સિવિલમાં અંગદાન ક્ષેત્રે સેવાની શતાબ્દી, 105 અંગોથી 90 લોકોને નવજીવન મળ્યું

અતુલ તિવારી/અમદાવાદ :અમદાવાદ સિવિલ હોસ્પિટલ (civil hospital) માં અંગદાન ક્ષેત્રે "સેવાની શતાબ્દી" થઈ. ડિસેમ્બર 2021 થી શરૂ થયેલ અંગદાન (organ donation) ની કામગીરીને 13 મહિના પૂર્ણ થયા. આ સમયગાળામાં સિવિલ હોસ્પિટલમાં 34 વ્યક્તિઓના અંગદાનમાં સફળતા મળી છે. જેના થકી 105 અંગો મળ્યા. જેના થકી 90 લોકોને નવજીવન મળ્યું. તો સાથે જ છેલ્લા 24 કલાકમાં સિવિલ હોસ્પિટલમાં 2 બ્રેઇન ડેડ વ્યક્તિઓના અંગદાન મેળવવામાં સફળતા પણ મળી છે.

અંગદાન સ્વરૂપે મળેલા સિવિલ હોસ્પિટલમાં મળેલા 105 અંગોની વાત કરીએ, તો 51 કિડની, 29 લીવર, 5 સ્વાદુપિંડ, 6 હૃદય, 2 હાથ અને 6 જોડ ફેફસાંનો સમાવેશ થાય છે. આ અતિમહત્વના અંગો થકી વર્ષોથી અંગોની ખામીથી પીડામય અને સંધર્ષપૂર્ણ જીવન વ્યતિત કરી રહેલા જરૂરિયાતમંદ દર્દીઓની જીવનશૈલી બદલાઇ છે અને વર્ષોની પીડાનો અંત આવ્યો છે. અંગદાનની પ્રક્રિયામાં મહત્વની ભૂમિકા SOTTO ની ટીમ દ્વારા ભજવવામાં આવે છે. બ્રેઇન ડેડ જાહેર થતા દર્દીના પરિવારજનોને SOTTO ની ટીમ દ્વારા અંગદાન માટેની પ્રેરણા આપવામાં આવે છે.

આ પણ વાંચો :  લાખોની આવક મેળવવા પ્રગતિશીલ ખેડૂતનો અનોખો દેશી જુગાડ, રાત્રે ખેતર વચ્ચે મૂકે છે પાણીનું કુંડું

સિવિલ હોસ્પિટલના સુપરિટેન્ડન્ટ ડૉ. રાકેશ જોષી જણાવે છે કે, મૃત્યુ બાદ શરીર પંચમહાભૂતમાં વિલિન થઇ જાય તેના કરતા કોઈ જરૂરિયાતમંદને અંગો ઉપયોગી થાય અને જીવનમાં બદલાવ લાવવામાં મદદરૂપ બને તે માટે અંગદાન જરૂરી છે. SOTTO ની ટીમ દ્વારા હોસ્પિટલમાં બ્રેઇનડેડ થતા પરિવારજનોને અંગદાનનું મહત્વ સમજાવીને અંગદાન માટે પ્રેરવામાં આવે છે. 

દિવસ-રાત રાઉન્ડ ધ ક્લોક કામગીરી કરી રહેલી ટીમના અથાગ પરિશ્રમોના પરિણામે જ કોરોનાની વિષમ પરિસ્થિતિઓ વચ્ચે પણ 13 મહિનાના ટૂંકા ગાળામાં 105 અંગદાન મેળવવામાં સફળતા મળી છે. રાજ્યમાં અંગોનું વેઇટીંગ ઘટે જીવંત વ્યક્તિને અંગદાન કરવાની જરૂર પડે નહીં. બ્રેઇનડેડ વ્યક્તિઓના પરિવારજનો અંગદાન માટે પ્રેરાય તે ઉમદા હેતુથી સિવિલ હોસ્પિટલમાં SOTTO દ્વારા અંગદાન માટેનો સેવાયજ્ઞ શરૂ કરાયો છે.