....अन् अनुष्काच्या मदतीला धावले नागपूर पोलीस

संग्रहित छायाचित्र

मुंबई : कोरोना व्हायरसच्या प्रादुर्भावामुळे संपूर्ण देशभरात लॉकडाऊन लागू करण्यात आला आहे. अशा या प्रसंगी अडचणीत सापडलेल्यांच्या मदतीसाठी तत्पर असणाऱ्या पोलीस खात्याची अतिशय वेगवान सेवा पुन्हा एकहा पाहण्याची संधी मिळाली आहे. यावेळी पोलीस चक्क, अभिनेत्री अनुष्का शर्मा हिच्या मदतीसाठी पुढे आले आहेत. 

मुंबईत असणाऱ्या अनुष्काच्या मदतीला येत थेट नागपूर पोलिसांनी एक ट्विटही केलं आहे. गरज असल्यास आम्ही महाराष्ट्र राज्यातील वनविभागाला सांगून तुझ्या मदतीसाठी पाठवू का, असा थेट प्रश्नच त्यांनी तिला केला आहे. बरं, त्यांच्या या मदतीने अनुष्काचा पती, क्रिकेटपटू विराट कोहली अडचणीत येऊ शकतो. कारण, प्रकरणच तसं आहे.  

पोलीस खात्याकडून अनुष्काला ही मदत करण्यास कारणीभूत ठरला आहे तो म्हणजे एक व्हिडिओ. बी- टाऊनच्या या अभिनेत्रीनेच सोशल मीडियावर एक व्हिडिओ पोस्ट करत आपल्या घरात डायनासोर शिरल्याचं सांगितलं होतं. 

Should we ask @MahaForest Dept to send a rescue team? https://t.co/gQ6IwmUWoa

— Nagpur City Police (@NagpurPolice) May 20, 2020

अनुष्काच्या घरात शिरलेला हा डायनासोर म्हणजे दुसरा- तिसरा कोणी नसून, तिचा पती विराट कोहलीच होता. अतिशय विनोदी अंदाजात तिने हा मजेशीर व्हिडिओ शेअर केला होता. जो सोशल मीडियावर विशेष गाजला. बरं, इतका गाजला की आता खरंच अनुष्काच्या मदतीसाठी पोलीस आणि वनविभाग सरसावल्याचंही चित्र पाहायला मिळालं. तणावाच्या परिस्थितीमध्ये सेलिब्रिटी जोडी आणि पोलिसांमधील हा सोशल संवाद नक्कीच अनेकांच्या चेहऱ्यावर आनंद आणून गेलं असणार यात शंका नाही.