CPM Worker Freed: 'കേരളം ഭരിക്കുന്നത് ഞങ്ങൾ'; പൊലീസുകാർക്കെതിരെ ഭീഷണി, കസ്റ്റഡിയിലെടുത്തയാളെ മോചിപ്പിച്ച് സിപിഎം പ്രവർത്തകർ

CPM Worker Freed: സിപിഎം ബിജെപി പ്രവർത്തകർ തമ്മിലുള്ള സംഘർഷം തടയാൻ ശ്രമിച്ച പൊലീസുകാർക്കെതിരെയും ആക്രമണമുണ്ടായി.

കണ്ണൂർ: പൊലീസുകാർ കസ്റ്റഡിയിലെടുത്ത പ്രതിയെ മോചിപ്പിച്ച് സിപിഎം പ്രവർത്തകർ. സംഭവത്തിൽ 55 പേർക്കെതിരെ പൊലീസ് കേസെടുത്തു.  മണോളിക്കാവ് ക്ഷേത്രത്തിലെ ഉത്സവത്തോട് അനുബന്ധിച്ചാണ് സംഭവം.

കഴിഞ്ഞ ദിവസം മണോളിക്കാവ് ക്ഷേത്രത്തിൽ സിപിഎം ബിജെപി പ്രവർത്തകർ തമ്മിൽ സംഘർഷമുണ്ടായിരുന്നു. ക്ഷേത്ര ഉത്സവത്തിനിടെ എഴുന്നള്ളിപ്പ് നടന്നപ്പോൾ സിപിഎം പ്രവർത്തകർ ഇൻക്വിലാബ് സിന്ദാബാദ് മുദ്രാവാക്യം വിളിക്കുകയും ബിജെപി പ്രവർത്തകർ അത് തടഞ്ഞതോടെയുമാണ് പ്രശ്നങ്ങളുടെ തുടക്കം. സിപിഎം ബിജെപി പ്രവർത്തകർ തമ്മിലുള്ള സംഘർഷം തടയാൻ ശ്രമിച്ച പൊലീസുകാർക്കെതിരെയും ആക്രമണമുണ്ടായി.  

തലശ്ശേരി എസ്ഐ ഉൾപ്പെടെ നാല് പൊലീസുകാർക്ക് സംഘർഷത്തിൽ പരിക്കേറ്റിരുന്നു. 27 സിപിഎം പ്രവർത്തകർക്കെതിരെ ഈ സംഭവത്തിൽ കേസെടുത്തു. കേരളം ഭരിക്കുന്നത് തങ്ങളാണെന്നും പൊലീസ് കാവിൽ കയറി കളിക്കേണ്ടെന്നും ഭീഷണിപ്പെടുത്തിയാണ് പൊലീസിനെതിരെ ആക്രമണം നടത്തിയതെന്ന് എഫ്ഐആറിൽ പറയുന്നു. ഇതിൽ പ്രതിയായ ആളെ പിടിക്കാനാണ് ഇന്ന് പൊലീസ് മണോളിക്കാവിലെത്തിയത്.

ഇന്ന് ഉത്സവം നടന്നുകൊണ്ടിരിക്കെയാണ് സിപിഎം പ്രവർത്തകരെ അറസ്റ്റ് ചെയ്യാനായി എസ്ഐയുടെ നേതൃത്വത്തിൽ പൊലീസുകാർ ക്ഷേത്രത്തിലേക്ക് വന്നത്. ഒന്നാം പ്രതി ബിപിനെ കസ്റ്റഡിയിലെടുത്ത പൊലീസിനെ സിപിഎം പ്രവർത്തകർ വള‌യുകയും ജീപ്പിൽ നിന്നും ബിപിനെ മോചിപ്പിക്കുകയും ചെയ്തു. പിന്നീട് പൊലീസുകാരെ ബന്ദികളാക്കിയെന്നാണ് പൊലീസ് പറയുന്നത്. സംഭവത്തിൽ ഒരാളെ അറസ്റ്റ് ചെയ്തിട്ടുണ്ട്. 55 പേർക്കെതിരെ കലാപ ശ്രമത്തിനും കുറ്റനിർവ്വഹണം തടസ്സപ്പെടുത്തിയതിനും കേസെടുത്തു.