ગુજરાતમાં પેલું ફરતું દવાખાનું કયાં ફરે છે તેની જ ખબર નથી, આ હોસ્પિટલમાં દવાઓનો જથ્થો પણ પુરતો નથી!

ચેતન પટેલ/સુરત: નવી સિવિલ હોસ્પિટલમાં સુગર, હાઇપરટેન્શન, શ્વાસ સહિતની 50 દવા ન મળતા રોજ 1000 દર્દી બહારથી ખરીદવા મજબૂર છે. સરકારી હોસ્પિટલ સિવિલમાં મફતમાં મળતી દવાઓ 10થી 200 રૂપિયામાં ખરીદવી પડે છે. સરકારના વેરહાઉસમાંથી જ સપ્લાય થતો નથી. જેથી સ્થાનિક સ્તરે દવા ખરીદવી પડે છે. તેમ નવી સિવિલ હોસ્પિટલ તંત્ર જણાવે છે.

સુરત નવી સિવિલ હોસ્પિટલમાં દર્દીઓને રોજ જુદી જુદી સમસ્યાઓનો સામનો કરવો પડે છે. ઘણી વખત તબીબોની બેદરકારી જોવા મળે છે તો ક્યારેક દવા મળતી નથી. હાલમાં ડાયાબિટીસ, શ્વાસના રોગો, એલર્જી, એન્ટિબાયોટિક્સ, અલ્સર, કેલ્શિયમ, વિટામિન અને હાઇપરટેન્શન જેવા રોગોની 50થી વધુ આવશ્યક દવા ખુટી પડી છે.

આ ઉપરાંત અન્ય બીમારીઓની 50 દવા પણ નથી. આ સ્થિતિમાં દર્દીઓ દવા બહારથી ખરીદી રહ્યા છે. જે દવા પૂરી થઈ ગઈ છે તેવા રોગોના 1500થી વધુ દર્દી સિવિલમાં આવે છે. પરંતુ અધૂરી દવા જ મળે છે. અહીં રોજના 4000 દર્દી સારવાર માટે આવે છે. હોસ્પિટલમાં ખુટી પડેલી આ દવાઓ દર્દીઓને વિનામૂલ્યે મળે છે. જે હાલમાં બહારથી ખરીદવા ગરીબ દર્દીઓ મજબૂર બની રહ્યા છે. આ દવાઓ બજારમાં 10થી 200 રૂપિયામાં મળે છે. 

વિધર્મીએ નામ બદલીને યુવતીને બરાબરની પીંખી! ભાંડો ફૂટતા અશ્લીલ ફોટા વાયરલ કરવાની ધમકી

બીજી તરફ હોસ્પિટલ મેનેજમેન્ટનું કહેવું છે કે વેરહાઉસમાંથી જ દવાઓ સપ્લાય કરવામાં આવી રહી નથી. સ્થાનિક કક્ષાએ દવાની ખરીદી કરીને કામગીરી કરવામાં આવી રહી છે. જોકે નવી સિવિલ હોપિટલ તંત્ર દ્વારા જણાવાયું છે કે 56 આવશ્યક દવા પૂરી પાડવા ગાંધીનગર યાદી મોકલાવી છે. 

હોસ્પિટલે ગાંધીનગર પત્ર લખીને 56 દવા પૂરી પાડવા માંગ કરી છે. કેલ્શિયમ-ડાયાબિટીસની દવા માટે સ્થાનિક ઓર્ડર અપાયો છે. શ્વાસની દવા પણ સપ્તાહ સુધી મંગાવાશે.