हार्बर रेल्वेची वाहतूक विस्कळीत

Representative Image

मुंबई : रेल्वे रुळाला तडा गेल्याने हार्बर रेल्वेची वाहतूक विस्कळीत झाली आहे. ऐन गर्दीच्या वेळीच हा प्रकार घडल्याने प्रवाशांना मोठ्या त्रासाचा सामना करावा लागण्याची शक्यता आहे.

चुनाभट्टी - कुर्ला दरम्यान रेल्वे रुळाला तडा गेला आहे. रेल्वे रुळाला तडा गेल्याने पनवेलच्या दिशेनं जाणारी वाहतूक विस्कळीत झाली आहे. 

सकाळी ७ वाजण्याच्या सुमारास रुळाला तडा गेल्याचं निदर्शनास आलं. यानंतर रेल्वे प्रशासनाने तात्काळ दुरुस्तीच्या कामास सुरुवात केली आहे. 

सकाळची वेळ आणि सोमवार असल्याने नोकरदार वर्ग, शाळा-कॉलेजेसला जाणाऱ्या विद्यार्थ्यांची संख्या मोठी असते. त्यातच रेल्वेची वाहतूक विस्कळीत झाल्याने प्रवाशांमध्ये संतापाचं वातावरण आहे.