निकालापूर्वीच राजस्थानमध्ये काँग्रेसच्या कार्यालयाला रोषणाई; सेलिब्रेशनला सुरुवात

जयपूर: राजस्थान विधानसभा निवडणुकीच्या मंगळवारी जाहीर होणाऱ्या निकालापूर्वीच काँग्रेसकडून राज्यात विजयाचे सेलिब्रेशन सुरु झाले आहे. जयपूर येथील काँग्रेसच्या प्रदेश कार्यालयाला रोषणाई करण्यात आली आहे. त्यामुळे काँग्रेस कार्यकर्त्यांना विजयाचा विश्वास असल्याचे चित्र दिसत आहे. वसुंधरा राजे यांनी १३ डिसेंबर २०१३ रोजी मुख्यमंत्रीपदाची शपथ घेतली होती. मात्र, यंदाचा १३ डिसेंबरपासून त्यांच्या सरकारची उलटी गिनती सुरु होईल, असे प्रदेश काँग्रेसचे सरचिटणीस महेश शर्मा यांनी सांगितले. 

राजस्थान, मध्य प्रदेश, छत्तीसगढ, तेलंगणा आणि मिझोराम या पाच राज्यांच्या विधानसभा निवडणुकीचे निकाल उद्या जाहीर होणार आहेत. गेल्याच आठवड्यात या राज्यांमधील एक्झिट पोल जाहीर झाले होते. यामध्ये जवळपास सर्वच सर्वेक्षण संस्थांनी राजस्थानमध्ये सत्ताबदल होणार असल्याचा अंदाज वर्तविला होता. त्यामुळे राजस्थानमधील काँग्रेस कार्यकर्त्यांचा हुरूप वाढला आहे. तर मध्य प्रदेश आणि छत्तीसगढमध्ये भाजप व काँग्रेसमध्ये तुल्यबळ लढत पाहायला मिळेल, असा अंदाज आहे. याठिकाणी भाजप सर्वात मोठा पक्ष ठरला तरी त्यांच्या जागा कमी होतील. लोकसभा निवडणुकीच्या उंबरठ्यावर तिन्ही राज्यांमधील हे यश राहुल गांधी यांच्या प्रतिमानिर्मितीसाठी फायदेशीर ठरले, असा राजकीय जाणकारांचा अंदाज आहे.

Jaipur: Congress state office decorated ahead of counting for #RajasthanElections tomorrow; state Congress general secretary (organization) Mahesh Sharma says, "Vasundhara govt took oath on Dec 13, 2013. We had started a countdown for that govt's departure on Dec 13, 2017" pic.twitter.com/B44kryeZzI

— ANI (@ANI) December 10, 2018