलमध्ये हादरवून टाकणारी एक घटना घडलीय. कोलंबो शहरातील वट्टाला इथल्या एका शॉपिंग मॉलमध्ये घुसून तरुणानं एका मुलीवर चाकू हल्ला केला. या घटनेत मुलीचा जागीच मृत्यू झालाय... आणि ही सगळी घटना सीसीटीव्हीत कैद झाली. 

मिळालेल्या माहितीनुसार, तरुण आणि तरुणीचे प्रेम संबंध होते. पण, वेगवेगळ्या धर्माचे असल्या कारणानं त्यांच्या लग्नात अडथळे येत होते. याचाच राग तरुणाचा मनात खदखदत होता.

मॉलमध्ये काम करणाऱ्या आपल्या प्रेयसीला भेटण्यासाठी गेलेल्या हा तरुण पहिल्यांदा एका ग्राहकाप्रमाणे आत घुसला. पण, त्यानंतर स्टोअरमध्ये इकडे तिकडे पाहत त्यानं आपल्या प्रेयसीवर - फातिमावर - चाकूनं तब्बल १३ वार केले. यानंतर उपस्थितांनी त्याला रोखण्याचा प्रयत्न केला तेव्हा त्यानं आपल्याच गळ्यावर चाकू चालवला... या घटनेत तरुणीचा जागीच मृत्यू झाला तर तरुणाला जवळच्याच एका हॉस्पीटलमध्ये भरती करण्यात आलं. 

सोशल मीडियावर 'वायरल'
हा व्हिडिओ सध्या सोशल मीडियावर भलताच वायरल झालाय. पहिल्यांदा तर हा व्हिडिओ मुंबईचा असल्याचंच सांगण्यात येत होतं. पण, यानंतर मुंबई पोलीस डीसीपी धनंजय कुलकर्णी यांनी मात्र अधिकृतरित्या ही घटना मुंबईची नसल्याचं स्पष्ट केलं.

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.