ભાજપમાં સાઈડલાઈન કરાયેલા પૂર્વ મુખ્યમંત્રી વિજય રૂપાણીને સોંપાઈ મોટી જવાબદારી

Gujarat Politics : ગુજરાતના પૂર્વ મુખ્યમંત્રી વિજય રૂપાણીને પદ પરથી હટાવ્યા બાદ તેઓ લગભગ સાઈડલાઈન થઈ ગયા હતા. પરંતુ હવે વિજય રૂપાણી ફરી ભાજપમાં પિક્ચરમાં આવ્યા હતા. તાજેતરમાંજ મહારાષ્ટ્રના મુખ્યમંત્રીની પસંદગી માટે ભૂતપૂર્વ CM વિજય રૂપાણીએ મોટી જવાબદારી નિભાવી હતી. તેમને ઓબ્ઝર્વર તરીકે નિમણૂંક કરાયા હતા. ત્યારે હવે ગુજરાતના પૂર્વ મુખ્યમંત્રી વિજય રૂપાણીનું રાજકીય કદ વધ્યું છે. તેઓને ફરીથી ભાજપમાં મહત્વની જવાબદારી સોંપવામાં આવી છે. દિલ્હીથી મળતા અપડેટ અનુસાર, ભાજપનું સંગઠન માળખું વધુ મજબૂત બને તે માટેની વિશેષ જવાબદારી સોંપવામાં આવી છે. 

ભાજપ સંગઠનને મજબૂત બનાવવા કમર કસી
ભાજપના આંતરિક સૂત્રો દ્વારા પ્રાપ્ત માહિતી અનુસાર, ભાજપ સંગઠનમાં ન માત્ર ગુજરાત સ્તર પર, પરંતુ રાષ્ટ્રીય સ્તરે પણ મોટા ચેન્જિસ થવાના છે. ભાજપ દ્વારા દેશભરમાં સંગઠન રચનાની કામગીરી ચાલી રહી છે. ત્યારે પક્ષે સંગઠન સાથે વિધાનસભાની ચૂંટણીમાં પણ કમળ ખીલવવા માટે કમર કસી છે. ભાજપનું હવે મોટું ફોકસ દિલ્હી વિધાનસભાની ચૂંટણી છે. દિલ્હીમાં ભાજપની જીત માટે માઈક્રો પ્લાનિંગ કરવાની જરૂર છે, તો જ આપનો ગઢ તોડી શકાય છે. આ માટે ભાજપે અનેક નેતાઓને કમાન સોંપી છે. 

પૂર્વ મુખ્યમંત્રીને મોટી જવાબદારી
ગુજરાતના પૂર્વ મુખ્યમંત્રી વિજય રૂપાણી પણ પિક્ચરમા આવી ગયા છે. દિલ્હીમાં વિધાનસભાની ચૂંટણી પૂર્વે ભાજપનું સંગઠન માળખું વધુ મજબૂત બને તે માટેની વિશેષ જવાબદારી સોંપવામાં આવી છે. દિલ્હીમાં ગુજરાત પેટર્નથી કમળ ખીલવવા માટે બૂથ લેવલથી કામ કરવાની જરૂર છે, જેના માટે વિજય રૂપાણીને મહત્વની જવાબદારી સોંપાઈ છે. આ ઉપરાંત કેન્દ્રીય કેબિનેટ મંત્રી ડો. મનસુખ માંડવીયા, રાજ્યસભાના સાંસદ મયંક નાયક અને ધારાસભ્ય અમિત ઠાકરને પણ જવાબદારી સોંપવામાં આવી છે. 

વડોદરામાં સરકારી જમીન પર ભાજપ નેતાનો કબજો, સમા વિસ્તારના 6 ફાઈનલ પ્લોટ પર ફેન્સિંગ કર્યું#gujarat #vadodara #news #ZEE24KALAK pic.twitter.com/euayNASnhK

— Zee 24 Kalak (@Zee24Kalak) December 22, 2024

દિલ્હીમાં ભાજપ માટે જીત કેમ જરૂરી 
ઉલ્લેખનીય છે કે, દિલ્હીમાં ભાજપ સત્તાથી દૂર છે. અહીં છેલ્લાં 10 વર્ષથી આમ આદમી પાર્ટીની સત્તા છે. બે વાર આમ આદમી પાર્ટી ભાજપને માત આપી ચૂકી છે. ત્યારે હવે ભાજપે ત્રીજીવાર મોકો ગુમાવવા માંગતુ નથી. તેથી જ અહીં ગુજરાત સ્ટાઈલથી બૂથ લેવલ પર કામ કરવાની જરૂર છે તેવું વર્તાઈ રહ્યું છે. આ માટે જ ગુજરાતના નેતાઓના સહારે હવે ભાજપ દિલ્હીમાં સત્તા મેળવવા માંગે છે.