Raksha Bandhan: भावाने किडनी देऊन वाचवले बहिणीचे प्राण, सर्वच स्तरावर कौतूक

Rakshabandhan 2021 : रक्षाबंधन हा सण 22 ऑगस्ट म्हणजेच रविवारी साजरा केला जाईल. या दिवशी बहिण आपल्या भावाच्या मनगटावर राखी बांधतात आणि स्वतःचे रक्षण करण्याचे वचन घेतात. यंदाचे रक्षाबंधन अनेक प्रकारे विशेष असणार आहे. या वर्षी रक्षाबंधनाला 4 विशिष्ट योग जुळून आले आहेत. हा महायोग 50 वर्षांनंतर तयार होत आहे. अशा परिस्थितीत, बहीण आणि भावासाठी हा काळ अतिशय शुभ राहणार आहे.

रक्षाबंधनाच्या फक्त एक दिवस आधी एका भावाने आपल्या बहिणीसाठी असे काही केले आहे की सगळे त्याचे कौतुक करत आहेत. पीटीआय या वृत्तसंस्थेनुसार, हरियाणाच्या रोहतक येथील 31 वर्षीय महिलेला तिच्या भावाने किडनी दिली आहे. मूत्रपिंडाच्या आजाराने ग्रस्त असलेल्या मोठ्या बहिणीला किडनी दान करून भावाने जीवनदान दिले. भावाचे हे कार्य पाहून गावकरी आणि कुटुंबातील सदस्यही त्याची स्तुती करत आहेत.

रक्षाबंधनाला बहिणीसाठी यापेक्षा चांगली भेट काय असू शकते. पीटीआय या वृत्तसंस्थेनुसार आकाश हेल्थकेअरच्या डॉक्टरांनी सांगितले की, ही महिला गेल्या पाच वर्षांपासून किडनीच्या आजाराने त्रस्त होती आणि तिच्यावर बराच काळ उपचार सुरू होते. या दरम्यान मात्र उच्च रक्तदाबाकडे लक्ष न दिल्याने त्याची किडनी खराब झाली होती. त्यानंतर ती बदलण्याशिवाय आमच्यासमोर दुसरा उपाय नव्हता.

डॉक्टरांनी सांगितले की दुर्दैवाने, इतर अनेक रुग्णांप्रमाणे तीही डायलिसिसच्या गैरसमजांना बळी पडली आणि प्रक्रिया सुरू करण्यास विलंब झाला. यामुळे त्यांची प्रकृती खालावली. त्यानंतर किडनी प्रत्यारोपणाचा पर्याय निवडण्यात आला. महिलेच्या कुटुंबातील अनेक सदस्यांनी त्या महिलेला किडनी दान करण्याचा प्रयत्न केला, परंतु महिलेचा रक्तगट केवळ तिच्या भावाकडूनच सापडला. यानंतर पाच तासांच्या शस्त्रक्रियेनंतर किडनी ट्रांसप्लांट करण्यात आली.